Elder Brent H. Nielson
Mataveiliutaki ni Vitusagavulu
E dua vei ira na lesoni bibi a vulica o Elder Brent H. Nielson ni oti nona a biuta na Lotu e dua na lewe ni matavuvale me vica na yabaki sa ikoya ni o ira kece na luve ni Kalou era gadreva na loloma ni iVakabula kei na kaukauwa veivakabulai ni Nona Veisorovaki.
Ena nona vulica tiko na Luke 15 kei na nona matavuvale ena gauna oqo, a rogoca rawa o Elder Nielson na italanoa vakaibalebale ni gone cidroi ena dua na sala vou.
“Au dau raici au tu vakaikoya na luvena tagane ka tiko ga e vale. … Au a mai vakila yani ena siga oya ni sai au na gone cidroi,” a kaya o koya. “Eda sa sega kece ni yacova na ka e vakarokorokotaki kina na Tamada (raica na Roma 3:23). Eda gadreva kece na nona Veisorovaki na iVakabula me vakabulai keda. Eda sa yali kece ka gadreva meda kunei.”1
A tokoni o Elder Brent Hatch Nielson me dua na lewe ni Mataveiliutaki ni Vitusagavulu enai ka 3 ni Okotova, 2020, ni oti na sereki nei Elder L. Whitney Clayton, ka a soli vua na itutu vaka‑emeritesi.
A sucu o Elder Nielson e Burley, Idaho e Amerika, enai ka 8 ni Tiseba, 1954. Ni se cauravou kina o koya a laki kaulotu ki Finland. A vakamautaki Marcia Ann Bradford o koya ena June 1978 ena Valetabu e Salt Lake. Erau nodratou itubutubu e ono na gone.
A ciqoma o Elder Nielson e dua na koroi ena vosa Vakavalagi mai na Brigham Young University ena 1978. Ena 1981 a ciqoma o koya e dua na koroi ni vuniwai ni lawa mai na University of Utah. A qai yaco me cakacaka vaka‑loya ka itokani ena dua na kabani ni lawa e Twin Falls, Idaho e Amerika, me voleka ni 30 na yabaki.
Sa veiqaravi oti o Elder Nielson vaka-daunivakasala ena iWasewase ena Pasifika kei na iWasewase ena Filipaini ka Peresitedi ni iWasewase ena Filipaini. Mai na 2015 ki na 2020, a veiqaravi o koya vaka-Dairekita Liu ni Tabana ni Kaulotu.
Ni bera ni kacivi me Vitusagavulu Vakaitutu Raraba ena Epereli 2009, a veiqaravi vaka peresitedi ni Cauravou ena tabanalevu, bisopi, lewe ni matabose e cake, daunivakasala ena mataveiliutaki ni iteki, peresitedi ni iteki, ka a Vitusagavulu ni iWasewase e Idaho.