Gipugos sa Pagbiya sa Panimalay: Kristohanong Pagpangalagad ngadto sa mga Tawo Kinsa Gipapahawa
Ang gipapahawa nga mga tawo nagkinahanglan og labaw pa nga mga kapanguhaan; nagkinahanglan sila og makahuluganong mga relasyon ug pagpangalagad.
Ibabaw: litrato gikan sa Getty Images; ubang mga litrato ni Marc Marriott
Ang kinahanglan nga paglayas sa panimalay tingali mao ang labing makalilisang nga kasinatian sa kinabuhi sa usa ka tawo. Nagtubo nga kapintas sa mga kasundalohan, mga hagit sa ekonomiya, ug kagubot sa politika makapugos sa mga pamilya sa pagbiya sa ilang mga panimalay nga walay higayon sa paghipos sa bililhong mga kabtangan o gikinahanglan nga mga sangkap. Mga pamilya kasagaran nagkabulag atol sa makuyaw nga panaw samtang sila nagbiyahe og gatusan ka mga milya aron makakaplag og kahilwasan. Ang mga bata makasaksi o makasinati og hilabihang kakulang sa pagkaon ug lawasnong kadaot. Kining mga tawhana makalaum lamang nga ang ilang malisud nga panaw moabut sa katapusan diha sa usa ka luwas nga dapit.
Sa milabay nga kapin sa dekada, dili mominus sa 100 ka milyon ka mga tawo ang kinahanglan nga mokagiw sa ilang mga panimalay, mangita og kadangpan sa sulod o sa gawas ba sa ilang mga nasud.1 Uban sa ingon nga makaguol nga gidaghanon, ang biyahe sa mga tawo nga gipapahawa gikan sa ilang mga panimalay usa ka dako nga kabalaka. Pinaagi sa pagtan-aw ngadto sa ehemplo sa Manluluwas, makakaplag kita og personal nga mga paagi sa pagpangalagad ngadto niadtong nanginahanglan.
Usa ka Syrian nga pamilya nagdawat og tabang sa Lebanon. Ang gubat sa Syria mibiya og 11 ka milyon ka Sirianhon nga walay kapuy-an. Ang Manluluwas sa makausa usa ka refugee Mismo ug daling makaalinggat niadtong kinsa nag-antus niini nga pagsulay.
Pag-ila sa Atong Giambitan nga Kasaysayan
Alang sa mga Santos sa Ulahing mga Adlaw, ang mga tawo nga gipapahawa kinahanglan nga labaw pa kay sa usa ka istorya lamang diha sa mga balita; kinahanglan ato silang makita isip atong mga silingan (tan-awa sa Mateo 22:39) kang kinsa kita, ug ang Manluluwas Mismo, nag-ambit og kasaysayan. “Ang ilang istorya mao ang atong istorya, dili pa lang dugay nga mga katuigan nga nanglabay,” miingon si Elder Patrick Kearon sa Kapangulohan sa Seventy.2
Dili kita kinahanglang motan-aw og balik sa layo aron makita ang usa ka panahon sa dihang ang mga Santos sa Ulahing mga Adlaw mapintas nga gipapahawa gikan sa ilang mga panimalay ug mga panginabuhian. Makita usab kanato kon sa unsang paagi ang pipila sa ilang mga silingan nakahimo og kalainan sa ilang panaw. Sa dihang ang mga Santos gipapahawa gikan sa estado sa Missouri, ang mga lumulupyo sa Quincy, Illinois, midawat kanila ug mitanyag og tabang. Kadto nga mga tawo mga ehemplo sa Kristohanong pagserbisyo ug “miluwas sa mga Santos sa Ulahing mga Adlaw gikan sa mas dakong kadaot nga ila untang antuson.”3
Ang Manluluwas nakasinati usab sa pagka-refugee atol sa Iyang mortal nga kinabuhi. Si Brett Macdonald sa Latter-day Saint Charities miingon sa iyang mga pagbisita sa mga kampo sa refugee sa tibuok kalibutan, “Si Jesus ug ang Iyang mga ginikanan mga refugee sa amihanang Africa sa usa ka mubo nga panahon; mailhan nimo ang Iyang impluwensya ug dakong interes sa mga kinabuhi niadtong kinsa nag-antus.”4
Usa ka boluntaryo gikan sa Latter-day Saint Charities mibisita sa usa ka kampo sa refugee sa Jordan. Ang mga tigtabang sa pagtrabaho nagsunod og mga baruganan sa balaod gikan sa makatawhanon nga lagda, diin makagiya usab kanato samtang kita mangalagad sa mga refugee ug sa ubang mga tawo nga gipapahawa.
Nagsunod sa Humanitarian Code [Makatawhanong Lagda] Karon
Karon, kita adunay mga oportunidad sa pagtabang ug pagtanyag sa samang tabang nga ang mga miyembro sa Simbahan sa ika-19 nga siglo makausa nakadawat gikan sa ilang mga silingan. Apan ang atong mga kaigsoonan kinsa gipapahawa gikan sa ilang mga panimalay karon nagkinahanglan labaw pa kay sa mga kapanguhaan o salapi; nagkinahanglan sila og makahuluganong mga relasyon ug Kristohanong pagpangalagad.
