Vinakati Vakalevu Cake Mai Vua na Turaga.
Na veigauna ni rarawa kei na druka e sega ni veisautaka na veiwanonovi ni Turaga ni sa raici keda ena lomavinaka, ka vakalougatataki keda.
Dua na siga ena vuqa na yabaki sa oti, ni’u veiqaravi tu vaka daukaulotu ena dua na tabana lailai mai na yanuyanu o Amami Oshima, Japani, keirau a marau na veitokani ni keirau sa rogoca ni o Peresitedi Spencer W. Kimball sa na sikovi Esia tiko kei ira kece na lewenilotu kei na daukaulotu e Japani era sa sureti yani ki Tokyo mera laki rogoca na parofita ena dua na koniferedi ni iwasewase. Vata kei ira na lewe ni tabana, keirau sa maqusa na veitokani ena tekivu tuvatuva yani ki na koniferedi, ni na vodoki na waqa me 12 na auwa ena East China Sea ki na vanua o Japani, tarava yani e 15 na auwa vodo sitimanivanua ki Tokyo. Ia , a ka ni rarawa, a sega ni vakakina Sa tukuna vei keirau o neimami peresitedi ni kaulotu, ena vuku ga ni kena yawa kei na gauna, keirau na veitokani sa na sega ni tiko rawa ena koniferedi e Tokyo.
Ni ra sa biubiu yani na lewe ni tabana lailai ki Tokyo, keirau sa wawa tiko mai. Na siga a tarava a vakanomodi sara ka galili. Keirau a soqoni ni sakaramede duadua ga ena valenilotu lailai, ka ra tiko na Yalododonu Edaidai kei ira na daukaulotu e Japani ena koniferedi.
Na ituvaki ni yaloqu rarawa a tubu sara ena gauna mada ga niu rekitaka noqu rogoci ira na lewe ni tabana ni ra sa lesu mai na koniferedi ni ra mai tukuna ni sa vakaraitaka o Peresitedi Kimball ni na tara e dua na valetabu e Tokyo. Era a marau sara vakalevu ni ra wasea ni sa vakavotukana na nodra tatadra. Era a vakamacalataka, ni gauna era sa rogoca kina na kacivaki ni valetabu, era sa sega ni tarova rawa na lewenilotu kei na daukaulotu na nodra reki ka vakasausau vata kina.
Sa sivi yani na veiyabaki, ia au se nanuma tikoga na noqu rarawa niu a calata na soqoni vakairogorogo o ya.
Ena veivula sa oti au a vakasamataka na veika oqo niu raica kina eso era a sotava na rarawa titobu kei na lolosi—a levu ka titobu cake maivei au niu a se kaulotu cauravou kina—a kauta mai na mate raraba e vuravura na COVID-19.
Ena tekivu ni yabaki oqo, ni sa mai tetelevu na mate raraba oqo, e ratou a vakaraitaka kina na Mataveiliutaki Taumada “ni Lotu kei ira na lewena era na vakaraitaka ena yalodina na noda na dinata meda lewenivanua vinaka ka veiwekani vinaka” 1 ka na “qaqarauni sara vakalevu.” 2 Koya gona, eda sa sotava oqo na kena tarovi na soqoni vaka-Lotu e vuravura raraba, na nodra vakasukai e sivia na veimama na iwiliwili ni daukaulotu ena Lotu ki na nodra vanua, kei na kena sogo tiko na valetabu kece ena Lotu taucoko. E udolu vei kemuni a vakarau tiko mo ni curuma na valetabu baleta na cakacaka vakalotu ni bula—oka kina na veivauci ni valetabu. Eso vei kemuni sa vakacavara totolo na nomuni veiqaravi vakadaukaulotu se sa vakacegui toka vakawawa ka lesi vou tale.
Ena gauna oqo, era sa sogota na veikoronivuli o ira na iliuliu ni matanitu kei na vuli—sa yaco kina me moici na tauri koroi ka vakaukauwataka na kena vakadaroi na soqo kei na itaviqaravi ni qito, veimaliwai, vanua, kei na vuli. E vuqa vei kemuni a vakarau ki na soqo eso ka sega ni tiko kina, na itavi a sega ni bau rogoci, kei na gauna ni qito a sega ni caka.
