Bisopi L. Todd Budge
iKarua ni Daunivakasala ena Matabisopi Vakatulewa
Ni oti e 18 na vula ni veiqaravi vaka dua na Vakaitutu Raraba ena Vitusagavulu, sa mai tokoni o Bisopi L. Todd Budge me sa iKarua ni Daunivakasala ena Matabisopi Vakatulewa. E sa sosomitaki Bisopi Dean M. Davies kina, o koya ka sa kacivi me dua na Vakaitutu Raraba ena Vitusagavulu.
A tauri ivola o Bisopi Budge mai na Brigham Young Univesiti ena dua na koroi ni veika vakailavo. A cakacaka o koya ena & Bain Company e Japani; na Citibank, e N.A.; kei na GE Capital e Japani kei Atlanta, Georgia e Amerika. A yaco me peresitedi ka vakailesilesi liu ni Tokyo Star Bank Limited ena 2003, ka veiqaravi vaka jeameni ni matabose ni baqe mai na 2008 ki na 2011. A veiqaravi talega vaka-lewe ni matabose ni dairekita ni Hawaiian Airlines.
Ena dua na gauna ni nona bula, ni vakasamataka tiko o Bisopi Budge me veisau na nona cakacaka, a ciqoma kina eso na ivakasala yaga sara. “Eda gadrevi ira na tamata yalodina ena bisinisi,” a kaya vua e dua na daunivakasala, ka vakuria ni nona salatu ni cakacaka ena solia vua e vuqa na madigi me vakasalataki ka vukei ira kina na tamata.
Na nona cakacaka o Bisopi Budge, a solia vakaidina vua e vuqa na madigi me veivakauqeti ki na veika vinaka ena vuravura ni bisinisi, oka kina na dolavi ni katuba me wasea na kosipeli mai Japani, ka a veiqaravi taumada kina vaka-daukaulotu ena Tabana ni Kaulotu na Japani Fukuoka. E muri a qai veiqaravi vaka-peresitedi ni Tabana ni Kaulotu na Japani Tokyo.
“Na itukutuku vinaka ni kosipeli,” a vakavulica o koya,“e sega ni mai yalayala ni dua na bula e galala mai na rarawa kei na dredre ia na bula e taucoko tu na kena ibalebale—na bula e rawa ni ‘marautaki kina ena vukui Karisito’ na noda rarawa kei na leqa’ [Alama 31:38].”1
A sucu o Lawrence Todd Budge enai ka 29 ni Tiseba, 1959, e Pittsburg, California, Amerika. A sotavi Lori Capener ena nodrau itekivu ni yabaki ena Brigham Young University. Erau a vakamau ena 1981 ena Valetabu e Logan Utah. Erau nodratou itubutubu e ono na gone.
Ni se bera ni kacivi me dua na Vakaitutu Raraba ena Vitusagavulu, a veiqaravi o Bisopi Budge vaka dua na Vitusagavulu ni iWasewase, peresitedi ni iteki, vunivola liu ni iteki, peresitedi ni Cauravou ena iteki, bisopi, kei na peresitedi ni kuoramu ni italatala qase.