PARAU PORO’I A TE FEIĀ FA’ATERE O TE ĀREA
Te heheura’a o te ta’ata iho—E fa’a’itera’a nō ’ō mai i te Atua ra, tō tātou Metua
E ’ere te mau peropheta ana’e tē fāri’i i te heheura’a. ’Ia au i tō ’outou ha’apa’o maita’i, e nehenehe ’outou e fāri’i i te heheura’a nō te tauturu ia ’outou i roto i tō ’outou mau hina’aro, te mau hōpoi’a, ’e te mau uira’a ’e nō te tauturu ia ’outou ’ia ha’apūai i tō ’outou ’itera’a pāpū1.
’Ia ha’amana’o ana’e au i te roara’a e 40 matahiti tō’u rirora’a ’ei melo i roto i te ’Ēkālesia a Iesu Mesia i te Feiā Mo’a i te Mau Mahana Hope’a nei, tē māere nei au ’e tē māuruuru ato’a nei nō te mau ’itera’a maita’i o tē taui i te orara’a tā te heheura’a a te ta’ata iho nō ’ō mai i tō’u Metua here i te ao ra i fa’atupu ’e ’o te ora noa nei ā i roto i tō’u orara’a.
Tē ha’amana’o pāpū nei au i tō’u ’itera’a hōhonu mātāmua no te heheura’a a te ta’ata iho. 17 matahiti tō’u ; ’ua tupu te reira i roto i te fare o tō’u nā metua i Suva (Fiji). Tei roto vau i tō’u piha ta’otora’a ’o vau ana’e, tē tai’o ra i te Buka a Moromona ma te hina’aro pāpū ’ia ’ite nā roto iā’u iho ē, e parau mau ānei teie buka. Terā te tītaura’a tā te mau misiōnare rave tāmau, ’o Elder Rian Nelson ’e ’o Elder Randy Price i hōro’a mai iā’u i muri a’e i tā rāua ha’api’ira’a nō ni’a i te peropheta Iosepha Semita ’e te huru nō tōna fāri’ira’a i te ’api ’auro nā roto mai i te mēlahi, ’e te hurira’a i te reira i roto i te reo Peretāne.
’Ua tai’o mai nā misiōnare i te tahi mau ’īrava i roto i te Buka a Moromona i roto i tā mātou ’āparaura’a, ’e ’ua fa’a’ite mai rāua i te mau ’itera’a pāpū pūai ’e te māramarama. ’Ua putapū roa vau, ’e ’ua hina’aro vau ’ia ’ite nā roto iā’u iho ē, nā te Atua mau ānei te mau mea tā rāua i fa’a’ite mai iā’u ’e ’ua hina’aro vau e parau i te mau mea tā rāua i parau mai, mai tā rāua ato’a i ’ite ’e tā rāua i ti’aturi.
’Ua tai’o vau i te 3 Nephi pene 11 ; fātata i terā iho taime, ’ua ha’amata vau i te hāro’aro’a ’e i te māramarama. ’Ua feruri au i te Fa’aora, ’o Iesu Mesia, tē pou mai ra nā ni’a mai i te ra’i ’e tē ti’a ra i rotopū i te naho’a ta’ata, ma te toro i te rima nō te ani ia rātou ’ia haere mai iāna ra, nō te ’ite i te mau tāpa’o o te puta naero i roto i tōna nā rima ’e tōna nā ’āvae. ’Ua nā reira rātou te tahi i muri i te tahi, ’e i muri a’era, ’ua topa a’era rātou i ni’a i te repo ’e ’ua ha’amori atura iāna ’ei Mesia i fafauhia mai ra2.
’Ua ’ī a’era tō’u tino tā’āto’a i te mau mana’o māhanahana, te au māite ’e te hau, ’e ’ua tahe a’era te roimata o te here, te ’ā’au mēhara ’e te māuruuru nō te Fatu ’e nō tāna misioni o te here ’e te aroha. I taua taime ra, ’ua ’ite a’era vau ē, teie te hō’ē fa’a’itera’a pae vārua nō te ra’i mai… e parau mau ’e nā te Atua te mau mea tā’u i tai’o ’e tā’u i ’ite.
