Digital Lamang: Mga Tingog sa mga Santos sa Ulahing mga Adlaw
Atong Hingpit nga Trayanggulo sa Paglaom ug Pagkaayo
Gihatagan kami og gamayng paglaom nga ang among masuso nga anak nga babaye normal nga modako, apan ang hugot nga pagtuo, pagpuasa ug pag-ampo, ug mga panalangin sa pagkapari mimatuod nga sayop ang mga doktor.
Litrato pinaagi ni Leslie Nilsson
Mahinamon kaming tanan alang sa pagkatawo ni Agatha niadtong 2015. Siya mao ang mahimong unang apo sa akong mga ginikanan. Maayo ra ang tanan hangtod sa adlaw nga siya natawo. Dako siya nga bata, miantos ako og mga komplikasyon, ug ang doktor naulahi og abot sa ospital. Sa dihang miabot siya sa kataposan, gikinahanglan niyang mogamit og forceps sa pagkuha kaniya. Nianang higayona, siya miantos og kakulang sa hangin sa bag-ong natawo [neonatal asphyxia].
Sa dihang gibutang nila si Agatha sa akong dughan sa makadiyot, naghunahuna ko nga gituyo kadto aron ako makapanamilit. Dali dayon siyang gikuha sa mga nars aron dad-on sa neonatal intensive care. Sa wala madugay akong nahibaloan nga ang iyang Apgar score, nga gigamit aron sa pagsusi sa kinatibuk-ang kahimtang sa usa ka bag-ong natawo, kay 2 lamang. Ang 7 hangtod 10 nga score mao ang gikonsiderar nga normal.
Ang mga scan nagpakita og usa ka dakong puti nga pat-ak sa utok ni Agatha, nga nagbutyag og dakong kadaot tungod sa kakulang sa oxygen. Ang mga doktor misulti kanamo nga kon siya mabuhi, mag-antos siya og grabe nga mga kakulangan sa panghunahuna ug sa pisikal ug malagmit nga adunay patol.
Sa dihang nahibaloan sa akong pamilya kon unsa ka grabe ang sakit ni Agatha, ang akong mga ginikanan ug mga ugangan gihatagan og pagtugot nga mosulod sa neonatal intensive care unit sa lain-laing mga panahon aron makakita ni Agatha ug manamilit. Ang akong amahan ug ugangan nga lalaki, wala masayod ang usag usa, tagsa-tagsa nga mihatag kaniya og panalangin. Ang akong bana mihatag usab kaniya og panalangin. Niana nga Dominggo miorganisar kami og usa ka pamilya nga pagpuasa alang kaniya.
Si Agatha nagpabilin og 11 ka adlaw sa ospital sa wala pa namo siya madala sa panimalay. Sulod sa pipila ka bulan, gipaubos siya sa mga test ug mga procedure. Dili siya makatulon, nagkulang siya og mga reflex ug miantos siya og mga kombulsiyon. Gisultian ko nila nga siya dili gayod makalihok sa iyang ulo, dili gayod makalakaw, ug dili gayod makasulti.
Sulod sa misunod nga tuig, nagpadayon kami sa pag-ampo ug pagpuasa alang kang Agatha, ug gidala namo siya ngadto sa usa ka physical therapist aron sa pagtabang kaniya nga makakat-on sa paglihok. Ang wala nga bahin sa iyang lawas ang labing naapektohan sa iyang kakulang sa hangin [asphyxia]. Malihok niya ang iyang tuo nga kamot apan dili ang iyang wala nga kamot. Ang mga doktor misulti kanamo nga ang pag-uswag mahimong hinay. Apan human lamang sa pipila ka sesyon, parehas niyang malihok ang duha ka habig sa iyang lawas. Ang therapist miingon nga kadto usa ka milagro. Tungod kay dali kaayo siyang nakat-on, naghunahuna siya [ang therapist] kon nganong gidala pa gayod namo siya.
Ang matag gagmay nga kalamboan nakahatag kanamo og kalipay. Sa wala madugay si Agatha misugod sa paglihok sa iyang ulo. Dayon misugod siya sa paglingkod. Sa dihang misugod siya sa pagpahiyom, nasayod kami nga ang among hugot nga pagtuo ug mga pag-ampo gitubag. Ug sa dihang siya miingon og “Mama” sa unang higayon, gibati nako ang dakong kalipay.
Nadawat namo ang among kinadak-an nga milagro diha sa iyang tinuig nga check-up. Usa ka magnetic resonance image (MRI) nagpakita nga walay puti nga pat-ak sa iyang utok. Ang iyang doktor dili makatuo niini.
“Kini nga scan ingon og naggikan sa lain nga bata,” miingon siya, nga nagtandi sa bag-o nga mga imahe ngadto sa orihinal nga imahe nga gikuha human siya natawo. Mihangyo siya og ikaduha nga scan, nga nangutana, “Unsay nahitabo dinhi?”
Karon, si Agatha walay mga kakulangan sa panghunahuna o sa pisikal, ug siya wala na nagtomar og tambal alang sa patol. Ang iyang eskwelahan nakaila kaniya isip usa ka bata nga nag-una sa intelektwal nga paagi.
Among gipasidungog ang pagkaayo ni Agatha ngadto sa unsay gitawag sa akong amahan nga “hingpit nga trayanggulo”: hugot nga pagtuo, pagpuasa ug pag-ampo, ug mga panalangin sa pagkapari gikan sa matarong nga mga tawo. Nasayod kami nga ang Ginoo nahigugma kanato, nasayod kami nga Siya adunay gahom, ug nasayod kami nga Iyang gihatag kanato ang Iyang gahom aron gamiton dinhi sa yuta. Mapasalamaton kami nga Iyang giayo si Agatha.