Sau, Mulimuli Mai ia te A’u
Iloaina o le Ala ma le Mea Tatou Te Tapuai I Ai
I le Mataupu Faavae ma Feagaiga vaega 93, ua faaali mai e le Atua ni upumoni patino e uiga ia Iesu Keriso ina ia mafai ona tatou “iloa le ala e tapuai atu ai, ma iloa ai le mea [tatou] te tapuai i ai” (fuaiupu 19). Ua tuuina mai e lenei olaga ia i tatou le tele o mea faalavefau i lo tatou tapuai moni i lo tatou Tama Faalelagi ma Iesu Keriso.
“Soo se mea lava e mafuli i ai le loto o se tagata ma lona faatuatuaga o lona atua lea,” na tusia e Peresitene Spencer W. Kimball (1895–1985) i tagata o le Ekalesia i le 1976; “ma afai foi o lona atua e le o le Atua moni soifua o Isaraelu, o loo tautiga lena tagata i le ifo i tupua.”
O se vaega puupuu lenei mai le savali o loo aoga pea a Peresitene Kimball:
Ata na tusia e Katie Payne
“O se tasi alii talavou, ina ua valaauina i se misiona, na tali mai e le o ia te ia se taleni tele mo lena ituaiga o mea. O le mea sa lelei ai o ia, o le tausia lea o lana taavale fou malosi i le tulaga pito sili. …
“Faatasi ai lava, sa faamalieina lona tama ma faapea mai, ‘E fiafia o ia e faia mea i ona aao. Ua lava lena mo ia.’
“Pe ua lava ea lena mo se atalii o le Atua? E le’i iloa e lena alii talavou o le malosi o lana taavale o se mea e matua faatauvaa lava i le faatusatusa atu i le malosi o le sami, po o le la; ma e tele la o loo i ai, ua faatonutonuina uma i le tulafono ma le perisitua, ao le mea sili—o se mana o le perisitua lea e tatau ona ia atiina ae i le galuega a le Alii. Na fiafia o ia mo se atua faanoanoa, o se tuufaatasiga o uʻamea ma paʻu ma le uamea iila. …
“Ua faamautuina la tatou galuega: ia lafoai mea o le lalolagi ona e muta ia i latou lava; ia faataatia ese le ifo i tupua ma fetaomi atu i luma i le faatuatua. …
“… Pe a amata ona pueina e se tagata se vaaiga mamao i le galuega moni, pe a amata ona ia vaaia se mea o le faavavau i lana vaaiga moni, o le a amata ona avea faamanuiaga ma mea e sili atu nai lo le tau ina ia tuua ‘ le lalolagi ’ i tua atu.”1