E rarawataki vakakina na vakasamataki ni vuvale a takali na nodra daulomani ena gauna vakaoqo; ka vuqa a sega mada ga ni veibulu rawa se soqoni eso era a nuitaka tu.
Me vakalekaleka, e vuqa vei kemuni sa sotava na rarawa dina sara ga, mosi ni yalo, kei na yalolailai. Ia meda sa qai vueti, vosota, ka toso rawa ki liu vakacava ni mai yaco na luluqa?
A tekivu ceuta o parofita Nifai na peleti lailai ni sa tagane uabula mai. Ni raicalesu na nona bula kei na cakacaka vakalotu, a solia e dua na vakasama bibi ena imatai ni tiki ni iVola i Momani. Na tikina oqo e tuva e dua na ivakavuvuli bibi meda vakasamataka ena noda gauna oqo. Ni oti nona vosa kilailevu, “Koi au, ko Nifai, au a sucu mai vei rau na itubutubu yalovinaka,” a vola, “kau sa raica e vuqa na ka rarawa ena noqu bula, ia, sa lomani au vakalevu sara na Turaga ena noqu bula taucoko” 3
Ni da vulica tiko na iVola i Momani, eda sa kila vinaka na vuqa na ka rarawa e tukuna tiko o Nifai. Ia ni sa ciqoma na nona rarawa ena veigauna ni nona bula, sa raica kina o Nifai ena kosipeli ni sa vinakati koya vakalevu cake na Turaga ena veisiga kece ni nona bula. Na veigauna ni dredre kei na yalo rarawa e sega ni veisautaka na veiwanonovi ni Turaga ni sa raici keda ena lomavinaka, ka vakalougatataki keda.
Keirau a sota kei Lesa e volekata ni 600 na daukaulotu e Ositerelia, e vuqa vei ira a sotava na vakatikitikitaki se vakatatabu baleta na COVID-19, ka vuqa era cakacaka mai na nodra vale. Keimami a raici ira vata na tamata ena Veiyalayalati Vou, iVola i Momani, kei na Vunau kei na Veiyalayalati a vakalougatataki ira na Turaga mera qaqa tiko ena gauna ni veika dredre. Era a vakatudonutaki vakalevu ena ka era a rawa ni cakava ena veivuke ni Turaga ka segai ena ka era sega ni cakava rawa ena nodra a vakatikitikitaki kei na vakatatabu.
Eda wilika baleti rau o Paula kei Sailasa, ni rau vesu tu ena bai, rau a masu, lagasere, veivakavulici, vakadinadina—ka papitaisotaki vakatawa ni veivesu. 4
Ia vei Paula tale, mai Roma, ni tiko vesu tiko ena rua na yabaki, a tomana tikoga kina me “vunautaka na matanitu ni Kalou,” 5 ka sa vakavuvulitaka vakadoudou sara na ka kei Jisu Karisito na Turaga.” 6
Me baleti Nifai kei Liai, ratou na luvei Ilamani, ni oti na nodratou vakacacani ka vesuki e ratou a wavoliti ena bukawaqa veitaqomaki ni Turaga ena “domo rogo lailai sara ka malumu … sa lau basikata sara na yalodra [na dauveivesu].” 7
Me baleti Alama kei Amuleki mai Amonaia, a raica ni vuqa era “sa vakabauta … sa tekivu me veivutuni, ka vakasaqara na ivolanikalou,” 8 dina ga ni ra a qai vakalialiai ka sega na kakana, wai, se isulu, ka vesuki ka sogolati tu e valeniveivesu. 9
Ka kena itinitini me baleti Josefa Simici, a tiko rarawa ena Valeniveivesu e Liberty, a vakila na galili kei na guilecavi, a qai rogoca na vosa ni Turaga: “Ni veika kece oqori … ko na yalomatua kina, ka vinaka cake” 10 ka “na tiko vata kei iko na Kalou me sega ni mudu ka sega ni mudu.” 11
Vei ira yadua era a kila vinaka na ka e kila o Nifai: ni dina ga era a sotava e vuqa na rarawa ena nodra veisiga ni bula, era sa vinakati vakalevu cake mai vua na Turaga.
