Itulau i le lotoifale
Sa Avea o Ia, ma O le a Avea Pea ma o Tatou Taiala
Na matou ola ae ma nai ou tei ma se talitonuga i le Atua, ae e le lolotu lo matou aiga. Sa fai lava mea matou te fiafia i ai ma e matou te lei ano lava e aoao e uiga i lo tatou faamoemoega i le lalolagi.
Ae, i le toeitiiti lava avea au o se talavou, na maliliu ai nisi o tagata o le aiga, ma sa ou mafaufau ai pe o le a ou toe vaai ea ia i latou. Ou te manatua lou tamā matua i lona lapatai mai e aua nei o matou momoe soo ona a matou oti, o le a matou momoe e faavavau, ma sa ou fiailoa ai lava. Pe o le oti ua na o se nofoaga pogisa o le moe e faavavau?
Ao sailiili lo’u agaga mo le tali i le mea e tupu pe a mavae lo tatou oti, sa i ai se tuaoi—sa avea muamua o se epikopo mo Le Ekalesia a Iesu Keriso o le Au Paia o Aso e Gata Ai—na ia auina mai ni faifeautalai mai lana ekalesia e feiloai ma i matou. Sa la aoaoina lo’u uso, o Fiasili, ma a’u i le talalelei toefuataiina a Iesu Keriso ma faailoa i ma’ua i le Fuafuaga o le Faaolataga, lea na taliina a’u fesili uma e uiga i le oti.
Sa lei pine ae papatisoina i maua ma Fiasili. Na 13 ona tausaga ao au na o le 12.
Na fiafia o ma matua i lo ma auai ai i le Ekalesia, ae la te lei mananao lava i se vaega o le Ekalesia mo i laua. Ina ua uma ona ma papatiso, sa ma taumafai malosi ma lou uso e auai e le aunoa i sauniga lotu, ae sa lei faigofie, ae maise lava i le feagai ai ma luitau i lo matou aiga. Mo se faataitaiga, e masani ona ma filifili i le va o le o i le sauniga faamanatuga ma le faaaluina o le Aso Sa i le matafaga ma lo matou aiga.
Ae sa ma galulue lava ma Fiasili e faamalosia le molimau a le tasi ma le isi. Sa ma mafaufau pe ana mafai foi ona talia e o ma matua le talalelei, semanū ma te le ola i ni lalolagi se lua. O lea, sa ma valaaulia ai faifeaulatai e aoao i laua, ma i le faagasologa, o le ma tuagane laitiiti—ma le toatale o ma tausoga na matou nonofo faatasi—na auai i le Ekalesia.
Sa umi sina taimi mo ou matua. Na iu lava ina papatisoina lo matou tina ao auauna atu lou uso o se faifeautalai i Suva, Fiti. Sa fai si umi o lē toe toaga lo matou tama, ma sa o se fiafiaga tele le vaaia o i laua ua amata ona o mai faatasi ma i matou i le lotu.
Ona oo lea i le 2019, sa valaauina au i le Misiona i le Aai o Quezon, Filipaina. O le auauna atu ai iina sa pei o le ola ai i se miti—ou te fiafia lava i le aganuu a Filipaina ma manao lava e aoao le gagana Takaloka. Ae o aafiaga o lau misiona na aoaoina ai foi au i le natura moni o o tatou Matua Faalelagi, ma ina ua ou toe foi mai i Samoa i le tausaga na tea nei, sa ou lagonaina malosi le naunau e vaai i lo’u aiga o faamauina i le tasi ma le isi mo le taimi nei ma le faavavau atoa.
O loo iai ni galuega e tatau ona matou faia ao lei ausia lena sini. E fou ou matua i le talalelei ma o loo faaauau pea ona aoao e uiga i sauniga faaola o le talalelei. O loo sailia pea e lou tuagane lona ala—sailiili pe aofia le misiona i lona olaga—ma o maua ma Fiasili o loo ma faaauau pea. Ua ma naunau e “fetaomi atu i luma ma le tumau ia Keriso, ma se susulu atoatoa o le faamoemoe, ma le alofa i le Atua” (2 Nifae 31:20), ao ma taumafai e fesoasoani e faaloloto le liua o lo matou aiga.
O nisi taimi ou te manatunatu ai i le auala na matou maua ai ma ou tei le talalelei ma tumau maumaututu ai i nei tausaga e tele, ae maise lava i le leai ai o matou matua i le lotu mo se taimi umi. Ua ou iloa nei na taialaina i matou e lo tatou Tama Faalelagi i le taimi atoa. E ui i o matou luitau, ua matou lagonaina Lona aao i o matou olaga taitasi, ma ua ou iloa lena mea—e pei lava ona sa Ia faia mo le au sa Iareto i le Eteru 2:7—O le a Ia le mapu lava seia tatou oo atu i le matafaga matagofie o lena laueleele folafolaina ua saunia mo i tatou.