Pule, Sauniga, ma Sauniuniga
Saunia e Peresitene Dallin H. Oaks
Fesoasoani Muamua i le Au Peresitene Sili
O sauniga o le faaolataga ma le faaeaga e taua i le fuafuaga sili a le Atua mo, ma le sauniuniga, o Lana fanau.
Atapue o le Malumalu o Tegucigalpa Honduras, na saunia e Cody Bell
O tusitusiga paia e tamaoaiga i mau faasino i le Afio Mai Faalua, o se mea e faatalitali ma le naunautai i ai e amiotonu ma taufaamatau pe faafitia e e amioleaga. “Ia tuu atu le alaga ia alu atu i totonu o tagata uma,” na lapatai mai ai le Alii i le amataga o le Toefuataiga. “Faauta, ma tagai, ua afio mai le Faatoafaiavā. … Ia saunia outou lava mo le aso tele o le Alii” (Mataupu Faavae ma Feagaiga 133:10; tagai foi i le 34:6).
Saunia e Feiloai ma le Atua
O loo tatou ola i le taimi na valoia “o le taimi o le a aveesea ai le filemu mai le lalolagi” (Mataupu Faavae ma Feagaiga 1:35), lea “o le a vavao mea uma; ma … o loto o tagata o le a faatoilaloina i latou “(Mataupu Faavae ma Feagaiga 88:91). Ua siomia i tatou i luitau i itu uma, ae o le faatuatua i le Atua, tatou te faalagolago ai i faamanuiaga ua Ia folafola mai ia i latou o e tausia Ana poloaiga ma saunia.
I le avea ai ma se vaega o a tatou sauniuniga ina ia fetaiai ma Ia, ua poloai mai ai le Alii, “Ia outou tutu ai i nofoaga paia, ma aua le masii ese, seia oo mai le aso o le Alii; aua faauta, e vave lava ona oo mai ”(Mataupu Faavae ma Feagaiga 87:8). O a na “nofoaga paia”? E mautinoa lava e aofia ai le malumalu, e auai ai i latou o e tausia a latou feagaiga ma le faamaoni. E moni lava e aofia ai nofoaga o auaunaga a faifeautalai faamaoni ma isi na valaauina e le pule o le perisitua. A o tatou tutu i nofoaga paia, tatou te faaaogaina ma oo atu i le pule o le perisitua ma tatou te sailia sauniga e manaomia mo le faaeaga ma le ola e faavavau.
Pule o le Perisitua i le Ekalesia Toefuataiina
I le tolusefulu tausaga ua mavae, sa ou maua ai se aafiaga i le auala e ese ai le pule o le perisitua i Le Ekalesia a Iesu Keriso o le Au Paia o Aso e Gata Ai mai isi ituaiga o pulega. Sa sau i lou ofisa le avā a se faifeau Porotesano lauiloa. Mo le tele o tausaga sa la auauna atu ai ma lona toalua i le Alii ma le filiga tele i se galuega faa-Kerisiano. O lenei ua manao o ia e auai i le Ekalesia toefuataiina, ae sa i ai sona popolega.
Na sau o ia e fesili mai pe aisea e tatau ai ona papatiso o ia ina ua uma ona papatiso o se Kerisiano e lona toalua, o le sa papatisoina le tele o tagata i lana aulotu. Sa fesili o ia, “O e tauina mai ia te au e le’i i ai i lo’u toalua se pule e papatiso ai na tagata uma na ia papatisoina?”
Na afio mai le Agaga e fesoasoani ia te au, a o ma tatalo atu mo nei tulaga.
“E leai, ou te talitonu o loo i ai i lou toalua le pule mo na papatisoga,” o lau tali lea. “Na ia te ia le pule uma lava i lana lotu, lana faapotopotoga, ma tulafono o le laueleele, e mafai ona tuu atu ia te ia. Na ia faaaogaina lena pule i le papatisoina, faatinoina o faaipoipoga, faaaogaina o tagata mo manaoga faaletino o lona fausiaina o le lotu, ma le tofia o tagata e auai i ana sauniga tapuai. Tatou te le fesiligia lena pule, ae matou te mananao ia outou iloa se ituaiga o pule e ese: o le mana ua tuuina mai e le Atua i tagata soifua.”
