Vakasaqarai Karisito ena Vakasama Taucoko
Na valuti ni veitemaki e taura na gauna ni bula taucoko ni gugumatua kei na yalodina. Ia yalovinaka mo kila ni Turaga e tu vakarau me vukei iko.
Ena nona serenilotu serekali ni vakacaucau, a kaya o Daunisame:
“I Jiova, ko ni sa dikevi au, ka kilai au.
“O ni sa kila na noqu tiko sobu kei na noqu tu cake, o ni sa kila na nanuma ni lomaqu ni sa yawa tiko.
“O ni sa vakatovolea na noqui ilakolako kei na noqui ikotokoto, a sa kila deivaka na noqui valavala kecega.” 1
Ena serekali veidonui vakatauvata oqo, a vakacaucautaka o Daunisame na ivakarau vakalou i Jisu Karisito ni sa kila na ka kecega baleta ni kila vakaidina na ituvaki ni yaloda yadua. 2 Ni sa kila na veika kece e ganiti keda ena bula oqo, sa sureti keda na iVakabula meda vakasaqarai Koya ena noda vakasama kecega ka muri Koya ena yaloda taucoko. 3 Sa solia oqo vei keda ni da rawa ni lako ena Nona rarama ka yaco na Nona veidusimaki me tarova na veiuqeti ni butobuto ena noda bula. 4
Na Vakasaqarai Karisito ena vakasama kecega ka muri Koya ena yaloda taucoko e gadrevi kina meda sa vakanananu ka gagadre vata kei Koya. 5 Na ivolanikalou e vakatoka na lomavata oqo me “tudei[tiko] vua na Turaga.” 6 Na cakacaka oqo sa tukuna tiko meda sa vakaivalavala tikoga ena duabau tiko ena kosipeli i Karisito ka raimatua tiko e veisiga ena veika vinaka kecega. 7 . Sa qai rawa kina meda rawata “na vakacegu ni Kalou, sa uasivia na ka kecega e kilai rawa” ka na “vakataudeitaka na [yaloda] kei na [lomada] ena vuku i Karisito Jisu.” 8 Na iVakabula Vakaikoya a vakasalataki ira na qase ni Lotu ena Feperueri 1831: “Mo dou tugana sara ki lomamudou na veika oqo, ia mo dou nanuma tiko ga e lomamudou na veika lagilagi ni gauna tawamudu.” 9
Dina ga ni da saga tikoga meda vakasaqara na Turaga, na vakasama ca e rawa ga ni curuma na noda vakasama. Ni vakatarai na vakasama vakaoqori ka sureti me tiko, sa rawa mera moica na gagadre ni lomada ka muataki keda ki na ituvaki eda na vakataka ena bula oqo ka yaco sara ki na ka eda na laki taukena ena veigauna tawamudu. 10 A vakamacalataka o Elder Neal A. Maxwell na ivakavuvuli oqo ena nona kaya, “Na gagadre … sa vakadeitaka talega na kena macala, oka kina na vuna ‘sa lewe vuqa era sa kacivi, ka lewe lailai era sa digitaki.’” 11
Era sa dau tukuna tikoga vei keda o ira na parofita mai liu kei na gauna nikua meda vorata na veitemaki me rawa me kua ni yali na noda qaqaco vakayalo ka veilecayaki, tu vakatani, ka lawakitaki ena bula oqo.
Vakaibalebale, ni da sorovi keda ki na veitemaki sa vaka ni torovi na meqeneti vua na iyaya kaukamea. Na kaukauwa vuni ni meqeneti e temaka na tiki ni kaukamea ka dreta matua tu. Ena yali na kaukauwa ni meqeneti o ya ke na vakayawa mai vua na tiki ni kaukamea o ya. O koya gona, ni sega ni rawa vua na meqeneti me yacova yani na kaukauwa vua na tiki ni kaukamea tu vakayawa, ni da vorata na veitemaki, ena takali yani ka sega na nodra kaukauwa ena noda vakasama kei na yaloda, ka vakakina, ena noda itovo.
Ena vakatautauvata oqo e vakavotuya kina e dua na ka a wasea vei au e dua na lewenilotu yalodina ena Lotu ena dua na gauna sa oti. Na lewenilotu oqo a kaya vei au ni gauna a yadra mai kina ena dua na mataka, mani curu mai e dua na vakasama vakasisila se bera vakadua ni bau vakasamataka ki lomana. E dina ga ni kidava mai vakasauri, a valuta lesu ena sekodi o ya, ka kaya lo e lomana kei na vakasama o ya,“Sega!” ka sosomitaka ena ka vinaka me vagolea laivi mai lomana na vakasama vakatani o ya. A kaya vei au ni nona lewa matua na nona galala ni digidigi, na vakasama druka vakatani o ya a yali yani vakasauri.
