Autalavou Matutua

Faamalosia o Laʻu Sootaga ma le Tama Faalelagi ma Iesu Keriso

Saunia e Chakell Wardleigh Herbert

Mekasini a le Ekalesia

O le fausiaina o se sootaga malosi ma i La’ua e foliga mai e pei lava o se mea e lavelave ia te au, seia oo ina ou taumafaia se mea fou.

Ata na faatino e tagata faataitai

O le faasolo ina ou matua, o le tele foi lena o lou iloaina o le tele o lou faalagolago i sootaga — sootaga ma uo, aiga, ma e oo lava i tagata e le mafai ona misi le oo mai e tiliva mai la’u oka fou i luga o le initoneti (faamanuia i latou).

Ma mo le tele o tausaga, na ou iloa ai o le fautuaga faifai pea mai o tatou taitai o le Ekalesia e fausia ni sootaga ma le Tama Faalelagi ma le Faaola e moni ma taua.¹

Ae sa le mafai ona ou faavasegaina le auala e fai ai.

O mafutaga faalelalolagi ma au uo ma aiga e aofia ai ni talanoaga, fefaasoaai i totonu o tausuaga, ma le faaaluina faatasi o le taimi. O le manatu la i le i ai o se mafutaga patino ma lou Tama Faalelagi ma Iesu Keriso, e le o i ai faaletino, e foliga mai lava e lavelave i taimi uma ia te au.

Ae peitai, a o ou mafaufau loloto, sa ou iloaina o le sootaga a tagata uma ma le Tama Faalelagi ma Iesu Keriso e patino lava ma tulagaese. Ae faapefea pe a ou faaaogaina ni auala aoga na fesoasoani ia te au e atiina ae ai sootaga malolosi ma e pele ia te au iinei i le lalolagi i la’u sootaga ma i La’ua?

O lena manatu o le aloiafi lea na ou manaomia.

Sa ou filifili e faataitai lenei manatu ma toe iloilo ai le ma mafutaga ma i La’ua pe a mavae aso e 10.

Auala e 10 e Faamalosia ai Sootaga

A o ou mafaufau loloto i ni auala e latalata atili atu ai i le Tama Faalelagi ma le Faaola, sa ou sailiili i ni motugaafa autu se 10 e masani ona tuuina mai e tagata tomai faapitoa ma tuufaatasia ma fautuaga faaperofeta ina ia tuuina atu ia i latou se taulaiga faaleagaga.

O motugaafa nei e 10:

1. Fesootai leotele atu ma le faamaoni, ma le manatu tonu i ai e ala i le tatalo.²

2. Ia avea ma se tagata e faalogo lelei.³

3. Faaali atu ia i La’ua le agaga faafetai.⁴

4. Faia ni osigataulaga mo i La’ua.⁵

5. Aoao e uiga ia i La’ua.⁶

6. Faaalu ni taimi lelei ma i La’ua.⁷

7. Auauna atu faatasi.⁸

8. Faaali atu ia i La’ua le faatuatuaga ma le tautinoga.⁹

9. Tautino atu pe a e sese.¹⁰

10. Aoao i le ala La te faaalia ai ia oe le alofa.¹¹

Ina ia amata, sa ou filifilie aoao e uiga i lou Tama Faalelagi ma le Faaola (#5), e faaalu ni taimi lelei ma i La’ua(#6), ma aoao i auala na La ofoina mai ai ia te au le alofa (#10).

1. Aoao e uiga ia i La’ua

Ina ia aoao atili e uiga ia i La’ua, sa ou taulai atu i le suesueina o o La uiga. Sa ou suesueina le “O le Keriso Soifua,” o tala o vavega i le Tusi a Mamona, ma saunoaga o konafesi aoao. Sa ou matamata foi i vitio a le Tusi Paia a le Ekalesia ma le Tusi a Mamona e maua ai se vaaiga o uiga o le Faaola ma le auala na Ia aoao atu ai ma fegalegaleai ma isi.

O se tasi o uiga o le Faaola na ou suesueina o Lona naunautaiga e faia le finagalo o le Tama (tagai i le 3 Nifae 11:11). E le mafai ona ou malamalama i se tasi o naunau e puapuagatia ma maliu mo mea sese uma, faanoanoa, agasala, ma tiga o le a feagai ma tagata uma pe a leai se sese o lenei tagata. Ae peitai, sa i ai se tasi na naunautai.