Sa ou faamalamalama atu e faapea, o le mea e mafua ai ona tatou manaomia le papatisoga mo tagata ua liliu mai i le Ekalesia toefuataiina a Iesu Keriso, o le manaomia lea o le papatisoga e le pule paia na tuuina atu e Iesu ia Peteru ma isi Aposetolo. Faatasi ai ma lena pule, sa Ia tau atu ai ia i latou soo se mea latou te fusifusia ai i le lalolagi o le a faamauina i le lagi (tagai i le Mataio 16:19; 18:18). I se isi faaupuga, o le a aoga ma taua i talaatu o le veli o le oti ina ia faamalieina ai mea e manaomia o le lagi. Sa ou molimau atu ia te ia o lenei pule ua toefuatai mai ma ua na o Le Ekalesia a Iesu Keriso o le Au Paia o Aso e Gata Ai lava o loo maua ai. I se taimi mulimuli ane, na papatisoina ai lenei tina ma lona toalua. Sa ou iloaina i la’ua mo le tele o tausaga o ni tagata faamaoni o le Ekalesia.
O le taua o le pule o loo molimauina i le tele o tala faatusi paia o le galuega a le Faaola i le lalolagi. Ua tatou faitau foi na ofo tagata sa Ia aoaoina “i lana mataupu; aua ua ia aoao ia te i latou e pei o se ua i ai le pule, a e le pei o le au tusiupu” (Mataio 7:28–29; tagai foi Mareko 1:22; Luka 4:32). I se sunako sa latou “maofa” ai “i le pule ua poloaiina ai e ia o agaga leaga, ma ua latou usiusitai ia te ia” (Mareko 1:27; tagai foi i le Luka 4:36). Sa tau atu e Iesu i le au tusiupu na fesili atu “ua i ai i le Atalii o le tagata i le lalolagi le pule e faamagalo ai agasala” (Mareko 2:10; tagai foi i le Luka 5:24).
Mulimuli ane, sa fesili atu le au faitaulaga sili ma toeaina ia te Ia po o le a le pule sa Ia faatinoina (tagai i le Mataio 21:23–27; Mareko 11:27–33). Latou te lei ausia Ona tulaga manaomia mo se tali. Ae o le mea na Ia fetalai mulimuli ane ai ma faia sa Ia faailoa mai ai Lana tali. Ina ua Ia valaauina Ana Aposetolo, na Ia “faauuina” i latou (Ioane 15:16), “ina ia mafai ona Ia auina atu i latou e talai atu, ma ia i ai le mana e faamalolo ai mai, ma tutuli ese temoni” (Mareko 3:14–15; tagai foi Mataio 10:1; Luka 9:1; Galuega 8:18–19). Ina ua Ia valaauina le au Fitugafulu, sa Ia tuuina atu ia i latou le “mana” (Luka 10:19).
Sa i ai i le Faaola le mana paia ma le pule, ma sa Ia faasoaina atu. E pei ona fai mai Ioane le Papatiso, ua tuu atu e le Tama “mea uma i lona aao” (Ioane 3:35).
O Le Matafaioi o Sauniga
O faataitaiga sili ona masani ai o le faaaogaina o le pule o le perisitua e aofia ai sauniga. O sauniga ma le perisitua e le mavavaeeseina. O se sauniga o se faatinoga paia o le taua e faavavau, e faia i le pule o le perisitua. E o faatasi ma le osia o feagaiga ma le folafolaina o faamanuiaga. O sauniga o le Ekalesia toefuataiina a Iesu Keriso e aofia ai le papatisoga, o le tagofia o le faamanatuga (o le sauniga e sili ona fai soo i le Ekalesia), ma sauniga o le malumalu, e aofia ai faaipoipoga mo le taimi nei ma le faavavau atoa ma le meaalofa o le mea ua tatou ta’ua o le faaeega paia, lea e aofia ai le malamalama, feagaiga, ma faamanuiaga folafolaina.
O tulaga manaomia o sauniga e tuuina mai e le Atua ma e i ai sona aafiaga e faavavau. “E i ai se tulafono, na folafola le maaveesea i le lagi i luma atu o le faavaega o le lalolagi lenei ua faavae ai i luga faamanuiaga uma” (Mataupu Faavae ma Feagaiga 130:20). Ma “o i latou uma o e e fia mauaina se faamanuiaga i [aao o le Alii] ia mau i le tulafono na tofia mo lena faamanuiaga, ma ona tulaga, e pei ona sa faatutuina mai i luma atu o le faavaega o le lalolagi” (Mataupu Faavae ma Feagaiga 132:5).