Ena gauna sa kaci kina o Moronai vei ira era sega ni vakabauti Karisito mera veivutuni, a kerei ira mera lako vua na iVakabula ena yalodra taucoko, ka biuta laivi na veika tawasavasava taucoko. Vakalevu cake, a vakasalataki ira o Moronai mera kerea vua na Kalou, vakagumatua tawavoroki rawa, mera na kakua ni lutu ki na veitemaki. 12 Ni bulataki na ivakavuvuli oqo ena noda bula ena gadrevi vakalevu cake mai na noda kilai ira wale tu ga ia meda veisautaka na noda vakasama kei na yaloda ki na ivakavuvuli vakalou oqo. Na veisau vakaoqo e gadarevi kina meda sasaga tikoga vakai keda yadua, me ikuri ni vakararavi vua na iVakabula, baleta na noda luluqa vakatani ena sega ni yali ga vakai ira. Na valuti ni veitemaki e taura na gauna ni bula taucoko ni gugumatua kei na yalodina. Ia yalovinaka mo kila tiko ni Turaga sa tu vakarau me vukei keda ena noda sasaga yadudua ka yalataka na veivakalougatataki totoka ke da vosota ki na ivakataotioti.
Ena dua na gauna ni dredre ni tiko vakavesu o Josefa Simici kei na nona ilawalawa ena Valeniveivesu e Liberty a sega na galala vakavo ga ena nodratou vakasama, ka veivuke na Turaga ena vakarautaki ni ivakasala kei na yalayala vei iratou me sa noda talega nikua.
“Ia me vakasinaiti na lomamuni ena loloma uasivi vei ira na tamata kecega, kei ira era sa veitokani ena vakabauta, me vakaiukuukutaki tiko ga na nomudou vakanananu ena ivalavala savasava; ia ena vakaukauwataki kina na nomu vakabauta ena mata ni Kalou; …
“Ena sala vata voli ga kei iko na Yalo Tabu, ia na nomu ititoko sa ititoko ni yalododonu kei na dina sa tudei sara.” 13
Ni caka oqo, na vakasama vakalou ena tiko tudei ga ena noda vakasama kei na gagadre savasava ena liutaki keda ki na ivalavala dodonu.
Sa vakavotuya talega o Moronai vei ira na nona tamata mera kakua ni dromuci ena nodra gagano vakatani. 14 Na vosa gagano vakatani e tukuna tiko na domona kaukauwa ka gadreva tawakilikii e dua na ka. 15 . E ovici tu kina na vakasama butobuto se gagadre tawakilikili e vakavuna vua e dua me raica ga na itovo kocokoco se iyau vakavuravura ka sega ni caka vinaka, yalololoma, muria na ivakaro ni Kalou, kei na veika tale eso. Sa dau vatakilai ga ena yalo sa dau vakavuravura. A vakatakila o Paula na iApositolo eso na yalo vakaoqo me vaka na “tawasavasava, daugarogaro, … dauveicati, … daucudrucudru, dauveiba, … dauvuvu, … kei na so tale.” 16 Mai na ituvaki vakatani kece ni gagano butobuto, meda kakua ni guilecava ni o meca e vakayagataka oqo me nona yaragi vuni me valuti keda me temaki keda meda caka cala kina.
Kemuni na taciqu kei na ganequ lomani, au vakadinadinataka ni gauna eda vakararavi kina ena vatu ni veivakabulai, na iVakabula ni yaloda, ka muria na ivakasala nei Moronai, ena torocake na noda rawa ni lewa vinaka na noda vakasama. Au sa vakadeitaka vei kemuni na noda ka vakayalo ena tubu vakatotolo sara, veisautaka na lomada, ka yaco meda vakataki Jisu Karisito cake. Me ikuri, na veiuqeti ni Yalo Tabu ena kaukauwa sara ka tomani tikoga ena noda bula. Sa yaco kina na veitemaki nei vunimeca, vakalalai tikoga, ena yali nodra kaukauwa mai vei keda, ka yaco na bula me marautaki ka savasava ka vakatabui sara.
Kivei ira era, ena vuna cava ga, lutu ki na veitemaki ka ra sa bulataka tiko na cakacaka butobuto, au vakadeitaka vei kemuni ni tiko e dua na ilesulesu, ni tiko na inuinui vei Karisito. Ena vica na yabaki sa oti, au a sikova e dua na yalodina ni Lotu i Jisu Karisito ni Yalododonu Edaidai a curuma tiko e dua na gauna dredre ena nona bula ni cakava oti e dua na cala bibi. Na imatai ni gauna au raici koya kina, au raica na rarawa ena yaloka ni matana, kei na dua na rarama ni inuinui ena kena irairai. Na kena irairai mada ga e tukuna tiko e dua na yalomalua kei na yalo e sa veisau. E a dua a bulataka dina na bula Vakarisito ka a vakalougatataki vakalevu mai vua na Turaga. Ia, a vakatara e dua na vakasama vakatani lailai sara me curuma ena nona vakasama, ka mua oqo ki na kena tale eso. Ena levu ga ni nona sorovi koya ki na veivakasama oqo, a totolo sara na kena sa titobu ena nona vakasama ka tekivu me tubu sara e lomana. A yaco sara me sa cakava na gagadre tawakilikili oqo, ka muataki koya sara me saqata na veika kece a vakamareqeti ena nona bula. A kaya vei au ke a sega ni soli koya ki na vakasama lialia taumada o ya, a sega ni mai vakalolomataki sara vakaoqo ka rawai ena veitemaki nei vunimeca—na veitemaki a kauta mai e vuqa na rarawa ki na nona bula, ena dua na gauna.
