Digital Lamang

Tulo ka Baroganan sa Panalipod

Ni Elder Quentin L. Cook

Sa Korum sa Napulog Duha ka Apostoles

Gikan sa usa ka pakigpulong sa debosyonal nga, “Great Expectations,” nga gihatag didto sa Brigham Young University niadtong Nobyembre 10, 2020.

Samtang kita motukod sa Zion, mahimong usa ka kahayag, ug motutok diha sa templo, kita mapanalipdan bisan asa man kita magpuyo.

Sa miaging tinglarag, ako misaulog sa akong ika-80 nga adlawng natawhan. Nakahatag kini kanako og taas kaayo nga panglantaw sa unsay mahinungdanon aron makahatag kanato og panalipod.

Sa dihang ang akong asawa, si Mary, ug ako nagpangidaron pa og mga 20 anyos niadtong mga 1960, ang kasamok, kasuko, ug katilingbanong kaguliyang susama sa unsay atong gisinati karon sa kasamtangan. Nagpuyo kami sa San Francisco Bay Area, sa California, USA. Ang kombinasyon sa kagubot sa kaliwatan, pagpatay ni Martin Luther King jr., ang dili popular nga mga Gubat sa Vietnam ug pagpahuyang sa kultura sa druga misangpot sa mga pag-alsa nga naglakip sa panaggubot, pagpanglungkab, ug sa pag-ukopar sa mga masinupakon diha sa administratibong buhatan sa dagkong mga unibersidad.

Samtang nagsagubang niining kagubot, kami napanalanginan sa pagdawat og tambag gikan ni Presidente Harold B. Lee (1899–1973), kinsa ang Presidente sa Korum sa Napulog Duha ka Apostoles nianang panahona. Ang iyang tambag gituyo alang sa mga pamilya ug mga indibidwal. Among gipasalamatan ang iyang tambag kaniadto ug gipangga kini karon.

Agig dugang sa pagtambag sa mga miyembro sa Ang Simbahan ni Jesukristo sa mga Santos sa Ulahing mga Adlaw sa pagsunod sa propeta, si Presidente Lee mihatag og tulo ka mga baroganan sa panalipod:

Pagtukod sa Zion diha sa inyong mga kasingkasing ug mga panimalay.
Mahimong usa ka kahayag diha sa bungtod ug usa ka ehemplo diha sa inyong komunidad.
Itutok ang inyong panglantaw ug mga tumong sa mga ordinansa ug mga baroganan nga gitudlo diha sa templo.

Misaad si Presidente Lee nga makapuyo kita sa bisan asa nga dapit sa kalibotan ug mapanalipdan gihapon kon kita mosunod niining mga baroganan. Sa akong panglantaw, kini nga mga baroganan may kalabotan karon sama nahitabo kapin sa 50 na ka tuig ang milabay, ug kini magamit nganha kaninyo karon.

Pagtukod sa Zion

Una, samtang kamo maningkamot sa pagtukod sa Zion diha sa inyong mga kasingkasing ug mga panimalay, palihog sabta nga ang mahangtorong institusyon sa pamilya mao ang pondasyon sa kalipay.

Kitang tanan mga sakop sa mga pamilya. Kita mga anak sa Dios ug kabahin sa Iyang pamilya. Kabahin usab kita sa pamilya diin kita natawo. Mao nga, usa ka dakong tumong mao ang pagpasalig ngadto sa mahangtoron nga institusyon sa pamilya. Ako motambag kaninyo sa pagpangita og usa ka matarong nga kapikas kinsa inyong gidayeg ug kinsa mahimo ninyong suod nga higala. Ang kaminyoon niining kinabuhia usa ka sagrado nga bahin sa mahangtorong plano.

Diha sa kalibotan sa kinatibuk-an, daghan ang nagpili nga dili magminyo o ilangay ang kaminyoon. Ang pamilya mao ang mahangtorong institusyon nga gi-orden sa Dios¹ sa wala pa ang pundasyon sa kalibotan.

Akong ipasalig kaninyo nga ang kalipay, gugma, ug katumanan nga nasinati diha sa mahigugmaon, matarong nga mga pamilya makahatag sa labing talagsaong kalipay nga posible natong makab-ot, ilabi na kon kita mohimo sa atong “panimalay ngadto sa usa ka santuwaryo sa pagtuo.”² Mao usab kini ang pundasyon alang sa malamposon nga katilingban.

