Kerekere, Vakasaqara, kei na Tukituki
Dua na tiki bibi ni ituvatuva nei Tamada Vakalomalagi na madigi ni veitaratara vata kei Koya ena dua ga na gauna eda vinakata.
Va na vula sa oti, ena noqu vulica tiko na ivolanikalou, au wilika tiko baleta na kaulotu nei Alama i Amonaia ka’u digova na vakasama oqo ena Lako Mai, Mo Muri Au: “Ni o wilika na veivakalougatataki cecere a solia na Kalou vei ira na tamata i Nifai (raica na Alama 9:19–23), vakasamataka vakatitobu na veivakalougatataki cecere eso sa solia vei iko ko Koya.” 1 Au navuca meu vola ka lisitaka na kalougata kece sa solia vei au na Kalou ka katona ena noqu ivola vakarau ni tukutuku vakalivaliva. Ena vica ga na miniti, au sa tuva e 16 na veivakakalougatataki.
Ka bibi duadua vei ira oya na veivakaloutataki cecere ni loloma ni Vakabula kei na veisorovaki ena vukuqu. Au vola talega na veivakalougatataki ni’u matataka na iVakabula meu dua na daukaulotu gone i Potukali ka, imuri, vata kei na noqu itokani tawamudu, Patricia, ena Tabana ni Kaulotu i Brazil Porto Alegre South, neirau veiqaravi vata kei e 522 na daukaulotu kaukauwa ka totoka. Ni’u vosa tiko baleti Patricia, e levu na kalougata au katona na siga oya sa kalougata keirau marautaka vata ena neirau 40 na yabaki ni vakamau—oka kina neirau vauci vata ena Valetabu i Paulo Brazil, e tolu na luvei keirau totoka, ira na dui watidra, kei na 13 na makubui keirau.
Na noqu vakanananu e a vuki talega vei rau na noqu itubutubu valavala dodonu, ka susugi au cake ena ivakavuvuli ni kosipeli. A vakananumi vei au vakabibi, na gauna a tekiduru vata kina kei au na tinaqu dauloloma me keirau masu ena yasa ni noqu loga ni’u se yabaki 10. E vakila o koya ni kevaka me yaco vua na Tamada mai Lomalagi na noqu masu, e dodonu me vakavinakataki. Ka sa kaya o koya, “Au na masu matai, ka oti noqu masu, iko masu.” Sa mani tomana o koya na ivakarau oqo me vica na bogi, yacova ni sa yalodei o koya ni’u sa vulica ena vakavuvuli kei na vakatovotovo meu vosa vakacava vua na Tamada Vakalomalagi Au na dau vakavinavinakataki koya tikoga ena nona vakavulici au me’u masu, ni’u qai kila ni Tamaqu Vakalomalagi e dau rogoca na noqu masu ka sauma mai.
E dina, oya e dua tale na kalougata ka’u okata ki na noqu lisi—na isolisoli me’u rawa ni rogoca ka vulica na inaki ni Kalou. Dua na tiki bibi ni ituvatuva nei Tamada Vakalomalagi na madigi ni veitaratara vata kei Koya ena dua ga na gauna eda vinakata.
E dua na Veisureti mai vua na Turaga
Ni a veisiko i Amerika na iVakabula ni oti Nona Tucake tale, e tokarutaka e dua na veisureti o Koya ka a solia vei iratou na Nona tisaipeli e Kalili. A kaya o Koya:
Mo ni kerekere, ka na soli vei kemuni; dou vakasaqara, ka ko ni na kunea; mo ni tukituki, ka na dolavi vei kemuni.
“Ni sa rawata ko koya yadua sa kerekere; ka sa kunea ko koya sa vakasaqara; ka na dolavi vua sa tukituki” (3 Nifai 14:7–8; raica talega na Maciu 7:7–8).
