iVakarau ni Initaneti ena iTuva ni Masumasu ni Valetabu

E sa tauyavutaki e dua na ivakarau ni initaneti me vakatarai ira na lewenilotu me vakauta na yacadra na matavuvale se itokani kina valetabu, mera biu kina na veiyaca oya ena ituva ni masumasu. Na kena kerei me biu e dua na yaca ena ituva ni masumasu ni valetabu e sa rawa ni caka oqo ena nomu sikova na tabana ni itukutuku ni dua ga valetabu ena ChurchofJesusChrist.org/temples ka kiliki ki na isema ni ituva ni masumasu. Sa rawa talega ni vakayacori na kerekere ena iwasewase ni “Temples” ni app veikauyaki ni Member Tools. Ni sa vakacurumi oti na yaca eso, era na vakau ki na valetabu oya (se ki na valetabu voleka duadua e dola tiko).

E vuqa vei ira na lewe ni veimatalotu era dau masulaki ira na nodra daulomani kei ira tale eso era sotava tu na tauvimate se na leqa tale eso. Na ivolanikalou e vakamacalataka na ivakaraitaki ni gauna a masu kina vakailawalawa o Jisu Karisito ka vunauci ira talega me ra masu. Na ivakarau vata ga oqo e vakamuri ena valetabu, na vanua era duavata kina na lewenilotu ena vakabauta kei na masu, ka kerea vua na Kalou me vakalougatataki ira na tamata yadua era sa volai ena ituva ni masu.