O Oulua o se Auso?
O le fesili a le taulealea laitiiti na faateia ai au ma aoao mai ai ia te au se lesona taua.
Ata pue mai faaaloaloga a le tusitala
O lau uo o Laurie Wharemate Keung o se Maori. O au o se e tupuga mai i Peretania. E eseese lanu o ma pa’u, lanu o ma mata, lanu o ma ulu, ma le maualuga. Sa iloagofie le ma eseese. Ae i se tasi aso a o ma auauna atu ma Laurie i tamaiti i se aoga e maualalo le tupe maua, sa faateia i maua e se tamaitiiti Maori ma sana fesili.
“O oulua o se auso?” na ia fesili mai ai.
Sa ou ataata, ma le manatu e le o faamaoni lana fesili. Ae peitai, sa toe fesili mai le tamaitiiti, “O oulua o se auso?”
O le iloaina sa faamaoni o ia, sa ou tu ai mo sina taimi ma mafaufau, “Mata e le mafai e lenei tamaitiiti ona iloa le eseesega manino i o ma’ua foliga ma ituaiga?” Masalo sa ia iloa ae sa manatu o ia e leai se eseesega. Sa ia faatalitali ma le naunautai mo lau tali.
Sa ou fai atu ia te ia e le o maua o se auso, lea na le fiafia ai o ia. Ae sa ou faaopoopo i ai, sa masani ona ma lagonaina le pei o se auso a o ma auauna atu faatasi. Sa foliga mai na faamalieina o ia i lena tali ma tamoe atu loa i lana laulau.
O le fesili faamaoni a lenei tamaitiiti na tuua ai se faailoga e le mafaagaloina ia te au. Aisea? Talu ai o lana fesili na ta’u mai ai se upumoni ia te au—e le faatapulaaina le aiga e foliga vaaia ma ituaiga. Ua faamanuiaina i maua ma lou toalua e vaetamaina le ma fanau e toalua. Ma te alolofa ia i la’ua, ma o le alofa ma le auauna atu o se vaega taua o aiga.
Pe a uma mea uma, o i tatou uma lava o fanau a lo tatou “Atua ma le Tama e tasi” (Efeso 4:6).
Sa ou faia se faaiuga faapea, atonu sa matamata lenei tamaitiiti i ma fegalegaleaiga ma Laurie. Atonu a o ia vaai mai ia i ma’ua o fesoasoani ma feopoai le tasi i le isi, na ia manatu ai o i ma’ua o se uso. O lana fesili na faamanatu mai ai ia te au, o loo matamata tamaiti i tagata matutua i taimi uma ma faia ni manatu e ala i mea tatou te fai atu ai ma faia ma pe faapefea ona tatou taulimaina le tasi ma le isi. Afai e mafai ona manatu lenei tamaitiiti o i ma’ua o se auso, e mautinoa lava e mafai e tamaiti i le salafa o le lalolagi ona manatu o i tatou uma o uso ma tuagane pe afai tatou te alolofa ma auauna atu le tasi i le isi.
O o ma eseesega na faatagaina ai Laurie ma au e aumai ni malosiaga ma ni vaaiga eseese i la ma galuega o le alofa mama, ma avea atili ai ma se mea aoga. Nai lo le faatagaina o o ma feeseeseaiga e vaevaeina ai i ma’ua, sa ma faaaogaina e fai ai mea lelei ma avea o se faigauo vavalalata. E mafai ona avea le fesili a le tamaitiiti ma se lesona mo fanau uma a le Atua.