Digital Lamang
Mga Leksiyon nga Akong Nakat-onan gikan sa Pagboluntaryo didto sa usa ka Kampo sa mga Bakwit [Refugee]
Ang tagsulat nagpuyo sa Utah, USA.
Nagserbisyo ko sa kinadak-an nga kampo sa mga bakwit didto sa Greece, ug usa kadto ka makapausab sa kinabuhi nga kasinatian.
Niadtong Nobyembre 2015, gikan sa akong komportabling higdaanan, mitan-aw ko og video mahitungod sa grabe nga krisis sa mga bakwit nga nahitabo sa Greece. Sa dihang nahuman na ang video, ang akong kasingkasing mibati nga daw mobuto sa akong dughan. Nasayod ko unsa ka pamilyar kana nga pagbati. Nakadawat ko og pag-aghat, ug unya paglabay sa pipila ka semana, akong nabantayan ang kaugalingon nga misulod ngadto sa makahadlok nga kinadak-an nga kampo sa mga bakwit sa isla sa Lesbos.
Samtang si Elder Patrick Kearon sa Korum sa Seventy miingon sa kinatibuk-ang komperensiya, “Ang reyalidad niining mga sitwasyon kinahanglang makita aron matuohan.”1
Ako makapamatuod nga kini tinuod.
Human ako makasaksi sa dili katuohan nga mga kahimtang ug sa pagkahibalo kon unsa kapeligro kadto alang sa mga bakwit sa kampo bisan gani sa pag-abot lang didto nga buhi, nangutana ko sa Syrian nga tawo nganong mirisgo siya og maayo sa pag-adto didto. Ang iyang tubag mitapos sa akong inosenting kalibog:
“Mahimong magpabilin kami ug mamatay, o moadto ug tingali mamatay.”
Ang akong panahon didto sa kampo sa mga bakwit sa Moria mao ang usa sa labing lisod nga mga kasinatian sa akong kinabuhi, apan kini nahimo usab dayon nga labing makapadasig. Sa sinugdanan wala ko maghunahuna nga ang gagmayng mga buluhaton nga gihatag kanako makahimo og kalainan alang ni bisan kinsa, apan ako mismo nakasinati sa tinuod, dili malalis nga gahom gayod sa gugma.
Ang Impluwensiya sa Gugma
Usa ka hapon nakig-istorya ko ni Ebrahim, usa ka bag-ong higala gikan sa Iran. Gusto siyang masayod kon pila ang akong sweldo sa pagtabang sa kampo. Mipahiyom ko ug misulti kang Ebrahim nga usa ako ka boluntaryo. Wala pa siya nakadungog niini nga pulong busa akong gipasabot. Nakalitan siya ug dayon nangutana kon pila ang gikita nga kwarta sa akong team lider. Mikatawa ko ug misulti kaniya nga ang tanan niana nga kampo boluntaryo.
Tingali daling mikatap ang balita tungod kay nagkadaghan ang nagkomentaryo kabahin niini, nagsulti kon unsa ka dako sa ilang kahibulong nga kami mitabang kanila nga walay nadawat nga balos. Wala pa gayod sila nakakita og bisan unsang butang sama niini.
Human sa makalilisang, dili tawhanon nga mga paagi sa pagtratar kanila, dili sila mabasol nga maghunahuna nga wala nay makatabang nila—ilabi na ang mga langyaw. Daghan ang misulti nako nga wala silay ideya kon unsay mahitabo nila sa higayon nga sila moabot ngadto sa kayutaan sa Uropa. Pagkadakong sorpresa gayod niini nga gihangop gikan sa dagkong balod sa kadagatan ngadto sa bukas, maamumahon nga mga bukton ug mga habol nga pang-emerhensiya.
Sa wala madugay human niining panag-istoryahanay mahitungod kanamo nga mga boluntaryo misugod sa pagkatap sa kampo nga akong nabatyagan ang makapaikag kaayo nga butang. Ang mga bakwit misugod sa pagtabang kanako sa akong mga buluhaton! Misugod sila sa pagpamunit sa mga basura. Mihangyo sila kon mahimo ba silang makatabang sa pagkutaw og mga painit ug mosilbi niini sa tibuok gabii nga tugnaw kaayo. Mitabang sila sa pagpamilo, paglain, ug pagpang-apud-apod sa mga gidonar nga mga sinena ug sa pagpabarog ug pahipos sa mga tolda. Ug sa akong katingala, sa kataposan sa akong pagserbisyo, hapit walay nay trabahoon nga nahabilin nga akong buhatunon.
Sa higayon moalsa ko og bug-at nga sudlanan sa tubig adunay usa ka tawo nga motanyag sa pagdala niini alang kanako. Sa higayon manghugas ko og plato dunay mga bakwit nga malipayong mosulti nako nga sila na ang mohimo niini. Ug hasta ang pag-abli sa bag sa basura ang usa ka pundok sa mga batang lalaki magdali sa pagtabang, ang tanang mga bakwit hapit na mohunong sa paglabay sa ilang basura diha sa yuta!
