E Faapefea ona Ou Fesoasoani i se Tamaitiiti o Loo Lagonaina le Atuatuvale?

Saunia e Heather Nelson, Licensed Clinical Social Worker, ma Derek Willis Hagey, Auaunaga i Aiga

Pe a lagona e lau tama le lotovaivai, e mafai faapefea ona e fesoasoani atu?

E lagona e tagata uma le faanoanoa po o le lotovaivai i nisi taimi. I le avea ai ma se matua, e mafai ona e vaaia suiga i amioga a lau tama e aunoa ma le malamalama atoatoa i le mafuaaga. O nisi nei o mea e tatau ona vaavaai i ai ma ni auala e fesoasoani ai i lau tama.

O le Iloaina o Tulaga e Ono Lagona ai le Popole

Afai e sili atu ona ita pe faanoanoa lau tama mo le sili atu ma le lua vaiaso, atonu o le a e mafaufau pe o loo lagona e ia le atuatuvale. E ono foliga ese le atuatuvale mo tamaiti ma le autalavou mai tagata matutua. Afai o lagona e lau tama le faanoanoa po o le atuatuvale, e mafai ona aofia ai auga nei:

Suiga tele i le amio.
Pa’ū maualalo togi i le aoga, e pei o le sau mai le A i le F.
O suiga i vaega o uo, e masani ona siitia atu ai i uo e le lelei.
Musuā.
Leai o se fiafia i gaoioiga.
Suiga i mausa o le moe, e aofia ai le tele naua po o le le lava foi o se moe.
Faigata ona taulai atu i se mea.
Vaivai.
Lē popole e uiga i le lumanai.
Faitio i mafatiaga ma tiga e aunoa ma se punavai faaletino.
Faamatalaga po o mafaufauga e uiga i le oti po o le pule o le ola.
Suiga i le taumafa.

A oo ina atuatuvale se tamaitiiti, atonu e lagona e matua e pei o lo la sese pe faapea foi ua la faia se mea sese. Manatua o le atuatuvale e le amataina i taimi uma ona o mea na faia e se tasi, ma e le mafai ona taofia e ala i le tauina atu i le tamaitiiti e taofi le lagona o le atuatuvale. O le atuatuvale i fanau e masani ona oo mai i le lagonaina o le lofituina. I le avea ai ma se matua, ia fai le mea sili e te mafaia e tumau ai i le toafimalie ma ia taulai atu i le faalogologo ma faaluaina. E mafai ona e faiaoga faalelagona i lau tama ma taitai ma le onosai ia te ia e atiae ni tomai e mafai ai ona fesoasoani e pulea lagona malolosi.

Auala e Fesoasoani i Lau Tama

Fausia se sootaga e malosi atu i le va o matua-fanau

Afai e te matauina nisi o auga na lisiina atu muamua, fesoasoani i lau tama ia lagona le lagolagoina ma le alofagia. Vaavaai mo ni auala e faaleleia ai le sootaga ma lau tama. O lenei mea e mafai ona fesoasoani i lau tama ia sili atu ai le taulimaina o tulaga lofituina. O nisi o auala e atiina ae ai le sootaga a le matua-fanau e aofia ai le:

Taimi ma le tagata-e-toatasi.
Talanoa ma faalogo.
Ia faamautinoa i lau tama o le a lelei mea uma.
Faaviivii ia te ia.
Faasino atu malosiaga.
Faailoga o le alofa.
Auauna atu i lau tama.

Ia maua le lagolago mai i isi

E ui lava o oe e nafa ma le fesoasoani i lau tama, aua e te taumafai e fai na o oe. Na saunoa mai Elder Jeffrey R. Holland o le Korama a Aposetolo e Toasefululua: “Afai e afaina lou pitogaau, o le a faamoemoeina oe e le Atua e te saili atu i se faamanuiaga faaleperisitua ma ia maua se togafitiga sili faafomai. E faapena foi ni faaletonu faalelagona. Ua faamoemoeina i tatou e lo latou Tama i le Lagi ia faaaoga ia meaalofa ofoofogia uma ua Ia saunia i lenei tisipenisione mamalu.”¹

Saili le fesoasoani mai le Tama Faalelagi e ala i le tatalo, faapea foi ma le lagolago mai aiga ma uo, taitai o le Ekalesia (e aofia ai taitai o le Perisitua Arona po o Tamaitai Talavou), ma atonu foi o se tagata aoaoina faapitoa o le soifua maloloina faalemafaufau.² Afai e te filifili e saili se fesoasoani faapolofesa, filifili se tagata e fai se fofo po o i ai se tomai e galulue ai ma tamaiti ma e mafai ona malamalama i ou atugaluga o i ai mo lau tama. E taua mo oe le auai i togafitiga ma lau tama ma, i le tele o tulaga, e auai atu i ni fofo ma ia.

O le fomai o lau tama o le isi lea punaoa e mafai ona e liliu atu i ai mo se fesoasoani. E mafai e le fomai ona fautua atu ni vailaau faafomai pe a manaomia e pulea ai faailoga o le atuatuvale.

Faaopoopo le faatulagaga i le olaga

E taua mo lau tama le i ai o se faatulagaga. Afai e iloa e lau tama le mea e faamoemoeina ma le taimi e faia ai, o le a ia lagonaina atili ai le mausali ma sili atu ai ona mafai ona fetuunai. O nisi nei o auala e faaopoopo ai le faatulagaga i le aso o lau tama po o le vaiaso:

Filifili se taimi masani e moe ai.
Ala i le taimi e tasi i aso uma.
Faasoa atu le faatulagaga mo le aso ma i latou.
Tapulaa le taimi e faaaoga ai le lau.
Ia malosi faaletino—o le o mo se savaliga faaleaiga e matua lelei tele.
Auai faatasi i le tuputupu ae faaleagaga, e aofia ai suesuega masani o le talalelei ma tatalo faaleaiga.
Aai faatasi o se aiga i aso uma.

Uunaia lau tama e auai i gaoioiga faaleaiga e pei o le taaalo i se taaloga po o le matamata faatasi i se ata tifaga. E mafai foi ona fesoasoani le faataitai o le tausia o le tagata lava ia ma aoao ia auala i lau tama e mafai ai ona ia faaaluina se taimi mo le tausiga o ia lava. E mafai ona e filifili e faamalositino pe fai faatasi ia gaoioiga faalemafaufau ma lau tama po o se aiga.

Ia manatua e mafai ona i ai se sootaga mai le aiga [genetic] ma le atuatuvale, ma o au lava tauiviga e ono mafua ai ona e lagona le lotovaivai a o e taulimaina le atuatuvale o lau tama. Afai o ia te oe ni faailoga o le atuatuvale, e taua le puleaina o na faailoga ma saili se fesoasoani faapolofesa pe a amata ona e lagona le lofituina. A e le tausia oe lava, o le a e iloa ua atili ai le faigata ona lagolago lau tama i ana tauiviga.