TE MAU ’API NŌ PĀTIFITA
’Ia ha’apa’ohia tō ’oe hina’aro
’Ua ha’api’i mai Iesu ia tātou ’ia pure ma te fa’aro’o ’e te ti’aturi hope roa i te Atua. ’Ua ha’api’i ’oia i tāna mau pipi mātāmua : « E nā ’ō ’outou ’ia pure… ’Ia tae tō ’oe ra bāsileia. ’Ia ha’apa’ohia tō ’oe hina’aro i te fenua nei, mai tei te ra’i ato’a na » (Luka 11:2).
Teie te mau ta’o faufa’a i ’ō nei, « ’Ia ha’apa’ohia tō ’oe hina’aro ».
E māna’ona’o ihoa tātou i tō tātou iho mau hina’aro, nō reira, tē mana’o nei au ē, e pinepine tātou i te ’ōu’a i teie arata’ira’a. ’E ’aore rā, i te tahi taime, tē parau nei tātou, « ’Ia ha’apa’ohia tō ’oe hina’aro », mai te hō’ē mea e ha’amana’ohia, ’eiaha rā mai te reira.
Tei te mau vāhi ato’a te Atua ’e e Atua mana hope. E auraro tātou i tōna hina’aro, nō te mea ’ua ’ī ’oia i te here hope ’ore ’e i te hi’ora’a mure ’ore i tītauhia nō te fa’atītī’aifaro i tō tātou mau hina’aro nā roto i te ravera’a ti’a. Te ti’aturira’a i tōna hina’aro ’o te hō’ē ïa ōfa’i niu nō te mau pure maita’i.
’Ua fa’ahoho’a tō tātou Fa’aora o Iesu Mesia i teie ha’api’ira’a, i roto i Getesemane, i te taime ’a perehu ai ’oia i raro a’e i te teimaha o te mau hara a te ao nei, ’a tāparu ai ’oia, « E tā’u Metua ē, i ti’a ra, e hōpoi ’ē atu i teie nei ’āu’a, ’ia tupu rā tō ’oe hina’aro, ’eiaha tō’u » (Mataio 26:39).
E’ita paha tā tātou mau pure e pāhonohia i te mau taime ato’a mai tā tātou e hina’aro, mai te mea rā ē, e vaiiho tātou i tōna hina’aro ’ia upo’oti’a, ’ua fafau mai tō tātou Metua i te ao ra ia tātou i te hau i roto i te mau taime fifi.
I te hō’ē maorora’a pō, ’ua ma’ihia tō’u metua tāne, ’ua tūturi au i te hiti o tō’u ro’i ’e ’ua pure au i te Fatu ma te pūai hope o tō’u ’ā’au ’e tō’u vārua ’ia tauturu mai ’oia iā’u ’ia ’ite e aha tā’u e nehenehe e rave nō te tauturu i tō’u pāpā. ’Ua pure au ma te fa’aro’o ’e te ti’aturi hope i tō’u Metua i te ao ra. ’Ua pure au, i muri iho, ’ua fa’afa’aea ri’i, ’ua pure, ’e ’ua fa’afa’aea fa’ahou, ma te tāmata mau i te feruri hōhonu. ’Ua tāmata mau vau i te ha’apa’o maita’i i te Vārua Maita’i.
’E i muri iho, ’ua tupu mai te hō’ē mana’o i roto iā’u, ’e ’ua parau vau iā’u iho, « Tē tāmau noa nei ’oe i te ani i te Fatu ’ia hōro’a mai i te mea tā ’oe e hina’aro ra. ’E ’ōna e aha tāna e hina’aro » ?
Teie te mau parau i roto i tō’u vaha i muri iho, « E te Metua i te ao ra tē hina’aro mau nei au ’ia ora tō’u pāpā. Tē hina’aro mau nei au ’ia fa’aea mai ’oia i pīha’i iho ia mātou. Terā rā, mai te mea ē, e ’ere te reira i tā ’oe fa’anahonahora’a nōna, ’ua ti’a ïa iā’u ’ia vaiiho iāna ’ia haere. ’Ua ineine au nō te fāri’i i tō ’oe hina’aro ».
’Ua paraparau mai te Fatu i tō’u ’ā’au ’e ’ua nā ’ō mai ē, « E tā’u tamāhine fa’aro’o ē, nō tō ineine i te fāri’i i tō’u hina’aro, ’eiaha i tō ’oe iho, e tāmāhanahanahia ’oe ’e e ha’amaita’ihia i te hau ».
’Ia po’ipo’i a’e, ’ua ho’i tō’u pāpā iti i te fare i tō tātou Metua i te ao ra ra… ’e ’ua fāri’i au i te hō’ē marū nehenehe ’e te hau i roto i tō’u ’ā’au. ’Ua ’ite au i te here mau o te Atua iā’u.
Noa atu tō’u ’oto, ’ua tāmarū te Fatu i te reira, ’e ’ua fa’a’ōhie i te amora’a i te mauiui. ’Ua tāmau noa vau i te ’ite i tāna tāmāhanahana i roto i te mau rāve’a rau, ’e nā roto i te mau hoa e rave rahi ’e te mau melo o te ’utuāfare. ’Ua ha’amaita’i-rahi-hia vau mai tā te Atua i fafau mai.
’Ua fa’ahiti au i te tahi atu pure nō te ha’amāuruuru iāna, ’e nō te fa’a’ite i tō’u here rahi iāna.
Tē mauruuru nei au nō te hōro’a faufa’a rahi ’e te nehenehe o te pure. E ha’amaita’ira’a pāpū mau te ’āparaura’a i tō tātou Metua i te ao ra. E mata nā tātou i te fa’atupu i te fa’aro’o nō te fāri’i i tōna hina’aro i roto i te mau mea ato’a, ’e ’ia ti’aturi ē, e ’ite tōna here hanahana ia tātou i roto i te mau tītaura’a ato’a o te orara’a nei.