Daghang makatawhanon nga mga organisasyon, lakip ang Latter-day Saint Charities, nagsunod og makatawhanong lagda sa kalihokan nga makatabang kanato sa pagpangalagad ngadto sa mga tawo nga gipapahawa. Samtang ang lagda naggamit ngadto sa buhat nga makatawhanon sa luag nga paagi adunay mga baruganan sa ebanghelyo sulod niini nga makatabang kanato sa mas epektibong paagi nga “ipataas ang mga kamot sa nawad-an og paglaum, ug lig-unon ang mga tuhod nga mahuyang” (Doktrina ug mga Pakigsaad 81:5).
Pinaagi sa pagtutok sa pagtukod og mga relasyon, makadiskubre kita og makahuluganong mga paagi sa pagpangalagad. Sa Wala: Usa ka miyembro sa Simbahan naghatag sa usa ka refugee nga inahan og usa ka espesyal nga baga nga habol nga gipanag-iya sa iyang sinagop nga batang lalaki. Ubos: Makatabang kita sa mga refugee sa pagkat-on mahitungod sa lokal nga kultura, lakip ang pagluto sa mga pagkaon nga dili sila tingali sinati.
Ang Baruganan sa Katawhan
Ang baruganan sa katawhan nagtudlo nga samtang kita mangalagad, molihok kita nga magtan-aw sa matag indibidwal isip usa ka anak sa Dios. Kini ingon og yano ra, apan lisud kini sa paghinumdom kon ang mga tawo nagtan-aw, naglihok, nagsulti, o nagtuo og lahi kay kanato.
Aron ikaw matabangan nga makakita sa ka balaan diha sa matag tawo, pangutan-a ang imong kaugalingon, “Kon ang indibidwal usa ka sakop sa pamilya o usa ka minahal, sa unsang paagi ang akong pagtan-aw niini nga tawo mausab?”
Kini nga pangutana nahimong personal kaayo ngadto sa usa ka babaye nga Santos sa Ulahing mga adlaw sa dihang ang iyang Relief Society naghimo og usa ka baby shower alang sa usa ka refugee nga inahan diha sa ilang komunidad.
Ang iyang kapangulohan sa Relief Society mikontak og usa ka lokal nga ahensya sa refugee resettlement sa pagpangita og usa ka inahan nga ilang matabangan. Sa dihang sila napaila-ila ngadto sa usa ka inahan ug sa iyang pamilya, ang kapangulohan mibisita sa panimalay sa pagpangutana kon sa unsa nga paagi sila labing makatabang kanila. (Usa ka importante nga bahin sa baruganan sa katawhan mao ang pagtahud sa kabubut-on sa usa ka refugee pinaagi sa pagpangutana kon sa unsang paagi sila gusto nga matabangan ug dayon kinasingkasing nga maminaw.)
Ang presidente sa Relief Society misugyot og usa ka baby shower, nagpasabut niini isip usa ka paagi sa pagsaulog sa bag-o nga bata ug sa paghatag og mga regalo nga ang masuso ug ang inahan tingali nagkinahanglan. Miuyon ang pamilya nga refugee nga kana mahimong makatabang kanila.
Samtang ang ward misugod sa pagplano sa shower, usa ka sister nakaamgo nga siya adunay usa ka espesyal nga “malumo nga pagbati” alang niadtong kinsa kinahanglan gayud mopuyo og usa ka bag-ong panimalay human sa iyang kasinatian sa pagsagup sa usa ka masuso gikan sa Guatemala. Sulod sa taas nga proseso sa pagsagop, kini nga sister nagpabiling nagkapuliki sa paghimo og usa ka baga nga habol [quilt] alang sa iyang bag-ong masuso. Samtang iyang gitandi ang kasinatian sa iyang kaugalingon nga gisagop nga batang lalaki ngadto niining bag-o nga refugee nga masuso, gusto niya nga mailaila ang pamilya pinaagi sa paghatag kanila sa baga nga habol nga iyang gihimo.
Diha sa baby shower, kini nga babaye mipasabut sa iyang kalabut ngadto sa refugee nga inahan, nagpasabut kon giunsa sa iyang batan-ong anak nga lalaki kinahanglan usab nga mopuyo sa usa ka bag-ong panimalay ug unsa sila ka nakagusto sa pagputos kaniya sa baga nga habol sa iyang pag-abut. Ang babaye mihatag sa refugee nga inahan sa baga nga habol ug miingon, “Hinaut nga ang imong bag-ong masuso makagusto usab niini.”
