iVoladusidusi Raraba Vakarautaki Tu ena iTuvatuva Vakalivaliva

Na iwalewale ni kena vakavoui na iVoladusidusi Raraba: Veiqaravi ena Lotu i Jisu Karisito ni Yalododonu Edaidai e tomani tikoga, kei na kena vakadewataki na veitikina digitaki ena 21 na vosa lelevu sa voleka me vagalalataki yani.

Na ivoladusidusi vou a tabaki ena mona livaliva ena vosa Vakavalagi ena Feperueri 2020, kei na ikuri ni vagalalataki ni veitikina sa vakavoui ena Maji kei na Jiulai. Me yacova mai oqo, e 16 mai na 38 taucoko ni wase ni ivola oqo era sa volai vou tale ka tabaki. Na vo ni wase ena vakavoui ena vica na vula mai oqo, oka kina na kena vakalekalekataki ka vakarawarawataki na ivakatagedegede ni kena wiliki.

Ni oti toka ga vakalailai na koniferedi raraba ni Okotova 2020, sa na tekivu me tabaki ena 21 na vosa (me ikuri ni vosa Vakavalagi) na wase 32, “Veivutuni kei na Matabose ni Lotu,” kei na tikina eso ni iwasewase 38.6, “Lawatu ni Bula Savasava” (ka tokona na wase 32). Na ikuri ni wase eso era sa vakadewataki ka vakarautaki me tabaki ena veivula roro mai oqo, ka ra na vakarautaki kece tu ena 35 na vosa.

E dina ga ni sa tu na ivoladusidusi ena mataveilawa ni Lotu ka vakakina ena Gospel Library app, na kena inaki taumada e baleti ira na iliuliu ni Lotu. Na ivoladusidusi vakavoui oqo e sosomitaka na iVoladusidusi 1 (me baleti ira na peresitedi ni iteki kei na bisopi) kei na iVoladusidusi 2 (me baleti ira kece na iliuliu) ka sa cokotavata na itukutuku kece sara ni ivoladusidusi ki na dua ga na ivola tabaki.

Na ituvatuva ni veika me baleta na ivoladusidusi vou oqo sai koya na cakacaka ni veivakabulai kei na bula vakacerecerei, ka oka kina e va na iwasewase ni vakanamata ni da lako mai vei Karisito ka veivuke ena cakacaka ni Kalou:

1. Bulataki ni kosipeli i Jisu Karisito

2. Nodra qaravi o ira era gadreva tu na veivuke

3. Sureti ira na tamata kecega me ra ciqoma na kosipeli

4. Vakaduavatataki me tawamudu na matavuvale

E caka na wase eso oqo me vukei ira na iliuliu e veiyasai vuravura mera veiqaravi Vakarisito ena nodra vakayagataka na vei parokaramu ni Lotu, lawatu, kei na kena icakacaka, ena gauna e gadrevi kina, mera vakamatautaki kina na nodra ituvaki ni vanua.

Na kena tabaki vakalivaliva na ivoladusidusi e rawa kina ni vakadodonutaki ka talevi lesu ni tubu tiko na Lotu ka veisau tiko na lawatu eso. Na ivakavuvuli ni kena rawa ni vakamatautaki na ivoladusidusi e vukei ira na iliuliu kei ira na lewenilotu me ra vakayagataka vakavinaka na ivakavuvuli kei na parokaramu eso ni Lotu ena vei ivavakoso kece sara kei na veivanua duidui, ena vuravura raraba ni Yalododonu.