iTukutuku me baleta na Soqo ni Valetabu
Eratou a solia mai na Mataveiliutaki Taumada na itukutuku oqo enai ka 20 ni Jiulai, 2020, me baleta na veisau eso ki na soqoni ni edaumeni ni valetabu:
“Na ivakavuvuli tabu, yalayala, kei na veisoqoni ni valetabu era sa ivakatekivu makawa, ka dusimaki ira na luve ni Kalou ki Vua ena nodra cakava na veiyalayalati ka vulica e levu tale na ka me baleta na Nona ituvatuva, oka kina na itavi ni iVakabula o Jisu Karisito.
“Mai na veivakauqeti, na ivakarau ni veidusimaki ena cakacaka ni valetabu sa veisau oti vakavuqa, ena itukutuku taumada, me vukei ira na lewenilotu me ra kila vakavinaka cake ka bulataka na veika era vulica ena valetabu.
“Tiki ni veika e sotavi ena valetabu e oka kina na kena vakayacori na veiyalayalati tabu, se yalayala, vua na Kalou. E vuqa na tamata era sa kila tu na ivakatakarakara ni cakacaka ka salavata kei na vakayacori ni veiyalayalati vakalotu (me vaka na masu, na tabadromuci ni dua na tamata ena papitaiso, se na veitauri liga ena dua na soqoni ni vakamau). Na ivakatakarakara ni cakacaka tautauvata ka rawarawa e salavata kei na vakayacori ni veiyalayalati ni valetabu.
“Ena veikauwaitaki me baleti keda kece kei na gagadre me laveti cake na vuli ni veika sotavi ena valetabu, sa vakadonui kina na veisau wale ga oqo ki na soqoni ni edaumeni ni valetabu. Ni sa bibi sara na soqoni eso ni valetabu, keitou sa kerei ira na lewenilotu kei na itokani me ra kakua ni vakaitavi ena vakanananu vakatani se veivosaki raraba me baleta na veisau oqo. Ia, keitou sa sureti ira na lewe ni Lotu me ra vakanamata tikoga ki na siga era na lesu mai kina ka laki vakaitavi vakataucoko ena cakacaka tabu ni valetabu ena masumasu kei na vakavinavinaka.”