Na noda parofita, o Peresitedi Russell M. Nelson, sa solia talega e dua na veisureti tautauvata ena noda gauna. A kaya o Koya: “Masu ena yaca i Jisu Karisito baleta nomu kauwai, nomu rere, nomu malumalumu—io, na gagano sara ga ni lomamu. Ka qai vakarorogo! Vola na veivakanananu e lako mai vei iko. Vola na veika o vakila ka muria ena cakacaka ko vakayarayarataki mo cakava. Ni ko taleva tiko na ikalawa oqo ena siga ki na siga, vula ki na vula, yabaki ki na yabaki, ko na ‘tubu ki na ivakavuvuli ni vakatakila.’” 2
A vakuria kina o Peresitedi Nelson, “Ia ena veisiga ka lako mai, ena sega ni rawa na bula tiko vakayalo ke sega na cakacaka veituberi, veidusimaki, ka veivakacegui ni Yalo Tabu.” 3
Na cava na vuna sa rui tiki bibi kina ni noda bula vakayalo na ivakatakila? Baleta ni rawa ni veilecayaki ka kosakosa o vuravura, vakasinaiti ena ivadi ca kei na veivakagolei tani. Na veivosaki vata kei na Tamada i Lomalagi e vukei keda meda tuva na veika dina kei na ka e lasu, na veika e yaga ki na ituvatuva ni Turaga me baleti keda kei na ka e sega. E rawa talega ni voravora ka rarawa na vuravura. Ia ni da sa dolava na yaloda ena masu, keda vakila na vakacegu ka gole mai vua na Tamada Vakalomalagi kei na veivakadeitaki ni lomani ka vakamareqeti keda o Koya.
Kerekere
Sa kaya na Kalou “ni sa rawata ko koya yadua sa kerekere.” Na kerekere e rairai rawarawa, ia e kaukauwa baleta ni vakatakila mai na noda gagadre kei na noda vakabauta. Ia, e taura na gauna kei na vosota me vulici mo kila na domo ni Kalou. Eda vakarorogo ki na veivakasama kei na veika vakilai e dau yaco mai ki na noda vakasama kei na yaloda, ka da vola, me vaka sa vakasalataki keda kina na noda parofita meda cakava Na katoni ni noda veivakauqeti e sa dua na tiki bibi ni rawata. E vukei keda meda nanuma lesu, raica lesu, kei na vakila tale na ka sa vakatavulici keda kina na Kalou.
Ena dua na gauna se qai oti wale toka ga oqo a kaya vei au e dua na daulomani, “Au vakabauta ni dina na ivakatakila yadua. Au vakabauta ni na vakaraitaka vei au na Yalo Tabu na veika kece meu cakava. 4 E rawarawa ni vakabauta ni’u vakila na katakata ni sarequ iloma ena yalodina sega ni vakatitiqataki. 5 Ia e na rawa vakacava ni vosa tiko vei au ena veigauna na Yalo Tabu e na ivakatagedegede oqo?”
Ki vei noqu daulomani kei kemuni kece, au na via tukuna ni’u vinakata talega me’u vakila ena veigauna kece na veivakauqeti kaukauwa ni Yalo ka dau raica vakamatata na sala me muri e veigauna kece. Ia e sega. Ia, na ka eda rawa ni vakila vakalevu cake oya na domo lailai ni Turaga vakasolokakana tiko ki na noda vakasama kei na yaloda: “Au sa tiko qo. Au lomani iko. Toso tiko; cakava na nomu vinaka taucoko. Au na tokoni iko.” E sega ni gadrevi meda kila taucoko se raica taucoko.
Na domo lailai e vinaka e veivakadeitaki, veitokoni, ka veivakacegui—kei na vuqa na gauna oqori na ka eda gadreva ena siga oya. Na Yalo Tabu e dina, kei na Nona veivakauqeti e dina—na veika lelevu kei na veika lalai.
Vakasaqara
Mai tomana na yalayala na Turaga, “ka sa kunea ko koya sa vakasaqara.” Na vakasaqara e vakaibalebaletaka na sasaga ni vakasama kei na vakayalo—vakasama titobu, vakatovotovo, sasaga eso, kei na vuli. Eda vakasaqara baleta ni da nuitaka na veiyalayalati ni Turaga. “O koya sa torova na Kalou e dodonu me vakabauta ni sa bula ko koya, ni sa saumi ira talega era sa dau vakasaqarai koya” (Iperiu 11:6). Ni da vakasaqara, eda sa kila ena yalomalua ni se levu tikoga na ka meda na vulica, ka na vakarabailevutaka na Turaga na noda vakasama, ka vakarautaki keda me da ciqoma e levu cake tale na ka. Ia raica, sa kaya vakaoqo na Turaga na Kalou: Au na solia vei ira na luve ni tamata na vosa ena vosa, na ivunau ena ivunau, vakalailai eke ka vakalailai e kea; … ia kivei koya sa ciqoma au na solia vakalevu cake vua” (2 Nifai 28:30).
