![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F14%2F5c%2F145c96537a6ea0cc36dd436a36678f9fe4184e0f%2F145c96537a6ea0cc36dd436a36678f9fe4184e0f.jpeg/full/!250,/0/default)
Au Vakabauti Ira na Agilosi
Na Turaga e kila vakavinaka tu na ibolebole eso o sotava. E kilai iko o Koya, e lomani iko, kau yalataka, ena tala mai na agilosi eso o Koya me vukei iko.
Kemuni na taciqu kei na ganequ, au vakabauta ira na agilosi, kau vinakata meu wasea vei kemuni na veika au sotava vata kei ira. Niu vakayacora vakakina, au nuitaka ka masulaka nida na kila na kedra bibi na agilosi ki na noda bula.
Oqo na nona vosa o Elder Jeffrey R. Holland mai na dua na koniferedi sa oti: “Ia ni da tukuni ira era sa iyaya ni cakacaka ena liga ni Kalou, meda nanuma tiko ni o ira kece na agilosi era sega ni tadu mai na tai kadua ni ilati. Eso vei ira eda veivosaki ka lako vata tiko—eke, ena gauna oqo kei na veisiga. Eso vei ira eda vakaitikotiko veivolekati. … Sa dina sara ni lomalagi sa voleka tu ga ni da raica na loloma ni Kalou e matanataki mai na nodra loloma kei na yalodina na tamata era caka dodonu ka bula savasava tu ni ra sa vaka-agilosi sai koya ga na vosa au rawa ni nanuma rawa.” (“Nodra Veiqaravi na Agilosi,” Liaona, Nove. 2008, 30).
Au via vosa baleti ira na agilosi ena yasa ni ilati oqo. Na agilosi ka ra bula maliwai keda ena noda bula ni veisiga, era i vakananumi kaukauwa ni loloma ni Kalou vei keda.
Na imatai ni agilosi kau na via tukuna o ya e rua na ganequ daukaulotu, o Sister Vilma Molina kei Sister Ivonete Rivittiki rau a vavulica vei au na kosipeli niu a se cauravou gone. Keirau a sureti kei ganequ gone ki na dua na itavi qaravi ni Lotu, na vanua keirau sotavi rau kina na agilosi oqo. Au a sega vakadua ni nanuma ni dua na itavi qaravi rawarawa vakaoqo ena veisautaka na noqu bula.
Ko irau na noqu itubutubu kei iratou na taciqu eratou a sega ni malele me vulica e vuqa na ka me baleta na lotu ena gauna o ya. Eratou a sega madaga ni lomasoli merau tiko na daukaulotu e vale, kau mani tauri lesoni kina ena dua na vale ni Lotu. Na rumu lailai o ya e vale ni Lotu a yaco me noqu “veikau tabu.”
Au a papitaiso ni oti e dua na vula mai na gauna erau a vakavulica kina vei au na kosipeli ko irau na agilosi oqo. Au a yabaki 16 tiko kina. E ka ni rarawa, ni sega ni tiko vei au e dua na itaba ni veika a yaco oya, ia e tiko e dua na keirau itaba kei ganequ ena neirau a vakaitavi ena itaviqaravi. Ena gadrevi meu vakamatatataka se ko cei e tiko ena itaba oqo. O au ka balavu tiko e yasana imatau.
Me vaka o rawa ni vakasamataka, e a veibolei sara vua e dua na itabagone ka se qai veisau walega na nona ivakarau ni bula, ka sega ni duavata tiko na nona matavuvale ena sala vata oya, me tovolea me bulabula tiko ena Lotu.
Niu a tovolea tiko meu vakamatautaki au ki na noqu bula vou, dua na itovo vou, kei na itokani vou, au a vakila niu sega ni logaloga vinaka. Au vakila na galili kei na yalolailai ena vuqa na gauna. Au a kila ni Lotu e dina, ia sa dua na ka dredre meu vakila niu sa lewena. Ena dela ni logaloga ca kei na lomalomarua niu tovolea meu vakamatautaki au ki na noqu lotu vou, au a kunea na veivakayaloqaqataki meu vakaitavi ena dua na koniferedi ni itabagone siga tolu, ena vakanananu ni na vukei au meu kunea eso noqu itokani vou. Oqo na gauna au a sotava kina e dua tale na agilosi veivakabulai ka yacana o Mônica Brandão.