Ang pagtinguha sa kaminyoon ug ang pag-angkon niana isip usa ka matarong nga mga tinguha sa inyong kasingkasing kinahanglan mao ang inyong tumong. Hinoon, ang pagkamatarong mao mismo ang ganti ug wala mag-agad nga maminyo ug magbaton og mga anak sa atong kinabuhi. Mahimong wala kita maminyo o mapanalangini og mga anak o makabaton sa ubang gitinguha nga mga panalangin karon. Apan ang Ginoo misaad nga ang mga matarong kinsa mga matinud-anon “mahimo nga mopuyo uban sa Dios diha sa usa ka kahimtang nga walay katap[o]san ang kalipay.”(Mosiah 2:41).³

Si Presidente Lorenzo Snow (1814–1901) mitudlo: “Walay Santos sa Ulahing mga Adlaw kinsa human sa pagpuyo og matinud-anon nga kinabuhi nga namatay nga nawagtangan og bisan unsa tungod sa kapakyas sa … [pagminyo] kon ang mga oportunidad wala mahatag kaniya.”⁴

Mahimong usa ka Kahayag

Ikaduha, mahimong usa ka kahayag diha sa bungtod ug usa ka ehemplo sa inyong komunidad. Samtang kamo mopadayon sa inyong edukasyon ug dayon magsugod sa inyong nagkalainlaing mga trabaho ug mga responsibilidad, kamo mahimong gamhanang pwersa alang sa maayo. Usa ka importanting hagit mao ang pagtuman sa espiritwal nga sugo sa pagpuyo sa kalibotan apan dili kalibotanon (Juan 15:19).⁵

Si Presidente Joseph Fielding Smith (1876–1972), sa dihang usa pa siya ka Apostol, mitudlo nga “bisan tuod anaa kita sa kalib[o]tan, kita wala sa kalib[o]tan sa paagi nga kita dili kinahanglang moapil sa … daotang mga naandan, … mga uso sa sinina, … mga kab[o]ang, sayop nga mga doktrina, ug mga teyoriya.”⁶

Agig dugang, ang inyong positibong kontribusyon sa dapit diin kamo nagpuyo usa kabahin sa inyong hagit kon kamo gusto nga mahimong ehemplo, mahimong usa ka kahayag diha sa bungtod, mopakigbahin sa ebanghelyo ug magpuyo sumala sa mga pagtulun-an nga inyong nadawat isip mga Santos sa Ulahing mga Adlaw.

Tutokan ang templo

Ikatulo, itutok ang inyong panglantaw ug mga tumong sa mga ordinansa ug mga baroganan nga gitudlo diha sa templo. Bisan pa sa kakulang sa pagkamatarong sa kalibotan karon, nagpuyo kita sa usa ka sagrado ug balaan nga panahon. Ang Ginoo miandam ni Presidente Russell M. Nelson, ang atong propeta, sa daghang katuigan sa mga buluhaton nga may kalabotan sa templo aron sa pagdumala sa Simbahan sa panahon sa dihang ang templo tinuod nagkatap sa yuta sa dili ordinaryong gidaghanon.⁷

Gisugdan ni Presidente Nelson ang iyang pagserbisyo isip atong propeta sa pagpamulong ngari kanato gikan sa Templo sa Salt Lake. Siya mihangyo kanato nga “mosugod nga maghunahuna sa unahan” ug giklaro nga “ang mga ordinansa sa templo” ug ang dalan sa pakigsaad kinahanglang mao ang atong nag-unang tumong.⁸ Mitambag siya kanato “sa pagpundok sa nagkatibulaag nga Israel … sa duha ka habig sa tabil.”⁹

Ang akong hagit kaninyo mao ang pagkat-on kon unsa ang gikinahanglan kon ang kalibotan magkaguliyang aron nga kamo mapanalipdan, mapanalanginan, ug mahatagan sa kalipay, kalinaw ug kalamposan nga inyong gitinguha. Palihog likayi ang mga pagtipas ug mga babag nga mopaminos niini nga panalipod.

Ang among gilaoman pag-ayo alang kaninyo mao nga kamo mohigugma, moserbisyo, ug mosimba sa Manluluwas ug nga kamo mopanalangin sa kalibotan sama sa walay laing henerasyon. Mahimong determinado sa pagpadayon sa dalan sa pakigsaad ug mahimong matarong.