Mga Young Adult

Hain Ang Akong Diha-diha nga Milagro?

Ni Erika Lamb

Ang tagsulat nagpuyo sa Utah, USA.

Kon magbasa mahitungod kon giunsa sa Manluluwas pag-ayo ang uban diha-diha dayon, mawad-an ako og kadasig tungod kay wala ako makakita og ingon niana nga panalangin sa akong kinabuhi.

Kanunay akong nag-ampo alang sa usa ka milagro sulod sa mga bulan nga nanglabay.

Septyembre sa 2019, nagpaopera ako sa sinus, ug dihay wala damha nga komplikasyon nga nawad-an og gamit ang akong usa ka mata. Ako dihay dinalian nga operasyon sa pagsulay og ayo sa nadaot nga mata, ug ang akong doktor masaligon nga kini hingpit mamaayo sulod sa tulo ka mga bulan. Ako usab nakadawat og daghang mga panalangin sa pagkapari diin, sa matag higayon, gisaaran ako og hingpit nga pagkaayo.

Apan kadtong tulo ka bulan miabut ug milabay, ug walay kausaban.

Gisaaran ako og pagkaayo. Daghang mga higayon. Apan ako dihay mga kapakyasan ug ubang mga kalangan ug mga kahigawad sa operasyon, ug ang akong mata layo pa gihapon sa kaayohan.

Kini nga kasinatian midala kanako og mga bulan sa mental, emosyonal, espiritwal, ug pisikal nga mga panlimbasug. Apan sa matag higayon nga ako hatagan og laing panalangin, kanunay akong gisaaran nga ako mamaayo.

Kini nakapahunahuna kanako. Unsay atong buhaton kon kita naghulat alang sa mga milagro nga ingon og dili moabut ug ang pag-ampo wala tubaga? Sa unsang paagi kita makapadayon sa pag-uswag kon magpabilin kita nga magpaabut nga tubagon ang atong mga kalisud nga gilabay usahay sa kinabuhi ngari kanato?

Taud-taud na akong naghunahuna niini nga pangutana, naninguha sa paghimo og katarungan sa akong sitwasyon. Ako usab naghunahuna mahitungod sa tanang mga milagro nga akong nabasa diha sa mga kasulatan.

Akong gitun-an ang tanan nga mga panahon nga si Jesus mihimo og mga milagro o miayo sa usa ka tawo atol sa Iyang pangalagad. Ug, sa tinuod, ako naglagot sa sinugdan, tungod kay matag higayon nga ang usa ka tawo gidala ngadto ni Kristo, Siya miayo kanila diha-diha dayon.

• Ang babaye nga gitalinug-an mihikap sa Iyang kupo, ug diha-diha siya naayo. (Tan-awa sa Marcos 5.)

• Ang lalaki nga natawo nga buta mihangyo alang sa pagkaayo, niana si Kristo nagsulti kaniya nga manghilam-os didto sa tubod sa Siloe. Ug sa higayon nga siya nagbuhat, siya naayo. (Tan-awa sa Juan 9.)

• Ang sanlahon nagtinguha nga mamaayo, ug—sa kalit—siya hingpit nga nalimpyo. (Tan-awa sa Mateo 8.)

• Ang anak ni Jairo nga babaye kinsa namatay giingnan sa Manluluwas nga mobangon gikan sa pagkamatay, ug gihimo niya. Diha-diha dayon! (Tan-awa sa Marcos 5.)

• Ang lalaki kinsa gisudlan og espiritu sa yawa diha-diha dayon naluwas sa dihang gitawag ni Kristo ang yawa sa paggula. (Tan-awa sa Lucas 4.)

Kini walay kahulugan ngari kanako. Tanan niini nga mga milagro mga diha-diha dayon, unya nganong ako nagpaabut gihapon sa akoa? Kini ingon og dili makiangayon.