Ang mga kausaban nga akong nasaksihan sulod sa kampo dili ikalimod.
Sa dihang miabot ang subo nga adlaw nga kinahanglan na ko nga mobiya sa mga tawo nga nakat-onan nako sa pagpangga og maayo, usa ka tawo nakamay-ong nako didto sa barko. Miduol siya sa pagpasalamat nako sa unsay akong nahimo, sa dihang nakita niya nga naggunit ko og usa ka baratohon nga tiket sa pagsakay. Miinsister siya nga ilisan ang akong baratohon nga tiket sa iyang primera klase alang sa taas nga 14 oras nga biyahe. Misulti siya nako nga ang pagkakita og ehemplo sa usa ka boluntaryo nakapausab kaniya. Gusto usab niya nga motabang og laing tawo, ug ang pag-ilis sa iyang tiket mao ang labing maayo nga iyang mahimo karon.
“Palihog,” mihangyo siya. “Palihog.”
Milugmaw ang mga luha sa akong mga mata samtang nakasaksi na usab ako sa epekto nga resulta sa tinuod nga pagserbisyo ug gugma.
Inosente kaayo ko nga naghunahuna nga ang gamayng mga tasa sa tsa nga akong gisilbi wala makahimo og kalainan alang ni bisan kinsang tawo.
Nagkinahanglan Kita sa Usag Usa
Salamat niining kasinatian, nakaamgo ko nga kining mga tawhana tinuod gayod nga nagkinahanglan kanato. Nagkinahanglan sila sa atong panahon, nagkinahanglan sila sa atong mga donasyon, nagkinahanglan sila sa atong gugma, ug nagkinahanglan sila sa atong ehemplo. Ug kita nagkinahanglan usab kanila.
Pagkanindot nga kalibotan unta kini kon imbis mosalikway o mobiya kanila sa pagnabigar sa ilang bag-ong mga kahimtang nga mag-inusara, kita makahangop kanila sama sa buhaton sa atong Manluluwas—magpakita kanila og gugma, pagkahisakop ug pasalamat, ug motisok diha kanila og tinguha sa pagserbisyo sa uban kon sila makahimo sa ilang mga kaugalingon.
Uban sa nagpadayong krisis sa mga bakwit sa tibuok kalibotan ug sa nagkalain-laing pagtuo mahitungod kon unsaon sa pagdala kanila, kanunay kong mahinumdom sa baroganan diha sa Mosiah 4:19: “Kay tan-awa, dili ba kitang tanan makililimos? Kitang tanan wala ba magsalig diha sa sama nga Binuhat, ang Dios, sa tanan nga kabtangan diin kita aduna, alang sa pagkaon ug panap[o]t, ug alang sa bulawan, ug alang sa pilak, ug alang sa tanan nga mga katigay[o]nan nga kita aduna sa matag matang?”
Akong pag-ampo nga ugma damlag kita makaamgo nga kitang tanan mga makililimos. Kitang tanan nagkinahanglan og tabang niining kinabuhia, ug ako karon hugtanong nagtuo nga ang Langitnong Amahan naglaom kanato nga makat-on gikan sa pag-antos nga dili mapugngan nga mahitabo sa atong palibot sa mortalidad. Makakat-on kita sa paghigugma ug pagserbisyo niadtong anaa sa panginahanglan.
Ang mga kasinatian sama sa pagserbisyo sa usa ka kampo sa mga bakwit nagtugot kanato sa kahigayonan nga mahimong mas mapainubsanon, mas masinabtanon ug mas maloloy-on nga katawhan. Ug sila mohatag kanato og sagradong mga dungog ug pribilehiyo sa paghatag og tabang sa atong mga kaigsoonan ug pagpalambo sa tinuod, sa hingpit nga Kristohanong gugma sa usag usa.
Nasayod na akong daan nga ang Dios igo nga naghigugma niadtong mga bakwit mao nga mipadala og uban aron sa pagtabang kanila. Apan karon ako nakasabot na nga Siya naghigugma kanako sa sama kadako nga gugma aron motugot kanako sa pagkat-on usab gikan kanila.
Sa sinugdanan sa akong pagserbisyo, mibati ko nga nawad-an og kadasig ug walay pulos ug nanghinaot pag-ayo nga akong maayo ang matag problema, o bisan mobuhat labaw pa kaysa pagserbisyo og tsa sa mga tawo nga angayan. Apan sa kataposan nakasaksi ko og mas dako pa nga mga epekto sa unsay aktwal nakong gibuhat didto. Unsa gayod ang akong calling didto mao —ang pagsabwag og paglaom, kaayo, ug kahayag sa nagkangitngit nga kalibotan.
Kitang tanan mga anak sa langitnong mga ginikanan, ug adunay daghan nga atong mahimo aron makatabang sa usag usa, bisan asa man kita.