Usa ka Kaugalingon nga Panahon uban sa Manluluwas
Usa kini ka talagsaon nga kasinatian sa kinabuhi—o mao kaha?
Ubos: mga litrato sa maayong kabubut-on sa tagsulat
Mga singgit milanog ngadto sa mga kakahoyan samtang ang mga tawo midagan sa paglikay sa lapok nga nagkayo [lava] ug sa nangahulog nga dagkong mga bato. Ako mibarug sa luyo sa entablado naminaw sa gi-rekord nga kusog kaayo nga dahunog nga milanog pinaagi sa mga loudspeaker tabok sa bungtod.
Niana nga ting-init, miapil ako sa Pasundayag sa Hill Cumorah, diin gipakita ang pipila ka mga panghitabo gikan sa Basahon ni Mormon. Gipadula ako isip mananayaw sa ting-ani (tan-awa sa 1 Nephi 18:23–24) ug usa ka dili matuohon (tan-awa sa 3 Nephi 1:4–21), apan ang tanan, lakip ang mga kawani, usa ka bahin sa umaabut nga talan-awon.
Usa ka spotlight midan-ag diha sa usa ka tawo nga nagsul-ob og puti, nga daw naglutaw ibabaw sa labing taas nga ang-ang sa entablado. Dili siya ang Manluluwas, sa tinuod—usa lamang ka boluntaryong estudyante sa kolehiyo sama kanako. Apan nianang higayuna sa entablado, akong nahanduraw ang tinuod nga Manluluwas hinoon ang nagbarug.
Natan-aw ko Siya nga naglakaw paingon kanako, ug akong nahanduraw nga nagtan-aw sa Iyang mga mata. Mga pagbati gikan sa Espiritu misanap kanako. Nianang higayona, ako adunay usa ka pagbati kon sama sa unsa nga makakita sa akong tinuod nga Manluluwas. Akong gimahal kining talagsaon nga espirituhanong kasinatian.
Unom ka bulan ang milabay, usa ka pahayag gikan ni Bishop W. Christopher Waddell, kaniadto Ikaduhang Magtatambag sa Tigdumalang Bishopric, miusab sa akong panan-aw: “Matag Dominggo kami nakabaton og kasinatian nga susama ngadto sa usa nga gipakigbahin sa mga naluwas sa grabe nga kalaglagan nga nahitabo sa panahon sa paglansang sa Manluluwas, ingon nga gihulagway diha sa Basahon ni Mormon.”1
Nakuratan ako. Posible ba alang kanako nga mobati, matag semana, sa samang paagi nga ako mibati diha sa entablado nianang gabhiona? Mas naghunahuna ako mahitungod niini, mas nakaamgo ako nga ang pag-ambit sa sakramento usa ka kaugalingon nga kasinatian uban sa Manluluwas sama kaayo sa pagluhod sa Iyang atubangan ug paghikap sa mga agi sa lansang sa Iyang mga kamot ug mga tiil.
Kita dili kinahanglan nga maanaa sa usa ka pasundayag nga makasinati sa gugma ug pagsabut sa Manluluwas o sa paghanduraw og usa ka kaugalingong panahon uban Kaniya. Kita adunay oportunidad matag semana. Matag Dominggo, Siya nagpaabut sa pagpakita kanato sa Iyang gugma ug pagsabut. Kinahanglan lamang kita nga moduol ngadto Kaniya.