TE MAU ’API NŌ PĀTIFITA
Te ’ō’oti-tāmau-ra’a i te mau maita’i
Ha’api’i ’ia vai maita’i ’e te itoito i Hāmoa.
I te hōro’a-ra’a-hia te fa’anahora’a nō te ’Amu maita’i ’e ’ia itoito, i roto i te hō’ē titi fātata mai, ’ua feruri a’ena te tuahine Sinafoailuga Rifat Taatiti Leiataua i te parau nō te ea. ’Ua fa’aoti ’oia ’e te tahi mau hoa nō tāna pāroita 6 nō Apia Samoa Pesega, ’ia tāpa’o ia ratou—nō te hi’o ē, e tauturu ānei teie ha’api’ira’a ia rātou ’ia rave i te tahi mau tauira’a rahi i roto i te huru o tō rātou orara’a.
« Hina’aro vau e ha’api’i hau atu nō ni’a i te mā’a maita’i ’e ’ia ha’apārarai », te parau ïa a Sinafoailuga, « ’e ’ua hina’aro ato’a vau ’ia fa’a’ite i te hō’ē hi’ora’a maita’i nō tā’u tāne ’e tō’u ’utuāfare ».
Nā te ’Ēkālesia a Iesu Mesia i te Feiā Mo’a i te Mau Mahana Hope’a nei i fa’aineine i te ha’api’ira’a nō te ’Amu maita’i ’e ’ia itoito (AMII) ’ei pāhonora’a i te hō’ē fifi e tupu noa ra i te rahi ’o te ma’i omaha tihota ’e te tahi atu mau ma’i e ’ere i te mea pe’e i Patifita nei. ’Ua niuhia teie ha’api’ira’a i ni’a i te ihi rapa’āura’a ma’i nō ni’a i te ea ’e te ’amura’a i te mā’a, ’e i ni’a ato’a i te mau arata’ira’a a te ’Ēkālesia nō te ora maita’i i te pae tino ’e i te pae vārua, tei parauhia te Parau pa’ari. E hōro’ahia te reira nā roto i tā tātou fa’anahora’a tūreiara’a nō te fa’arava’ira’a i te ta’ata iho ’e ’ua fa’anahohia te reira nō te mau melo i roto i te ārea nō Patifita.
Nō te roara’a 12 hepetoma, ’ua fa’aterehia te ha’api’ira’a (AMII) a Sinafoailuga hō’ē taime i te hepetoma, ’e ’ua putuputu rātou e toru taime i te hepetoma nō te fa’a’eta’eta i te tino. ’Ua au a’e rātou i te ’āpitira’a i te Zumba ’e te Tabata—e fa’a’eta’etara’a pūai i te tino. Nō te au ’o Sinafoailuga i te reira, ’ua tae mai ’oia i te mau hora fa’a’eta’etara’a ato’a ’e e mea pinepine ’oia i te fa’aea mai nō te fa’a’eta’etara’a tino hau atu.
E ’ere rā te reira ana‘e. ’Ua hōro’a teie pupu AMII i te mau tītaura’a i te tahi ’e te tahi i te roara’a o tā rātou fa’anahora’a. ’Ei hi’ora’a, te vai ra hō’ē tītaura’a ’oia ho’i, ’eiaha e ’amu i te i’o pua’a e 6 hepetoma te maoro. Te tahi atu ’o tē inura’a ïa i te pape taporo ’e te pape re’a tinitō i te mau po’ipo’i ato’a, te ’amura’a hō’ē ana’e mereti mā’a i te tāmā’ara’a hō’ē, ’e te ’amura’a i te hō’ē tāmā’ara’a po’ipo’i rahi ’e te hō’ē tāmā’ara’a ahiahi na’ina’i. ’Ua fafau ta’a ’ē o Sinafoailuga ’ia inu i te pape ’e ’ia fa’aiti i te ’amura’a i te i’o pua’a.
« ’Ua ha’api’i au nāhea ’ia fariro i te ’amura’a mā’a maita’i ’ei tuha’a nō tō’u huru orara’a », tāna ïa parau. « E nehenehe au e ’amu i te mā’a maita’i ’e e inu rahi i te pape—’aita e inu monamona fa’ahou—’e ’oia ato’a, ’ia fa’aineine ana’e au i te tāmā’ara’a ahiahi nā tō’u ’utuāfare, e mea ti’a iā’u ’ia tu’u i te mau taime ato’a i te pota nō te mea tē hina’aro nei au ’ia ’amu tō’u ’utuāfare i te hō’ē ā mā’a [maita’i] tā’u e ’amu ».
Te tahi mea ’āpī tā Sinafoailuga i ha’api’i mai i roto i teie ha’api’ira’a ’oia ho’i, nāhea ’ia arai i te mana’o ahoaho. ’Oia mau, te ’amura’a i te mā’a maita’i ’e ’ia rahi te fa’a’eta’etara’a i te tino, e tauturu maita’i te reira, terā rā ’ua ha’api’i ato’a mai ’oia ē, i te mau taime ahoaho, e nehenehe tāna « e pārahi noa i raro ’e ’ia feruri [i te mau mea] e piti a’e taime. E pure ato’a i te Atua nō te tauturu ».
’Ua fa’aoti manuia maita’i ’o Sinafoailuga i tāna ha’api’ira’a ’Amu maita’i ’e ’ia itoito i te hope’a o te matahiti 2020, ’e te ’ō’oti tāmau noa nei ’oia i te maita’i o te mau mea ato’a tāna i ha’api’i mai.
« I teienei e nehenehe au e ō [i roto] i te rahira’a ’o tō’u mau ’ahu ’e e nehenehe tā’u e rave i tā’u mau ’ohipa i te tā’āto’ara’a o te mahana », tāna ïa parau. « Nā mua a’enei rā, e’ita tā’u e nehenehe e fa’aoti hō’ē ’aore rā, e piti ’ohipa i te hō’ē mahana, nō te mea e mea hupehupe roa vau ’ia haere ’e ’ia pi’o ato’a i raro, e mea fifi roa ».
Tē tāmau noa nei ’oia i te rave i te ’ohipa ’e tōna ’utuāfare—tāna tāne, tōna metua vahine ’e e piti tamaiti fēti’i—ma te fa’aitoito ia rātou ’ia pe’e i tōna hi’ora’a nō te hō’ē huru orara’a maita’i a’e ’e te itoito. Tē mana’o nei ’oia ē, maita’i ē, e nehenehe te mau ta’ata ato’a e tāpa’o ia rātou i roto i te fa’anahora’a Amu maita’i ’e ’ia itoito.
« ’Ua riro teie ha’api’ira’a ’ei ha’amaita’ira’a rahi nō’u », tāna ïa parau. « ’Ua tauturu te reira iā’u ’ia tu’u i te ea ’e te ora maita’i nā mua nō’u ’e tō’u ’utuāfare, ’e ’ua fa’a’ite mai te reira iā’u i te here rahi o tō tātou Metua i te ao ra ia tātou ».