Dali, Sunod Kanako

Sa Unsang Paagi si Emily Richards Adunay “Usa ka Butang nga Ikasulti”

Mayo 31–Hunyo 6

Si Emily Richards mitikang ngadto sa pig-ot nga pulpito diha sa miting sa National Woman Suffrage Association didto sa ulohan sa U.S. Washington, D.C. Nasayud siya nga kini mao ang usa sa labing mahinungdanon nga mga kasinatian sa iyang kinabuhi. Tuig kadto sa 1889, ug ang mga hilisgutan sa katungod sa mga babaye sa pagboto sa Utah ug ang dinaghan nga kaminyoon mao ang mainit nga gilalisan. Bisan tuod si Emily gikulbaan, gibati niya ang pagkaandam sa pagpamulong alang sa iyang panimalay, pagkababaye, ug relihiyon.

Usa ka tinubdan misaysay, “Kini gikahadlokan nga ang babaye gikan sa Utah dili makahimo sa iyang kaugalingon nga madunggan sa tibuok lawak-tigumanan—ang ubang mamumulong ingon nga napakyas kalabut niana—apan sa katingala ug kahimuot sa kinatibuk-an, ang iyang klaro nga mga pagsulti milanog ngadto sa labing suok nga bahin sa gambalay, ug ang iyang pamulong usa ka tinuoray nga kadaugan.”¹

Bisan tuod walay usa ka rekord sa unsay gisulti ni Emily nianang adlawa, usa ka tigmantala [journalist] mireport nga siya namulong og mga sulod sa tunga sa oras. Siya mihatag “og usa ka husay, makinaadmanon nga mga pahayag” nga mihatag og mga kamatuoran ug mga ideya nga “mitangtang sa diskriminasyon.” Ang reporter mipadayon sa pag-ingon nga ang mga pulong ni Emily adunay “malumo nga espiritu” nga mipahumok sa daghang mga kasingkasing nianang adlawa ngadto sa teritoryo sa Utah.²

Hinoon, si Emily dili kanunay batid nga mamumulong diha sa publiko. Nahinumdom siya giunsa ni Eliza R. Snow, niana nga panahon ang Kinatibuk-ang Presidente sa Relief Society, paghatag kaniya og pipila ka tambag: “Ang unang higayon [si Sister Snow] mihangyo kanako sa pagpamulong diha sa miting, dili ako makahimo, ug siya miingon, ‘Ayaw panumbalinga, apan kon ikaw hangyoon pag-usab sa pagpamulong, sulayi ug pagbaton og butang nga ikasulti.’”³

Si Emily kinasingkasing nga midawat niini nga tambag ug naniguro nga siya andam sa pagpamulong kon siya gikinahanglan. Sama ni Emily Richards, kita kinahanglan gayud nga andam sa tanang panahon nga “mobuka sa [atong] mga ba-ba” (Doktrina ug mga Pakigsaad 60:2) ug mosangyaw sa pulong sa Dios.