E se qai toki vou yani ki na vanua ko ya, ka toki mai na dua na tiki i Brazil. A totolo sara na nona dreta na noqu vakasama, a ka kalougata vei au, ni a ciqomi au meu dua nona itokani. Au nanuma ni a kauwaitaka vakalevu cake o koya noqu i vakarau, mai na kequ irairai.
Baleta ni keirau sa veitokani, au a vakaveikilaitaki vei ira nona itokani, ka ra yaco mera noqu itokani, ka keimami marautaka vata e vica na itaviqaravi ni itabagone kau a vakaitavi kina e muri. Na vei itaviqaravi oya era a tiki bibi sara ni noqu vakacurumi ki na itovo ni bula vou oqo.
O ira na itokani vinaka oqo era a vaka yaco-ka vakalevu, ia na kena sega ni rawa ni vakavulici e vale na kosipeli ni a sega ni veitokoni noqu matavuvale, e a biuta kina na noqu ivakarau ni saumaki ena dua na itutu sega ni dei. Na noqu vakaogai au ena kosipeli ena Lotu a yaco me tiki bibi ki na tubu ni noqu saumaki. E rau a qai talai tale mai e rua na agilosi mai vua na Turaga me veivuke.
E dua vei rau o Leda Vettori, na noqu qasenivuli ni semineri ka dau vakayacori ena mataka caca. Ena nona loloma veivakauqeti kei na kalasi veivakayarayarataki, e a vakani au e veisiga ena “vosa vinaka ni Kalou” (Moronai 6:4), kau a dau gadreva vakalevu e veisiga. Oqo a vukei au meu rawata na igu vakayalo meu toso tikoga kina ki liu.
E dua tale na agilosi ka talai mai me mai vukei au o Marco Antônio Fusco, na peresitedi ni Cauravou. E a lesi talega o koya me noqu itokani qase ni dauveituberi e vale. A lesi au meu veivakavulici ena neimami soqoni ni kuoramu ni bete kei na veisiko ni dauveituberi e vale, dina ni a lailai vei au na kila ka duatani tu na kequ irairai. A solia vei au na madigi meu cakacaka ka vuli ka sega ni sarasara wale tikoga ena kosipeli. A nuitaki au vakalevu cake o koya, mai na noqu nuitaki au vaka i au.
Au vakavinavinaka vakalevu vei ira na vei agilosi oqo, kei na vuqa tale au sotavi ira ena veigauna bibi mai liu, kau a ciqoma kina na igu e veirauti meu tikoga kina ena salatu ni veiyalayalati, kau rawata e dua na ivakadinadina vakayalo ni dina.
O ni se nanuma tiko, na agilosi goneyalewa o Mônica? Ni oti na neirau veiqaravi vaka daukaulotu, a qai yaco me watiqu.
Au sega ni nanuma ni vakacalaka mera tiki ni ituvatuva oya o ira na itokani vinaka, na vakaitavitaki ena Lotu, ka vakani ena vosa vinaka ni Kalou. E vakatavulica o Peresitedi Gordon B. Hinckley: “E sega ni ka rawarawa na kena vakayacori na veisau ena kena mai leweni na Lotu oqo. E kena ibalebale na kena tamusuki eso na isema makawa. E kena ibalebale ni ra biu tani eso na itokani. E rawa ni kena ibalebale na biu vakatikitiki ni so na vakabauta eda dau vakamareqeta. Ena gadrevi beka kina na veisau ni itovo ka vakuwai na veika eda dau taleitaka na kania. Ena vuqa na gauna e kena ibalebale na galili kei na rerevaki ni veika tawakilai. Sa dodonu me susugi ka vaqaqacotaki o koya e saumaki mai ena gauna dredre oqo ni nona bula” (“There Must Be Messengers,” Ensign, Oct. 1987, 5).
A qai vakuria e muri, “O ira vakayadua era gadreva e tolu na ka: dua na itokani, me vakaitavitaki, ka vakani ena ‘vosa vinaka ni Kalou’” (“Converts and Young Men,” Ensign, May 1997, 47).
Na cava na vuna au wasea vata tiko kina kei kemuni na veika oqo?
iMatai, me vakadewataka e dua na i tukutuku vei ira era lako curuma tiko na veika vata oqo ena gauna oqo. E rairai beka o iko e dua na saumaki vou, se luluqa tu ena lotu ena dua na gauna, se o dua ka sasaga tiko mo curu mai. Yalovinaka, yalovinaka, kakua ni guce ena nomu sasaga mo mai tiki ni vuvale levu oqo. Sai koya na Lotu dina i Jisu Karisito!
