E Dua na iVakarau Tudei Vou
Au sureti kemuni mo ni vakalevutaka cake na nomuni vagoleya na yalomuni, nomuni vakasama, kei na lomamuni vua na Tamada Vakalomalagi kei na Luvena o Jisu Karisito.
Kemuni na taciqu kei na ganequ lomani, sa lagilagi dina na rua na siga ni koniferedi oqo. Au duavata kei Elder Jeffrey R. Holland. Me vaka ni a tukuna, na itukutuku, na masu, kei na sereivakatagi e sa vakauqeti mai vua na Turaga. Au vakavinavinaka vakalevu vei ira era sa vakaitavi ena sala cava ga.
Ena loma taucoko ni soqoni, au raitayaloyalotaki kemuni tiko ena noqu vakasama ni ko ni vakarorogo tiko ena koniferedi. Au sa kerea na Turaga me vukei au meu kila na veika o ni vakananuma voli, veika o ni leqataka tiko, se o ni tovolea tiko mo ni walia. Au sa vakataroga voli se cava e rawa niu tukuna, kau kila ni vinakata na Turaga mo ni vakila meu tinia kina na koniferedi oqo, me na vakasukai kemuni yani kina ena vakanuinui kei na yalodei ki na veisiga ni mataka.
Eda bula donumaka e dua na itabagauna lagilagi, era a sa raica rawa tu mai na parofita ni veisenijiuri. Oqo na itabagauna ena sega kina ni dua na veivakalougatataki vakayalo me bureitaki vei ira na buladodonu. 1 E dina ni tu na drakidrakita ni vuravura, 2 ena raica na Turaga me da “vakanamata ki na veisiga ni mataka ena yaloreki ni nanamaki.” 3 Me kakua ni bikai keda tu na vakanananu ni veisiga ena noa. Sa toso tikoga ki liu na vakasokumuni kei Isireli. Na Turaga o Jisu Karisio e dusimaka tu na cicivaki ni Nona Lotu, ka na rawata na kena inaki vakalou.
Na bolebole vei iko kei au me daru vakadeitaka me daru rawata na kedaru inaki vakalou. Nikua eda sa dau rogoca wasoma me baleta “e dua na ivakarau tudei vou.” Kevaka o vinakata dina mo rawata e dua na ivakarau tudei vou, Au sureti kemuni mo ni vakalevutaka cake na nomuni vagoleya na yalomuni, nomuni vakasama, kei na lomamuni vua na Tamada Vakalomalagi kei na Luvena o Jisu Karisito. Oqori me nomuni ivakarau tudei vou.
Tugana sara na nomu ivakarau tudei vou ena nomu veivutuni e veisiga. Segata mo savasava vakalevu cake tikoga ena nomu vakanananu, nomu vosa, kei na ivalavala. Veiqaravi vei ira na tani Dau raica ga na veika e tawamudu. Vakalevulevuya na nomu veikacivi. Na cava ga na nomu bolebole, kemuni na taciqu kei na ganequ, bulataka na veisiga yadua me rawa kina ni o vakarautaki iko vakavinaka mo sota vata kei na nomu Dauveibuli. 4
Oqori na vuna e tu kina na noda veivaletabu. Na nona cakacaka vakalotu kei na veiyalayalati na Turaga e vakarautaki keda ki na bula tawamudu, ka cecere duadua ena nona veivakalougatataki kece na Kalou. 5 Me vaka ko ni sa kila, ena vuku ni matetaka na COVID a gadrevi kina me ra sogo mada vakawawa na noda veivaletabu. Oti eda qai tekivuna na kena dolavi tale tuvai vakamatau vakaitagede. Ena gauna oqo e vuqa sara na valetabu era sa veiqaravi tiko ena ika 2 ni iTagede, e udolu vakaudolu na veiwatini era sa vauci, ka udolu era sa ciqoma na nodra dui edaumeni ena loma ga ni vica na vula sa oti. Eda sa namaka tiko na siga sa na rawa tale kina vei ira na lewe ni Lotu bula kilikili me ra veiqaravi tale ena vukudra na tubudra ka sokalou ena dua na valetabu vakalou.
Ena gauna oqo sa ka marautaki meu kacivaka yani ni sa tuvai tiko me tara e ono na valetabu vou ena veivanua oqo: Tarawa, Kiribati; Port Vila, Vanuatu; Lindon, Utah; Greater Guatemala City, Guatemala; São Paulo East, Brazil; kei Santa Cruz, Bolivia.
Ni da tara ka qarava tiko na veivaletabu oqo, sa neimami masu mo ni na tarai kemuni ka qaravi kemuni me rawa kina ni ko ni kilikili tu mo ni curuma na valetabu vakalou.
Oqo, kemuni na taciqu kei na ganequ lomani, au vakalougatataki kemuni mo ni vakasinaiti ena vakacegu ni Turaga ko Jisu Karisito. Na Nona vakacegu e uasivia na kilaka kecega vakatamata. 6 Au vakalougatataki kemuni me vakalevutaki cake na nomuni gagadre kei na kaukauwa mo ni talairawarawa ki na lawa ni Kalou. Au yalataka ni ko ni vakayacora vakakina, ena vakatauci vei kemuni na veivakalougatataki, oka kina na yaloqaqa e cecere cake, ivakatakila yadua e vakalevutaki cake, na veilomani kamica ena nomuni veivale, kei na reki, ena loma sara mada ga ni veilecayaki.
Me da toso vata ki liu me da rawata na noda ilesilesi vakalou—sai koya me da vakarautaki keda kei na vuravura me baleta na iKarua ni Nona Lako Mai na Turaga. Au masuta me vakakina, kei na noqu vakaraitaka na loloma vei kemuni, ena yaca tabu i Jisu Karisito, emeni.