Savali Faaleautaitai i le Eria
Faaaliga Faaletagata Lava Ia—O se Molimau mai le Atua, lo Tatou Tama
E le na o perofeta latou te maua faaaliga. E tusa ai ma lou faatuatua, e mafai ai ona e maua faaaliga e fesoasoani ia te oe i ou manaoga faapitoa, matafaioi, ma ni fesili ma fesoasoani ia te oe e faamalosia lou faatuatua1.
I le toe tepa ai i tua i le silia ma le 40 tausaga o lo’u auai ai i Le Ekalesia a Iesu Keriso o le Au Paia o Aso e Gata Ai, ou te maofa ma faafetai tele, mo aafiaga lelei e suia ai le olaga lea na maua e faaaliga faaletagata lava ia mai lo’u Tama Faalelagi alofa, ma o loo maua pea, i lo’u olaga.
Ou te manatuaina pea ma le manino lo’u aafiaga loloto muamua o faaaliga faaletagata lava ia. Sa 17 ou tausaga; sa tupu i le fale o o’u matua i Suva, Fiti. Sa nao au i lou potumoe, ao faitauina le Tusi a Mamona ma se naunautaiga maumaututu ia iloa mo au lava pe moni le tusi. O le lui lea na tuuina mai ia te au e faifeautalai faamisiona o Elder Rian Nelson ma Elder Randy Price i le maea ai o le la lesona e uiga i le perofeta o Iosefa Samita ma le ala na ia mauaina ai papatusi auro mai se agelu, ona faaliliuina ai lea o tusitusiga i le gagana Peretania.
Na faitauina e na faifeautalai fuaitau mai le Tusi a Mamona i le taimi o le matou talanoaga, ma na la faasoaina ni molimau malolosi ma malamalama. Sa ou ootia loloto, ma sa ou manao e iloa mo au lava pe o mea na la faasoaina mai e moni lava mai le Atua . . . ma sa ou manao e tautala atu i tala na la tautatala ai ma le talitonuga maumaututu lava lea e tasi.
Sa ou faitauina le 3 Nifae mataupu 11; e toeitiiti lava i le taimi lava lena na amata ai ona ou malamalama ma faamalamalamaina. Sa ou vaai faalemafaufau i le Faaola, o Iesu Keriso, o afio ifo mai le lagi ma tu i le lotolotoi o le motu o tagata ma aao o loo faaloaloa atu, ma valaauliaina i latou e o mai ia te Ia, e tagotago i tulaga o fao i Ona aao. Sa latou faia lenei mea taitoatasi, ma ina ua maea, sa latou pauu i le eleele ma tapuai atu ia te Ia o le Mesia folafolaina2.
Na lofituina au i lagona fiafia, mafanafana ma le filemu ma sa ou tagi i loimata o le alofa, lotofaafetai, ma le talisapaia mo le Alii ma mo Lana misiona o le alofa ma le alofa mutimutivale. Na vave ona ou iloaina o lenei mea o se molimau faaleagaga mai le lagi . . . e faapea o mea na ou faitauina ma lagonaina e moni ma e mai le Atua.
Na toe oo mai lagona matagofie na ou lagonaina faatasi ma faifeautalai i le aso na tuanai ai, ae o le taimi lea sa na o au. O le uunaiga a le Agaga Paia sa patino ma mamana. Sa ou le manao e muta lenei taimi taua. Na ou iloaina ai i lena taimi le mea e ta’u o faaaliga faaletagata lava ia. O taimi uma lava ou te faasoaina ai lena aafiaga mai le 40 tausaga talu ai, e tumu lo’u loto i lena molimau matagofie a le Agaga Paia.
O le isi aafiaga na oo ia te au o le mauaina o faaaliga faaletagata lava ia, o le taimi ao ou auauna atu o se peteriaka a le siteki. Sa ou maofa ma lotomaualalo e maua faaaliga mai le Agaga Paia i taimi uma e tuu ai ou lima i luga o ulu o i latou e o mai mo le mauaina o latou faamanuiaga faapeteriaka. O taimi uma lava o musumusuga manino na ou mauaina na loloto lona pa’i mai i lo’u mafaufau ma sa mafai ona ou tuuina atu i luga o tagata taitoatasi faamanuiaga ia na finagalo le Atua, lo latou Tama, ia latou mauaina. O la’u galuega o le faalogo ma le toto’a . . . ma faaleoina mea na ou mauaina.
E ui o nei aafiaga e lua e eseese, o le mea e tutusa ai o lo’u manaomia lea o faaaliga mai le Atua e aoao ai, taitai ma faamafanafana au; ma sa ou faatuatua o le a Ia faamanuia ia te au e tusa ai ma nei mea.
O lo tatou perofeta soifua, o Peresitene Russell M. Nelson, na aoaoina i tatou i aoaoga faavae o faaaliga i le Konafesi Aoao o Aperila 2020. Na ia saunoa mai:
“Ua faatulagaina e Iosefa Samita se mamanu mo i tatou i le taliina o a tatou fesili. I le gauai atu i le folafolaga a Iakopo pe afai ua leai se poto ia i tatou ia tatou ole atu i le Atua, sa avatu ai e le taulealea o Iosefa lana fesili ma tuusao atu i le Tama Faalelagi. Sa ia saili atu i faaaliga faaletagata lava ia, ma o lana sailiga na matala ai lenei tisipenisione mulimuli.
“I se tulaga faapena, o le a se mea e tatala mai e lau sailiga mo oe? O le a le poto e le o ia te oe? O le a se mea e te lagonaina ua manaomia vave ona iloa pe malamalama i ai? Mulimuli i le faataitaiga a le Perofeta o Iosefa. Saili se nofoaga filemu e mafai ona e alu soo i ai. Ia faamaualaloina oe lava ia i luma o le Atua. Liligi atu lou loto i lou Tama Faalelagi. Liliu atu ia te Ia mo ni tali ma le mafanafana.
“Tatalo atu i le suafa o Iesu Keriso e uiga i ou atuatuvalega, ou popolega, ou vaivaiga—ioe, o faanaunauga o lou loto. Ona faalogo lea! Tusi i lalo manatu e oo mai i lou mafaufau. Faamaumau i lalo ou lagona ma tulitatao i faatinoga e uunaia oe e fai. A e faisooa lenei faagasologa i lea aso ma lea aso, masina ma lea masina, tausaga ma lea tausaga, o le a e “ola ai i le mataupu faavae o faaaliga”.3