Apan human sa pipila ka mga pamalandong, ang kamatuoran miigo kanako: bisan og ang tanan niini nga mga milagro mga diha-diha dayon, kadto kinsa nangaayo nakig-uban sa ilang mga kalisud ug mga pag-antus sulod sa dugay nang panahon sukad pa kaniadto.

• Ang babaye nga gitalinug-an nag-antus sulod sa 12 ka tuig ug nahurot ang tanan niyang pinansyal ug emosyonal nga mga kapanguhaan sa wala pa ang iyang milagro miabut.

• Ang buta nga lalaki walay nahibaloan gawas sa pagkabuta sulod sa iyang tibuok nga kinabuhi sa wala pa siya panalangini og panan-aw.

• Ang sanlahon nag-antus sa makalilisang nga pag-atake sa sanla ug ang kasakit sa sakit, nagpuyo isip usa ka sinalikway kay kinsa ang nasayud kon unsa ka dugay sa dili pa siya mamaayo.

• Ang anak nga babaye ni Jairo nag-antus hangtud nga hapit na mamatay sa wala pa ang iyang mga milagro miabut.

• Ang tawo nga gisudlan og espiritu sa yawa gigapos sa mahugaw nga mga espiritu sulod sa dugay-dugay nga panahon sa wala pa ang usa ka oportunidad alang sa kagawasan.

Gipakita kini kanako nga usahay ang mga milagro dili moabut dayon inig sugod sa pag-antus. Ang matag tawo adunay usa ka panaw uban sa ilang mga kasakit ug panlimbasug sa dili pa sila mangaayo. Ug samtang ang ubang mga panaw mas dugay kay sa uban, ang mga milagro sa pag-ayo sa kanunay miabut.

Unta nasayud ako kon unsa ka dugay ang akong panaw uban niini nga pagsulay molungtad, apan tingali ang pagkadili masayud mao ang punto. Mga hagit nagdala og mga oportunidad. Makapili kita sa paghimo sa atong mga panlimbasog nga mohulma kanato ug moumol kanato ngadto sa labing maayo nga matang sa atong mga kaugalingon. Kita makagamit niini nga panahon sa paghulat nga mas maduol ngadto sa Dios kinsa mibuhat kanato. Kita makakonektar ug makaduyog sa pagbati sa uban diha sa ilang pag-antus.

Kita kanunay makabaton og kahigayunan alang sa kaayohan, pagtubo ug paglambo kon maghulat kita sa usa ka milagro.

Naghupot ako ngadto sa paglaum ug hugot nga pagtuo nga ang akong milagro sa pagkaayo moabut ug nga usa ka adlaw ang mga saad nga akong nadawat matuman. Apan sa pagkakaron, ako mahimo nga anaa sa akong panaw uban niini nga kasakit. Ako makagamit niini nga panahon sa paghulat nga mahimong mas maayo, mas maalamon, mas malig-on, mas mabination, mas mapailubon, ug mas mapainubsanon. Ako makapalig-on sa akong relasyon uban sa Langitnong Amahan ug sa akong Manluluwas, si Jesukristo.

Bisan unsa nga milagro o saad nga kamo tingali naghulat sa pagkakaron, bisan unsa ka dugay kamo naghulat, ayaw pagpakawala og paglaum. Bisan unsa ang gisaad sa Langitnong Amahan kaninyo moabut. Apan ang mga milagro moabut sa Iyang panahon ug dili sa atong kaugalingon. Ayaw pagpakawala og paglaum diha Kaniya. Ayaw paghunahuna nga dili tubagon ang imong pag-ampo. Siya nag-andam sa agianan alang kanimo. Hatagi og importansya ang karon ug buhata ang unsay imong mahimo sa pagpadayon sa pag-uswag karon sa imong panaw. Tagsa ka lakang matag higayon. Padayon sa paggunit og hugot ngadto sa paglaum samtang ikaw naghulat alang sa imong milagro.

Kini moabut.