O sauniga o le faaolataga ma le faaeaga e taua i le fuafuaga sili a le Atua mo Lana fanau. Na aoao mai Iesu e faapea o le faaolataga i le malo o le Atua e sau i le “fanau i le vai ma le Agaga” (Ioane 3:5). O le faaeaga (ola e faavavau, “o le ituaiga ma le tulaga lelei o le olaga o loo soifua ai le Tama Faalelagi ma Lona Alo Pele”1) e maua mai feagaiga ma sauniga e maualuga atu o le malumalu (tagai Mataupu Faavae ma Feagaiga 14:7; 84:38; 88:107; 132:16–17, 20–21). Na aoao mai lo tatou perofeta, o Peresitene Russell M. Nelson, “O lenei olaga o le taimi lea e sauniuni ai mo le faaolataga ma le faaeaga. I le fuafuaga e faavavau a le Atua, o le faaolataga o se mataupu e patino i le tagata lava ia; o le faaeaga o se mataupu faaleaiga.”2
Saunia e Fetaiai ma le Faaola
E Toe Afio Mai o Ia e Pule ma Nofotupu, saunia e Mary Sauer
I faaaliga o ona po nei, ua ta’u mai ia i tatou o lē e matatau i le Alii o le a “tulimata’i i luma o ia mo le oo mai o le aso tele o le Alii, e oo lava i faailoga o le afio mai o le Atalii o le Tagata” (Mataupu Faavae ma Feagaiga 45:39). I le vaitau mulimuli a o lei oo i le faaiuga o Lana galuega i le olaga nei, sa fetalai ai Iesu e uiga i Lona Afio Mai Faalua. Sa ia faamatalaina le mafatiaga o le a muamua ona oo mai ma le taua—e ui lava i na faigata—i le “saunia” (Mataio 24:44). Ona Ia tautino mai lea, “Amuia lea auauna, pe a sau lona alii, e maua o ia o loo faapea ona fai” (Mataio 24:46; tagai foi i le Luka 12:37, 43).
Na aoao mai Peresitene Nelson, “Ua na ona tatou atiina ae i le faatumutumuga o lenei tisipenisione faaiu—pe a avea le Afio Mai Faalua o le Faaola o se mea moni.”3 Ua siomia i tatou i faailoga o lena Afio Mai Faalua, ma e foliga mai ua faateleina le saoasaoa ma le malosi. I le lalolagi atoa, o loo tatou oo i le iloa po o le aoaoina o mafuie, oge, asiosio, lologa, faamai, ma feteenaiga faaauupegaina. Ae e le o nei faailoga uma e taufaamata’u. O se faailoga lelei o taimi o le faapotopotoina lea o Isaraelu lea na valoia, lea na folafola mai e Peresitene Nelson “o le mea aupito taua lea ua tupu i le lalolagi i aso nei.”4
Ao faagasolo le faapotopotoina, o loo tatou faatulagaina ni siteki, “mo se puipuiga, ma mo se sulufaiga mai le afā, ma mai le toasa pe a sasaa mai e aunoa ma le suia i luga o le lalolagi atoa” (Mataupu Faavae ma Feagaiga 115:6). O loo tatou faatelevaveina foi le fausiaina o malumalu, lea e mafai ai e tagata faamaoni ona faapotopoto i o latou lava laueleele ina ia osia feagaiga e mafai ai ona agavaa i latou mo le ola e faavavau (tagai Mataupu Faavae ma Feagaiga 84:19–22; 131:1–3).
E pei ona aoao mai le Tusi a Mamona, “O le olaga lenei o le taimi lea mo tagata e saunia ai e fetaiai ma le Atua” (Alema 34:32). Pe ua tatou saunia ea?
E faapefea pe afai o taeao le aso e afio mai ai o Ia? Afai tatou te iloa o taeao le aso tatou te fetaia’i ai ma le Alii—e ala i lo tatou oti, po o Lona afio mai—o le a sa tatou mea e fai i le asō? O a ni mea o le a tatou ta’uta’u atu? O a ni faatinoga o le a tatou tuua? O a ni faamagaloga tatou te tuuina atu? O a sauniga o le a tatou sailia? O a ni mea faaopoopo o le a tatou faia e faataunuu ai a tatou feagaiga? Afai e tatau ona tatou faia na mea i lena taimi, aisea e le faia ai nei? Afai ua latalata ina gaogao a tatou lamepa o sauniuniga, ia tatou amata vave nei loa ona tatou toe faatumuina.