Tukituki
Kena itinitini a kaya na Kalou, “ka na dolavi vua sa tukituki.” Mo tukituki sai koya mo cakacakataka ena vakabauta. Ni bulabula noda muri Koya, ena dolava vei keda na Kalou na sala. E dua na serenilotu totoka e vakavulici keda meda “yadra ka veivuke mai na noda tikina sa tu. Na caka vinaka sa vuni reki dina, tavi dina ni loloma.” 6 E a vakamacalataka wale tikoga oqo o Elder Gerrit W. Gong ena Kuoramu ni iApositolo Le Tinikarua ni ivakatakila e dau yaco mai ni da caka vinaka tiko. E kaya o koya: “Ni da tovolea me da dodoliga yani ena veiqaravi vei ira era tu wavoliti keda, au vakabauta na Turaga e na solia vei keda e dua tale na ivakarau ni Nona loloma vei ira ka vakakina vei keda. Au vakabauta ni da rogoca na Domona—eda vakilai Koya ena duatani na sala—ni da masu me da vukei ira era tu wavoliti keda baleta oqori e dua na masu e dau vinakata vakalevu me sauma o Koya.” 7
iVakaraitaki ni Alama
Na vakatutu rawarawa oqori ena Mo Lako Mai, Mo Muri Au me’u vakasamataka na noqu veivakalougatataki a kauta mai e dua na yalo kamica kei so na rai vakayalo sega ni namaki. Ni’u tomana noqu wiliwili baleti Alama kei na nona veiqaravi vakalotu i Amonaia, au kunea ni vakarautaka e dua na ivakaraitaki vinaka o Alama ni kena ibalebale mo kerekere, vakasaqara, ka tukituki. Eda wilika “Ia oqo sa kaukauwa sara na nona cakacaka vakayalo ko Alama, sa veimulomulo kei na Kalou ka masuta vagumatua, me sovaraka na Yalona vei ira na tamata ena koro.” Na masu oya, ia, a sega ni saumi e na sala a nuitaka o koya, ka mani vakasavi tani o Alama mai na koro. Ni “sa bikai koya na yaluma,” sa voleka me vakarau soro o Alama, qai solia vua e dua na itukutuku na agilosi: “Ko sa kalougata ko iko, Alama; o koya mo laveta cake kina na ulumu ka marau.” Tukuna vua na agilosi me lesu tale i Amonaia ka tovolea tale, ka “lesu kusarawa” o Alama. 8
Na cava eda vulica mai vei Alama baleta na kerekere, vakasaqara, kei na tukituki? Eda vulica ni gadreva na cakacaka vakayalo na masu, ka sega ni dau veimuataki ga ki na kena icavacava eda vakanuinui kina. Ia ni da yalolailai se bikai ena yaluma, ena solia vei keda na Turaga na vakacegu kei na kaukauwa ena sala e duidui eso. Ena sega beka ni sauma kece na noda taro se walia saraga qo na noda leqa kece; ia, sa vakayaloqaqataki keda o Koya meda tovolea tikoga. Kevaka eda muataka vakatotolo na noda ituvatuva ki na Nona ituvatuva, ena dolava o Koya na sala vei keda, me vaka a vakayacora o Koya vei Alama.
Sa noqu ivakadinadina ni oqo na itabagauna ni taucoko ni kosipeli. Eda rawa ni marautaka na veivakalougatataki ni Veisorovaki ni Jisu Karisito ena noda bula. E tu oqo vei keda na ivolanikalou. Eda liutaki mai vei ira na parofita ka dau vakavulica vei keda na lewa ni Turaga ena veigauna dredre eda bula tiko kina. Kena ikuri, sa rawa meda ciqoma vakadodonu na noda ivakatakila me rawa kina ni vakacegui keda vakayadua na Turaga. Me vaka na ka sa kaya na agilosi vei Alama, e sa “kilikili mo marau.”Alama 8:15). Ena yacai Jisu Karisito, emeni.