Manumalo i se Finauga
Sa ou aoaoina o le alofa o le Atua mo i tatou e le faavae i a tatou aoaoga, galuega, po o gafatia e manumalo ai i se finauga.
Atapue mai le Getty Images
I se tasi aso a o ou i ai i se talanoaga vevela i luga o le initoneti e uiga i mea faaupufai, sa ulagia ou manatu ona o ituaiga aoaoga sa ou mauaina i le kolisi.
Ou te fiafia i se finauga lelei, ae o le osofaiga patino sa le manaomia. O faamatalaga na tiga ona sa foliga mai ua fesiligia lou lava taua faaletagata lava ia. O le mea na sili ai ona leaga ona o le tagata na faia le saunoaga o se tasi O Le Ekalesia a Iesu Keriso o le Au Paia o Aso e Gata Ai.
Ae peitai, o le toe manatunatu, na amata ai ona ou iloa ua uma ona ou faia foi ni faamatalaga patino ina ia manumalo ai i se finauga. Sa ou iloaina o lenei ituaiga amioga na taatele i le sosaiete na siomia ai au.
Na oo ina ou iloa o le toilalo e iloa le mamalu i isi, e mafai ona mafua ai ni faatamaiaga ogaoga, ae maise lava i le Ekalesia. Sa talai malosi atu le perofeta o Alema e faasagatau i le “mataua, ma le fefinauai, ma le lotoleaga, ma sauaga, ma le faamaualuga” i le Ekalesia (Alema 4:9). Sa ia vaaia faapea o ia ituaiga o amioga sa “avea ma se maagao tele” i le alualu i luma o le Ekalesia (tagai Alema 4:10).
O le feiloaiga na ou toe tomanatu ai i lou taua i fofoga o le Atua. I le suesue atili ai, na ou mauaina se upusii mai ia Elder Dieter F. Uchtdorf o le Korama a Aposetolo e Toasefululua. Na ia aoao mai o le Tama Faalelagi “e alofa o Ia ia te i tatou aua ua tumu o Ia i se fuataga e le uma o le alofa paia, mama, ma le le mafaamatalaina. E taua i tatou i le Atua, e le ona o talaaga o o tatou tomai ae ona o tatou o Ana fanau.”1
Sa ou aoaoina o le alofa o le Atua mo i tatou, e le faalagolago i la tatou aoga, galuega, po o le gafatia e manumalo ai i se finauga. E alofa le Atua ia i tatou i le mama, leai se gataaga, ma le saoloto aua o Ia o lo tatou Tama ma o i tatou o Ana fanau.
O le lagonaina o le alofa maoae o le Atua na soloia ai lou ita. Sa ou iloaina a o lelei le le ogatasi ma isi, o le tau lava o le finau o le tasi ma le isi e le ausia ai se mea ae na o le tiga ma le faaleagaina.
Afai na naunau Iesu Keriso e ofoina atu Lona soifua, ou te iloa e mafai ona tatou aoao e lafoai lo tatou faamaualuga, vaai i le faasausili o le lalolagi, ma faatauaina le tasi ma le isi e pei ona faia e le Atua. I Ona fofoga, o le ala tatou te taulimaina ai le tasi ma le isi, e sili atu ona taua ia i tatou nai lo le tatou manumalo i se finauga i luga o le initoneti.