Ang Baruganan sa Pagkawalay Pinalabi
Si Presidente Russell M. Nelson nagtudlo:
“Ang Dios wala magmahal sa usa ka kaliwat nga labaw kay sa lain. … Siya nagdapit sa tanan nga moduol ngadto Kaniya, ‘itom ug puti, ulipon ug gawasnon, lalaki ug babaye’ [2 Nephi 26:33]. …
“… Karon moawhag ko sa atong mga miyembro bisan asa nga manguna sa pagbiya sa mga kinaiya ug binuhatan sa diskriminasyon.”5
Ang mga pulong ni Presidente Nelson nagtabang sa pagpasabut sa baruganan sa pagkawalay pinalabi. Sa atong pagpangalagad, dili gayud kita maghimo og ilhanan pinasubay sa nasyonalidad, kaliwat, sekso, relihiyosong tinuohan, matang, o mga opinyon sa politika. Kita moserbisyo sa uban bisan kon sila lahi kay kanato.
Makita nato ang ehemplo sa pagkawalay pinalabi diha sa sambingay ni Kristo sa maayong Samarianhon sa Lucas 10. Ang Samarianhon, kinsa sinalikway sa kultura nga paagi taliwala sa mga Judeo, wala magduhaduha sa pagtabang sa usa ka tawo nga lahi og kagikan. Gani siya naghunahuna sa kaugmaon sa samaran nga tawo ug naningkamot sa pagbuhat sa tanan nga gikinahanglan sa paghatag kaniya og usa ka malampusong pagkaayo.
Human sa pag-asoy niini nga sambingay, si Kristo mitudlo sa Iyang mga disipulo nga ang maayo nga Samarianhon milihok isip usa ka silingan ngadto sa samaran nga tawo pinaagi sa pagpakita kaniya og kalooy. Dayon si Kristo mitudlo, “Lakaw, ug buhata ang ingon” (Lucas 10:37).
Photograph by Nicole Johansen
Ang Baruganan sa Kagawasan
Ang kagawasan sa paghatag og makatawhanong pagtabang nagpasabut nga kita nagserbisyo nga walay personal nga katuyoan. Hinoon, kita kinahanglan nga moserbisyo sa pag-awhag og kagawasan ug kaugalingong paningkamot. Kini mahimong magpasabut sa pagtabang sa mga gipapahawa nga mga tawo sa pagpangita og mga paagi sa pagsulay og gamit sa ilang mga kahanas diha sa ilang bag-ong mga komunidad o sa pagtabang kanila nga makakat-on og mga kahanas sama sa unsaon sa pagsulti og bag-ong pinulongan o unsaon sa pakig-ipon gamit ang lokal nga mga sumbanan sa kultura. Samtang ang mga tawo mahimong mas makabarug sa kaugalingon, sila mas adunay pagpugong sa ilang mga desisyon, ug sila mahimong makadawat og mas maayong kaayohan sa katilingban sa ilang kaugalingong mga kahanas.
Usa ka miyembro gikan sa Estados Unidos, si Nicole, nangutana sa pipila ka mga refugee diha sa iyang dapit unsay ilang gusto nga makat-unan aron mahimong mas makabarug sa kaugalingon diha sa komunidad. Sila mitubag nga sila gusto nga makakat-on kon unsaon sa paghimo og mga pagkaon sa Amerikano. Si Nicole mihimo og panahon kauban sa ubang mga sister sa ward aron sa pagtudlo sa mga refugee kon unsaon sa paghimo og pan ug mga roll ug mihatag kanila og mga himan sa paghimo niini diha sa panimalay. Pinaagi sa pagtudlo sa mga refugee kon unsaon paghimo og pagkaon sa ilang kaugalingon mismo, si Nicole mitabang sa mga refugee nga mahimong mas makabarug sa kaugalingon sa pagpahiangay ngadto sa bag-ong mga pamaagi sa pagluto.6
Kita usab makapasiugda og kagawasan pinaagi sa pagtugot niadtong nanginahanglan sa pagtabang sa usag usa. Samtang kita makahatag og suporta, kon kadtong nanginahanglan may paningkamot sa pagtabang sa ilang mga kaugalingon ug sa uban, sila nagtukod og kasuod uban niadtong ilang kauban sa trabaho. Kini nagtabang kanila sa pagtukod sa ilang mga komunidad ug mahimong kalig-on sa usag usa.
Pagpangalagad nga Mas mahisama sa Manluluwas
Sama nga si Bishop Gérald Caussé, Tigdumalang Bishop, miingon, “Kitang tanan nga nagpuyo niining matahum nga planeta nakigbahin og usa ka sagradong responsibilidad sa pag-atiman sa tanang mga anak sa Dios … , bisan kinsa sila ug bisan hain sila”7 Ang labing makahuluganon nga serbisyo sa kasagaran moabut kon kita nagpunting diha sa indibidwal sa atong mga komunidad.
Usa ka miyembro kinsa nakakaplag sa mga panalangin sa pagtukod og personal nga mga relasyon uban sa mga refugee mipahayag, “Ang pagkaandam lamang sa pagpangita, pagtabang, paghigugma kanila makahimo og dakong kalainan. Ug sa dihang ikaw makaila og usa ka pamilya, ikaw makaamgo nga ang tanan adunay ilang kaugalingong mga istorya.”8 Ang pagkamasayud sa mga istorya sa ubang mga tawo motabang kanato sa pagtan-aw kanila isip mga anak sa Dios ug mangalagad nga mas sama sa buhaton sa Manluluwas.