A kalougata, me vakataka na gone cidroi ena italanoa vakaibalebale kilai levu ena kosipeli nei Luke, “a qai kilai yalona” ka yadra mai na moce ca o ya. 17 A vakavouya na nona vakararavi vua na Turaga ka vakila na qaqaco dina ka sa gadreva sara me lesu ki na lotu ni Turaga. Ena siga o ya keirau a vakila ruarua vei keirau na loloma veivueti ni iVakabula. Ni oti na neirau veisikovi lekaleka, keirau a luluvu sara, ka yacova mai nikua, au se nanuma tikoga na totoka ni reki ni kena irairai ni sa biuta yani na noqu valenivolavola.
Kemuni noqu itokani lomani, ni da vorata na veitemaki lalai, e dau yaco mai vakasauri ki na noda bula, eda na taqomaki vinaka cake ena kena tarovi na cala bibi sara. A kaya kina o Peresitedi Spencer W. Kimball: “E sega ni vakavuqa me dua e curuma na cala bibi vakavo ga ke a soli koya e liu ki na cala lalai, ni a dolavi na katuba ki na ka levu. … ‘Na were savasava [e sega] ni vakasauri ga [me sa] tubua.’” 18
Ni vakarau tiko me vakayacora na Nona ilesilesi vakalou e vuravura, a vakamatatataka na iVakabula o Jisu Karisito na bibi ni tudei tiko ena vorati na ka kecega e rawa ni uqeta laivi na yaloda mai na inaki tawamudu. Ni oti e vica na ravuravu druka nei vunimeca, ena nona saga me vagolei Koya tani mai na Nona ilesilesi, a vakaroti koya vakadodonu na iVakabula ena nona kaya: “Mo lako tani, Setani. … Sa qai biuti koya na tevoro, ka raica, sa lako mai eso na agilosi ka qaravi koya” 19
Kemuni na taciqu kei na ganequ, rawa beka ni ko vakasamataka na ka ena yaco kevaka meda na kaukauwa ka yaloqaqa mai vua na iVakabula ka kaya “Sega” ka “Mo lako tani” ki na imatai ni vakasama tawakilikili era yaco mai ki na noda vakasama? Na cava beka ena revurevu ni gagadre ni lomada? Ena yaco vakacava na revurevu ni noda itovo me da voleka tikoga kina vua na iVakabula ka vakatara na veivakauqeti ni Yalo Tabu ena noda bula? Au kila ni da cakava oqo,nona vakaraitaki lo Jisu eda na tarova kina e vuqa na leqa kei na itovo butobuto e rawa ni vakavuna na leqa ni vuvale kei na duidui, yalo luluqa kei na druka, lewa cala kei na veivakacacani, vakabobulataki ena vakatotogani tu ena cala, kei na veika tale eso e saqata na ivakaro ni Turaga.
Ena nona itukutuku vakairogorogo ka veiuqeti ena Epereli ni yabaki oqo, na noda parofita lomani, o Peresitedi Russell M. Nelson, a yalataka ni o ira kece era sa lomadra mera “rogoci Koya” ka muria na Nona ivakaro “era na kune kalougata ena kaukauwa sa vakuri mera valuta na veitemaki, dredre, kei na malumalumu.” ka gumatua rawa meda vakila na reki ena tubu cake, ena gauna mada ga ni veika dredre sa tubu cake tiko ga. 20
Au vakadinadinataka vei kemuni ni yalayala a solia mai na noda parofita lomani sa yalayala sa solia mai na iVakabula Vakaikoya. Au sa sureti keda kece meda “rogoci Koya” ena vakasama yadua ka muri Koya ena yaloda taucoko meda taura kina na kaukauwa kei na yaloqaqa meda kaya “Sega” ka “Mo lako tani” ki na veika kecega e rawa ni kauta mai na yalorarawa ki na noda bula. Ke da cakava oqo, au yalataka ni Turaga ena tala mai na Nona Yalo Tabu me vaqaqacotaka ka vakacegui keda ka yaco meda tamata sa muria na yalo ni Turaga. 21
Au vakadinadinataka ni bula tiko o Jisu Karisito baleti Koya, eda na vakadruka na veivakauqeti butobuto nei vunimeca ka rawa meda bula tawamudu vata kei na Turaga ena itikotiko nei Tamada Vakalomalagi lomani. Au sa vakadinadinataka na dina oqo ena noqu loloma taucoko vei kemuni kei na noda iVakabula totoka, na yacana au sa vakalagilagia, doka, ka vakacaucautaka vakalevu. Au sa cavuta na veika oqo ena yaca tabu i Jisu Karisito, emeni.