Eda sa rawa talega meda tautauvata vaka-lewenilotu yadua ena lotu ena sala eda sa vinakati vakalevu cake mai vua na Turaga ena gauna bolebole eda sa sotava ena vica na vula sa oti. Niu raica na ivakaraitaki oqo, mera sa na vaqaqacotaka talega na nomuni ivakadinadina baleta na nona daurairai na noda parofita e bula tiko, e vakarautaki keda ena veisau eso ni bera na yaco mai ni mate raraba, me rawa ni da vosota na bolebole era yaco mai.
iMatai, me sa noda usutu na vuvale ka tokona na Lotu.
Ena rua na yabaki sa oti, a kaya o Peresitedi Russell M. Nelson: “Sa matau meda nanuma ni ‘lotu’ sai koya na ka e yaco e noda valenilotu, ka tokoni ena ka e yaco ena noda itikotiko. Sa dodonu me veisautaki na ivakarau oqo. Na Lotu e iusutu e na vuvale, ka tokoni mai na veika e yaco ena noda vei valenilotu.” 12 Sa qai dua dina na veisau vakaparofita! Na vuli kosipeli e kena usutu na vuvale sa mai vakayacori rawa ni sa mai sogo tu vakawawa na veivalenilotu. Dina ga sa tekivu me tudonu tale o vuravura ka da lesu i valenilotu, eda vinakata me caka tikoga na vuli kosipeli e kena usutu na vuvale kei na vuli e tauyavutaki ena gauna ni mate raraba.
Na ikarua ni ivakaraitaki ni da sa vinakati vakalevu cake mai vua na Turaga o ya na ivakatakila baleta na veiqaravi ena sala e cecere ka vakalou cake.
Ena 2018, a vakatakila mai o Peresitedi Nelson na veiqaravi me moica “na sala eda veikauwai kina vakai keda yadua.” 13 Na mate raraba sa tauyavutaka mai e vuqa na madigi me vagatara kina na noda kila ni veiqaravi. O ira na turaga marama dauveiqaravi, goneyalewa kei na cauravou, kei na so tale era sa veivuke yani mera vakarautaka na veitaratara, veivosaki, qaravi ni matanivale, kakana, itukutuku ena tekinolaji, kei na sakaramede mera kune kalougata era tiko leqa. Na Lotu vakaikoya sa veiqaravi tale tikoga vei ira eso ena gauna ni mate raraba ena cau vou yani ni iyaya ki na ilololo ni kakana, veivakavaletaki, kei na vale ni tokoni ni veitosoyaki kei na sasaga e muataki ki na veivanua walokai vakalevu duadua e vuravura. Era dodoliga yani na marama ni iSoqosoqo ni Veivukei kei na nodra vuvale ki na ibolebole ni kena caka e milioni na matavulo nodra na dauveiqaravi.
Na iotioti ni ivakaraitaki ni vakalougatataki ena gauna ni dredre o ya na kunei ni reki cecere ena lesu mai ni cakacaka vakalotu ni valetabu.
Ena vakamacalataki vinaka oqo ena dua na italanoa. Ena gauna sa ciqoma kina o Sister Kaitlyn Palmer na nona kaci ni kaulotu ena Epereli sa oti, sa marau vakalevu ni sa kacivi me kaulotu ia a vakila ni sa bibi talega ka cecere me gole ki valetabu me laki ciqoma na nona edaumeni ka cakava na veiyalayalati tabu. Ni oti ga nona lokuca nona edaumeni, sa tukuni mai ni valetabu kece era na sogo tu vakawawa ena vuku ni mate raraba e vuravura taucoko. Ni sa ciqoma na itukutuku vakamosiyalo oqo, sa rogoca sara ni na laki tiko ena koronivulu ni kaulotu (KNK) mai na nona itikotiko. Dina ga ni yaco na rarawa oqo, a raimatua tikoga o Kaitlyn me yaloqaqa tiko.
