Sau, Mulimuli Mai ia te A’u
O Le Malamalama o Keriso
“O le malamalama lea o Keriso. E pei foi ona i ai o ia i le la, ma le susulu o le la, ma le mana o i ai, lea na faia ai.” (Mataupu Faavae ma Feagaiga 88:7).
Ogatotonu: ata na saunia e Cary Henrie
Mataupu Faavae ma Feagaiga 88:7–10 o loo talanoa mai i le auala na “susulu” ai le upu moni ma o le Malamalama o Keriso. Fai mai o loo i ai o Ia po o le malamalama o le la, masina, ma fetu, ma o le mana lea sa faia ai ma le lalolagi.
O le malamalama o se tasi o vaega e sili ona loloto ma taua i le natura uma. Na te feaveaia le malosi, mafanafana, ma faamatalaga i le avanoa gaogao malulu i se auala o loo taumafai pea le faasaienisi e sailiili ma malamalama i ai. Tatou te iloa e na o le lua ni mea atonu e mafai ona i ai: o se solo o tamai elemene e taua o “photons” po o se galu malosi i se “vaega” e faifai pea lona susulu i le vanimonimo. E ui lava i taumafaiga taua i le fia selau o tausaga, ae e le mafai lava ona tatou tauina po o le fea o nei mea, aua e foliga mai o mea uma nei i le taimi e tasi.
O le mea moni, o lo tatou le malamalama e le taofia ai i tatou mai le faamanuiaina mai le malamalama. O le malamalama mai le la e faamafanafana ma faamalosia ai le lalolagi, ma mafai ai ona maua le ola. Ua na o le pau le mea tatou te ola ai i o tatou olaga i aso uma ona e mafai ona tatou vaai, ma e mafai ona tatou vaai ona o le malamalama e susulu atu i le vanimonimo tele mai i mea uma e susulu pe atagia ai. O le malamalama e mafai ai ona tatou iloa ma aoao ai pe a pai mai i o tatou mata. Ona o le malamalama, e mafai ai ona tatou galulue, alualu i luma, ma tuputupu ae ai. Aveese le malamalama ma o le a avea mea uma ma se aisa, faatafunaga le manaia. O tagata i nofoaga e aunoa ma le malamalama e mafai ona tautevateva i le pogisa.
O le mea e ofo ai, o lena upumoni lea e susulu atu e tutusa ma le Malamalama o Keriso. O le upumoni ma faatasi ai ma le alofa moni, filemu, amiotonu, ma mea lelei uma lava e tafe mai le Faaola ia i tatou. E pei lava ona tuuina mai e le malamalama faaletino ia i tatou le malamalama o mea faaletino pe a pai atu i o tatou mata, o le Malamalama o Keriso e aumaia ia i tatou le malamalama o mea faaleagaga pe a pai mai i o tatou loto. Talu ai ua faatumulia le atulaulau i le Malamalama o Keriso, ua mafai ai ona tatou aoao faaleagaga, alualu i luma, ma tuputupu ae ai. Aveese le Malamalama o Keriso ma o mea uma o le a leai se uiga, ma faatafunaga le manaia. O tagata e aunoa ma lenei malamalama e tautevateva i le aisa pogisa o mea sese, ma leai se taʻiala.
O loo faapea mai nei fuaiupu o tusitusiga paia o Keriso o le malamalama ma le mana lea na faia ai tino o loo i le lagi. O le a fai mai Tagata Suesue o le Vanimonimo o malosiaga mai le kalave, vevela, ma fegalegaleaiga faa-atomika [atomic] na foafoaina ai fetu, la, lalolagi, ma le masina ma avatu ai ia te i latou natura ua ia i latou. E moni lenei mea, ae ina ia toe faaupuina se tasi o saienitisi na mauaina le faailoga o le Nobel o Richard Feynman, o tatou i le faasaienisi, ua faamatala mai ai le auala e galue ai nei malosiaga fatufatuai e aunoa ma le iloaina moni pe aisea ua avea ai i latou ma mea ua latou i ai. O le fesili atu pe aisea o le fesili lea po o le a le mafuaaga moni o malosiaga. Ua tau mai e nei mau ia i tatou, o Keriso, ma faatasi ma Ia, le galuega ma le mamalu o le Atua i le aumaia o le tino ola pea ma le ola faavavau o le tagata (tagai i le Mose 1:39), o loo i ai i le faamoemoega ma le mafuaaga o le mauaina o se lalolagi faaletino i le taimi muamua.
O le malamalama faaletino e avea o se faatusa mo le Malamalama faaleagaga o Keriso. Ua tatou aoaoina mai le Mataupu Faavae ma Feagaiga 88:11 atonu e i ai se sootaga sili atu nai lo na o se faamatalaga faauigalua. Ua faapea mai lenei mau, “Ma o le sulu lea o loo susulu atu, lea ua tuu atu ai ia te outou le malamalama, ua ala mai ia te ia o lē ua faamalamalamaina o outou mata, o le malamalama lava lea e tasi ua faapupulaina o outou malamalamaaga.” E foliga mai o lenei mea o le a fautuaina mai ai le malamalama faaletino ma le malamalama faaleagaga, o ni faailoaga eseese ia o lea mea e tasi. Atonu o le ute o le malamalama e faigata mo le faasaienisi ona malamalama i ai ona o le fesili faasaienisi na te le tuuina atu lava se ata atoa. Atonu o se malamalama o le malamalama e tatau ona opogi ai le natura moni o Iesu Keriso lava Ia e atoatoa. Pe a tatou malamalama mulimuli i le faagasologa lea e faamalamalamaina ai i tatou e le Atua, ma e na o le taimi lava foi lea o le a tatou malamalama ai i le natura o le malamalama faaletino, ma faatasi ai ma le natura o Lona atulaulau.