Ena vuku ni nomu marau kei na vakabulai, sa na dau yaga tu ga na igu mo sasaga tikoga. Ena yaga na igu o vakayagataka, mo veimoica kina na nomu ivakarau ni bula kei na itovo vakavanua. Na Turaga e kila vakavinaka tu na ibolebole eso o sotava. E kilai iko o Koya, e lomani iko, kau yalataka, ena tala mai na agilosi eso o Koya me vukei iko.
E cavuta vaka i Koya na iVakabula: “Niu na liu e matamudou. Au na tiko e yasamudou imatau ka tiko talega e yasamudou imawi, … ia na Yaloqu ena tiko e [lomamudou]; era na vakavolivoliti kemudou na noqu agilosi me ra laveti kemudou cake” (Vunau kei na Veiyalayalati 84:88).
Na ikarua ni inaki ni noqu wasea na veika sotavi oqo, o ya me vakadewataki e dua na i tukutuku ki veira kece na lewenilotu—kivei keda kece sara. E dodonu meda nanuma ni sega ni rawarawa vei ira na saumaki vou, itokani lesu mai, kei ira ka duatani na ivakarau ni nodra bula mera sema mai vakavinaka vakatotolo. Na Turaga e kila vakavinaka na veibolei era sotava, ka vakasaqara tiko o Koya na agilosi eso era lomasoli me veivuke. Na Turaga sa dau vakasaqarai ira era lomasoli yalorawarawa, mera agilosi kina nodra bula eso.
Taciqu kei na ganequ, o na yalorawarawa beka mo iyaya ni cakacaka ena liga ni Turaga? O na yalorawarawa beka mo dua vei ira na agilosi oqo? Mo dua na mata, talai mai vua na Kalou, ena yasa ni ilati oqo, vua e dua ka lomaleqataka o koya? O Koya e gadrevi iko. Era gadrevi iko.
Io, keitou nuitaki ira na noda daukaulotu. Era sa dau tu vakarau tu, mera imatai mera soli ira yani ki na cakacaka vaka-agilosi oqo. Ia era se lewe lalai ga.
Kevaka o veiraiyaki, o na kunea e vuqa sara era gadreva na nona veivuke e dua na agilosi. O ira na tamata oqo era na rairai sega beka ni daramaka tiko na sote vulavula, ivinivo, se isulu ka dau daramaki ga ena Sigatabu. Era na rawa ni dabe taudua tiko mai muri, e loma ni valenilotu se rumu ni vuli, ka so na gauna era vakasamataka ni ra sega tu ni laurai. Ena duatani tu beka na nodra ikotikoti se na nodra i vosavosa, ia era sa tiko rawa, ka ra sa sasaga tiko.
Eso ena taroga beka e lomadra: “O au beka e dodonu meu lako tikoga mai? E dodonu beka meu tovolea tikoga?” Eso tale ena taroga beka e lomadra se era na yaco me ciqomi ka lomani ena dua na siga. Era gadrevi na agilosi, ena gauna saraga oqo; o ira era sa lomasoli me ra biiuta mai na logaloga vinaka me ra mai duavata kei ira; “[o ira na tamata era] sa vinaka sara ka savasava ka vaka-agilosi saraga na vosa e lako mai na noqu vakasama meu [vakamacalataki ira kina]” (Jeffrey R. Holland, “The Ministry of Angels,” 30).
Kemuni na taciqu kei na ganequ lomani, au vakabauti ira na agilosi! Eda tiko kece eke ni kua, e dua na iwiliwili agilosi levu ka vakatikori ena vakataotioti ni veisiga vakaoqo, me veiqaravi vaka isema ni ligana na Dauniveibuli dauloloma vei ira na tani. Au yalataka ni kevaka eda yalovinaka meda veiqaravi, na Turaga ena solia vei keda na madigi eso meda agilosi dauveiqaravi. E kilai ira na gadreva na veivuke ni agilosi, ka na biuti ira o Koya ena noda sala. Na Turaga e biuti ira era gadreva na veivuke ni agilosi ena noda sala e veisiga.
Au vakavinavinakataka na levu ni agilosi ka biuta na Turaga ena sala ni noqu bula. Era a gadrevi. Au vakavinavinakataka talega na Nona kosipeli e vukei keda meda veisau ka solia vei keda na madigi meda vinaka cake.
Oqo e dua na kosipeli ni loloma, e dua na kosipeli ni veiqaravi. Au vakadinadinataka oqo ena yaca i Jisu Karisito, emeni.