Te mau mana’o nehenehe tā’u i fāri’i ’e te mau misiōnare i te mahana nā mua atu, ’ua ho’i fa’ahou mai te reira, i teie rā taime, ’o vau ana’e ïa. Nō’u iho te fa’aurura’a a te Vārua Maita’i ’e e mea pūai. ’Aita vau i hina’aro ’ia hope tāua taime faufa’a rahi ra. I tāua taime ra, ’ua ’ite a’era vau ē, e aha te heheura’a a te ta’ata iho. I te mau taime ato’a ’a fa’a’ite ai au i te reira ’itera’a i te roara’a o nā matahiti e 40 i ma’iri, e fa’a’ī te reira ’itera’a pāpū tāmarū a te Vārua Maita’i i tō’u ’ā’au.
Te tahi atu ’itera’a tā’u i fāri’i nō ni’a i te fāri’ira’a i te heheura’a o te ta’ata iho, o te taime ïa ’a tāvini ai au ’ei patereareha nō te titi. ’Ua māere au ’e ’ua ha’eha’a ho’i ’ia fāri’i i te heheura’a mai roto mai i te Vārua Maita’i i te mau taime ato’a ’a tu’u ai au i tō’u nā rima i ni’a i te upo’o o te mau melo tei haere mai nō te fāri’i i tō rātou ha’amaita’ira’a patereareha. I te mau taime ato’a, ’ua tu’uhia mai i roto i te hōhonura’a o tō’u ferurira’a te fa’aurura’a māramarama tā’u i fāri’i, ’e ’ua ti’a iā’u ’ia hōro’a i te ta’ata tāta’itahi te mau ha’amaita’ira’a tā te Atua tō rātou Metua, i hina’aro ’ia fāri’i rātou. Tā’u ’ohipa, ’o te fa’aro’o maita’i ïa… ’e ’ia fa’ahiti i te mea tā’u i fāri’i.
Noa atu ē, e mea ta’a ’ē ri’i teie nā ’itera’a, te vāhi ’aifāito rā ’oia ho’i, e tītau vau i te heheura’a nō ’ō mai i te Atua ra nō te ha’api’i, nō te arata’i ’e nō te tāmāhanahana iā’u ; ’e ’ua ti’aturi au ē, e ha’amaita’i mai ’oia iā’u i te reira.
’Ua ha’api’i mai tō tātou peropheta ora ’o te peresideni Russell M. Nelson ia tātou i te mau parau tumu o te heheura’a i roto i te ’āmuira’a rahi nō ’Ēperēra 2020. ’Ua parau ’oia :
« ’Ua hōro’a te peropheta Iosepha Semita i te hō’ē hi’ora’a nō tātou ’ia pe’e nō te ’ite i te pāhonora’a i tā tātou mau uira’a. ’Ua ’umehia te tamaiti ra ’o Iosepha i te parau a Iakobo ē, tē ’ere ra tātou i te ’ite e ani i te Atua, ’e ’ua tu’u ’āfaro ’oia i tāna uira’a i mua i te Metua i te Ao ra. ’Ua ’imi ’oia i te heheura’a nōna iho, ’e ’ua ’īriti tāna ’imira’a i te ’ūputa o teie tau tu’ura’a hope’a.
« Nā reira ato’a, e aha te mea tā tā ’outou ’imira’a e ’īriti atu ? E aha te ’ite tā ’outou e ’ere ra ? E aha tā ’outou e mana’o ra, e mea rū ’ia ’ite ’aore rā ’ia māramarama ? E pe’e i te hi’ora’a o te peropheta Iosepha Semita. E ’imi i te hō’ē vāhi hau e haere pinepine atu. E fa’aha’eha’a ia ’outou i mua i te Atua. E nīni’i i tō ’outou ’ā’au i mua i tō ’outou Metua i te Ao ra. E fāriu i ni’a iāna nō te mau pāhonora’a ’e te tāmāhanahanara’a.
« E pure nā roto i te i’oa o Iesu Mesia nō ni’a i tō ’outou mau māna’ona’ora’a, mau mata’u ’e mau paruparu—’oia, te hia’ai mau o tō ’outou ’ā’au. ’Ei reira e fa’aro’o atu ai ! E pāpa’i i te mau mana’o e tae mai i roto i tō ’outou ferurira’a. E pāpa’i i tō ’outou mau mana’o ’e e pe’e i te reira nā roto i te ’ohipa tei fa’auruhia ’outou ’ia rave. Mai te mea ē e tāmau noa ’outou i teie ’ohipa i terā mahana ’e terā mahana, i terā ’āva’e ’e terā ’āva’e, i terā matahiti ’e terā matahiti, e « tupu ïa ’outou i te rahi i roto i te parau tumu o te heheura’a ».3