Ena veivula vakatatao e tarava, a sega ni vakayalia o Sister Palmer na nona nuidei tiko me gole ki valetabu. A lolo ka masumasu na nona vuvale mera dola na valetabu ni bera ni gole o koya. E dau tekivuna o Kaitlyn na nona KNK e vale ena veimataka ena nona kaya,“E nikua beka na siga keitou na ciqoma kina na cakamana mera dola tale na valetabu?”
Enai ka 10 ni Okosita, a kacivaka na Mataveiliutaki Taumada ni na dola tiko na valetabu nei Kaitlyn me baleta na cakacaka vakalotu ni bula ena mataka sara sara ga me vuka yani ki na nona vanua ni kaulotu. Ena sega rawa me gole ki valetabu ka vuka yani. Ena inuinui lailai ni na rawa, a veitaratara nona vuvale vei peresitedi ni valetabu o Michael Vellinga me raica ke dua na sala me yaco kina na cakamana e ratou sa masulaka tiko mai. A rogoci na nodratou lolo kei na masumasu!
Ena 2:00 ena mataka lailai, ni vo e vica na auwa ni bera na vuka, a kidavaki o Sister Palmer kei na nona vuvale, ena tagi, ena katuba ni valetabu maivei peresitedi ni valetabu ena matadredredre, ka kaya mai, “Dou yadra, na vuvale na Palmer. Dou sa kidavaki ena valetabu!” Ni sa cakava oti na nona edaumeni, e ratou a vakauqeti me ratou toso vakatotolo, ni sa wawa tiko na vuvale e tarava e katuba. E ratou a draiva vakadodonu ki na iroro ni waqavuka ni sa kena gauna me vuka ki na nona vanua ni kaulotu.
Na cakacaka vakalotu ni valetabu keitou a calata ena vica na vula sa kamica cake mai na kena nanumi taumada ni ra sa tuvai na dola ni valetabu e vuravura.
Niu mai tinia, yalovinaka rogoca na vosa veivakayaloqaqataki, marautaki, veilaveti nei Parofita Josefa Simici E sega e dua me kila rawa ni a vola ni a vakararawataki ka tuduadua, vakataotaki ka tabonaki tu ena dua na vale mai Nauvoo, ni vuni tiko maivei ira era saga mera vesuki koya vakailoa:
“Ena gauna oqo, na cava eda sa rogoca ena kosipeli sa vunautaki vei keda? Na domo ni mamarau! Na domo ni loloma levu mai lomalagi; kei na domo ni dina mai na loma ni qele; na itukutuku rekitaki vei ira na mate; na domo ni mamarau vei ira na bula kei ira na mate; na itukutuku rekitaki. …
“…Me da kakua beka ni tomana tiko na inaki cecere vakaoqo?” Me toso ki liu ka kakua ni suka ki muri. Na yaloqaqa … ka toso tikoga ki liu ka qaqa! Mo dou reki ka marau vakalevu. Me kacabote mai ko vuravura ena lagasere.” 14
Kemuni na taciqu kei na ganequ, au vakabauta ni dua na siga, oi kemuni yadua ni na raicalesu ena soqo sa mai bokoci, na rarawa, na druka, kei na galili e yaco ena gauna veibolei eda sa curuma yani me raici ni sa uabaleti iratou ena kalougata vinaka kei na vakabauta vakalevutaki kei na ivakadinadina. Au vakabauta ena bula oqo, kei na bula e tarava, na nomu rarawa, na nomu Amonaia, nomu Valeniveivesu e Liberty, era na vakatabui mo bula torocake kina. 15 Sa noqu masu, vata kei Nifai, ni sa rawa meda ciqoma na rarawa ena noda veisiga ni bula vata kei na noda kila ni da sa vinakati vakalevu cake mai vua na Turaga.
Au tinia ena noqu ivakadinadina baleti Jisu Karisito, o Koya a sega ni vulagi ena ka rarawa ka tiki ni Nona Veisorovaki tawamudu a sobura na veika kece e torosobu sara. 16 Sa kila vinaka o Koya na noda lolosi, mosi, kei na veilecayaki. Sai Koya na noda iVakabula, noda Dauveivueti, noda inuinui, noda veivakacegui, ka noda Dauveisereki. Au sa vakadinadinataka oqo ena Yacana tabu o Jisu Karisito, emeni.