Aoaoga Autu o le Talalelei
O le Perisitua o le Mana a le Atua
E faamanuiaina i tatou e le Atua e ala i le mana o le perisitua. E avanoa faamanuiaga o le perisitua i tagata uma.
O le perisitua o le mana a le Atua. Na te faaaogaina lenei mana e faamanuia ai Ana fanau uma ma fesoasoani ia i latou e toe foi atu e nonofo faatasi ma Ia. Ua tuuina mai e le Atua le mana o le perisitua i Ana fanau i le lalolagi. Faatasi ai ma lenei mana, e mafai ai e taitai perisitua ona taitai le Ekalesia, ma e mafai e e umia le perisitua ona faia sauniga paia, e pei o le papatisoga, lea e fesoasoani tatou te latalata atili atu ai i le Atua. O alii ma tamaitai uma o e mauaina ma le agavaa ia sauniga o le perisitua ma tausia feagaiga (folafolaga paia) e mafai ona maua le mana o le Atua.
Na Tuuina Atu le Mana o le Perisitua ia Iosefa Samita
Ao i ai Iesu Keriso i le lalolagi, na Ia taitaia Lana Ekalesia i le mana o le perisitua. Sa ia tuuina atu foi le mana i Ana Aposetolo. I le tele o seneturi talu ona maliliu i latou, na toatele tagata o le Ekalesia na pauu ese mai le Ekalesia. Sa le sa’o ona latou suia le talalelei ma le auala na faagaoioia ai le Ekalesia. Sa le toe i ai le perisitua a le Atua i le lalolagi. I le 1829, na auina mai ai e Iesu Ioane le Papatiso ma Aposetolo o Peteru, Iakopo, ma Ioane e tuuina atu ia Iosefa Samita le perisitua. O Le Ekalesia a Iesu Keriso o le Au Paia o Aso e Gata Ai e na’o le pau lea o le faalapotopotoga i le lalolagi e i ai lenei pule mai le Atua.
Ki o le Perisitua
O ki o le perisitua o le pule lea e taitai ai le faaaogaina o le perisitua, e pei o le tuuina atu o se faatagaga e faatino ai sauniga. O Iesu Keriso e umiaina ki uma o le perisitua. O le Peresitene o le Ekalesia ua na o le pau lea o le tagata i le lalolagi e mafai ona faaaogaina nei ki e taitaiina ai le Ekalesia atoa. I lalo o lana taitaiga, e mafai ai e isi ona faaaoga ia ki patino e fai ai le galuega a le Atua. O taitai e pei o epikopo ma peresitene o siteki e faaaogaina ki o le perisitua e taitai ai i totonu o a latou uarota ma siteki. Talu ai o valaauga e auauna atu e sau mai taitai e i ai ki o le perisitua, o alii ma tamaitai o e o loo galulue i valaauga e faaaogaina le pule o le perisitua pe a latou faia o latou tiute.
Perisitua Mekisateko ma le Perisitua Arona
E lua vaega o le perisitua: o le Perisitua Mekisateko ma le Perisitua Arona. E ala i le Perisitua Mekisateko, e taitaiina ai e taitai o le Ekalesia le galuega faaleagaga uma a le Ekalesia, e pei o le galuega faafaifeautalai ma le malumalu. O le Perisitua Arona e galue i lalo o le pule o le Perisitua Mekisateko. E faaaoga e faatino ai sauniga e pei o le papatisoga ma le faamanatuga.
O Famanuiaga o le Perisitua
E ala mai i feagaiga ma sauniga, ua faia ai e le Atua ia avanoa faamanuiaga o le perisitua i Ana fanau uma. O nei faamanuiaga e aofia ai le papatisoga, le meaalofa o le Agaga Paia, le faamanatuga, ma sauniga o le malumalu. O alii ma tamaitai ua maua faaeega paia i le malumalu, latou te mauaina se meaalofa o le mana o le perisitua a le Atua e ala ia latou feagaiga. Ua mafai foi ona tatou mauaina faamanuiaga faaleperisitua o le faamalologa, faamafanafanaga, ma le taitaiga.
O le A le Mea o loo Aoao mai e Tusitusiga Paia e uiga i le Perisitua?
O le perisitua na i ai i aso anamua e tutusa lava ma lea o loo i ai i le taimi nei (tagai Mose 6:7).
O ki o le perisitua e fesoasoani e faamautinoa ai tatou te faataunuuina le galuega a le Alii i se auala faatulagaina lelei (tagai Mataupu Faavae ma Feagaiga 42:11).
O alii o loo umia le perisitua e mafai ona faaaogaina “tau lava i mataupu autu o le amiotonu” (Mataupu Faavae ma Feagaiga 121:36).
O nisi o tiute o i latou o e umia le perisitua o loo faamatalaina i le Mataupu Faavae ma Feagaiga 20:38–67.