iVakarau ni Yacasoli ni Kaulotu: Rawarawa, Totolo

E sa qai rawarawa cake oqo vei ira na lewenilotu me ra vukei ira na nodra itokani me ra sota vata kei ira na daukaulotu, ka sa vakavinavinakataki na kena sa vakavoui wale tikoga oqo na nodra ivakarau ni yacasoli ni kaulotu na daukaulotu me baleti ira na lewenilotu. Na iwalewale vakavoui ni yacasoli oqo e caka me semati ira vakatotolo na daukaulotu kei ira na lewenilotu soliyaca tiko me rawa ni ra tuva e dua na gauna ka na vukei ira na itokani ni lewenilotu me ra taura vakavinaka sara kina na lesoni ni kosipeli mai vei ira na daukaulotu.

Oqo na kena icakacaka:

Ena gauna e duavata kina na nomu itokani se veikilai me sota kei ira na daukaulotu, o na vakalewena ga e dua na fomu ni yacasoli ena Member Tools app se ena ChurchofJesusChrist.org/referrals. E rawa talega ni o biuta kina na nomu itukutuku ni veitaratara kei na dua na idusidusi vei ira na daukaulotu.
Ni sa vakau oti na fomu, ena veitaratara mai vei iko e dua na marama daukaulotu sa lesi me veivuke ena yacasoli ni lewenilotu. Ena lesia o koya na yacasoli ki na vanua donu ka na vukei iko mo sema vata kei rau na daukaulotu e kea.
Erau na ciqoma talega na daukaulotu oqori na nomu itukutuku ni veitaratara kei na yacasoli. Oqo ena rawa kina vei iko mo veivosakitaka na ituvaki kei na gagadre nei nomu itokani kei rau na daukaulotu. E rawa ni o tukuna vei rau na sala me vukei kina na nomu itokani me sotava e dua na gauna cecere. Sa tiko talega vei iko na digidigi mo vakaitavi ena lesoni ni kaulotu ena kena levu ga o gadreva.

“Era vakavulici na daukaulotu ni yacasoli kece e ciqomi mai vua e dua na lewenilotu e dodonu me qaravi me vaka e dua na ka talei,” a kaya o Elder Marcus B. Nash ena Vitusagavulu. “Ni ra sa ciqoma na daukaulotu e dua na yacasoli, era sa vakavulici me ra tarogi iko ena sala era na rawa ni vukea vakavinaka duadua kina na nomu itokani. Ni ra cakacaka vata na lewenilotu kei na daukaulotu, ena vakauqeti ira na Turaga ena kena tauyavutaki e dua na ka sotavi vakaibalebale me vukei ira na nomuni itokani me ra toro voleka vei Jisu Karisito.”

Na iyaya ni cakacakavata vou oqo sa vakarautaki tu ena 33 na vosa.