OIa .

Sa i ai pea lava lou faatuatua ia te Ia, ae o le manatunatu loloto i Lona alofa ma le naunautai e tuuina atu Lona soifua mo au, sa faalolotoina ai lou faatuatua, lou agaga faafetai, ma lou lava naunautai e mulimuli ia te Ia. Ma o Lona lototele na musuia ai au e agai i luma i le faatuatua ma le faamoemoe, e ui o nisi taimi e feagai ma le popole ma le fefe i le le mailoa.

Ona ou liliu atu lea i uiga o le Tama Faalelagi.

Sa ou faafiaatoatoa i le tele o lou olaga, ma sa masani ona ou vaai faalemafaufau ia te Ia o se tagata ita ae ou te lei fiafia ia te Ia i ou vaivaiga ma mea sese.

Ae a o ou suesue atili i Lona natura, sa ou aoaoina ai e le o Ia o se tagata ua faalealofa (tagai Alema 32:22). E onosai o Ia ma agalelei ma agaalofa (tagai i le 2 Peteru 3:9). E naunau o Ia i taimi uma e faamagalo au (tagai Mosaea 26:29–31). O Ia o lou lagolago sili sili (tagai i le 2 Nifae 26:24).

Ma sa ou iloaina o Ia moni lava o lou Tama ma o au o Lona afafine paia. E alofa atoatoa o Ia ia te au (tagai Ioane 3:16–17) ma e manao foi ou te toe foi atu.

O le aoao e uiga i le natura o le Tama Faalelagi ma Iesu Keriso na suia atoa ai ou manatu e uiga i i o La’ua lagona ia te au ma pe o faapefea moni foi ona i ai i La’ua i lo’u olaga. Ma sa ou iloa ai e le o ni tagata ese i La’ua ia te au—ua ou iloaina i La’ua talu mai le amataga, ma sa La silafia foi au.

2. Faaaluina o le Taimi ma i La’ua

Atapue mai le Getty Images

E pei lava ona tatau ona ou faaavanoaina se taimi e asiasi atu ai i se uo, sa ou faaavanoaina le taimi e faatasi ai ma le Tama Faalelagi ma le Faaola i aso uma. Sa ou faia leotele ni tatalo mai le loto ma faaalu se taimi e faalogologo ai. Sa ou taalo ma mafaufau loloto i au viiga ou te fiafia i ai. Sa ou manatunatu loloto. Ma talu ai ona usa tapunia malumalu (ona o le KOVITI-19), ou te alu ai i ni savaliga filemu.

E masani lava ona ou faalogologo i se faasalalauga po o se tusi-o-loo-faitauina i o’u taliga pe a ou alu e savali. Ae i le taimi o nei savaliga, sa ou motusia ai fesootaiga mai le lalolagi. Sa ou filifili e faalogo mo i La’ua. O le faia o lenei mea sa fesoasoani ia te au e fesootai ai ma le Agaga ma iloa ai ma mafaufau loloto i faamatalaga lavelave o le lalolagi ma lou faamoemoega.

Sa ou iloaina le tele o le manatu ua tuuina e le Tama Faalelagi ma le Faaola i a La foafoaga—e aofia ai ma au.

Sa ou lagonaina le tele o le mana faaleagaga e sau mai lena taimi o le filemu faatasi ma lou Tama Faalelagi ma le Faaola. Sa ou iloaina nisi o ou faamanuiaga, sa ou maua ai se agaga faafetai sili atu mo le olaga atoa, sa ou mauaina se faamautinoaga sili atu i au faaiuga, ma sa ou lagonaina lo La malosi le leoa na lagolagoina au.

E pei lava o se isi sootaga, o le faamuamua o le faaaluina o taimi matou te faatasi ai na matou latalata atili ai.

3. Iloaina pe Faapefea ona La Faaalia Mai ia te A’u le Alofa

E sili ona tatou maua uma le alofa i ni auala faapitoa.¹² Sa ou mafaufau i le faaalia o le alofa o isi tagata ia te au ma le mea na sili ona aafia ai au i le tele o tausaga, ma sa ou iloaina ai o loo ou lagonaina pea le alofa sili sili e ala i upu anoa a isi.

Ma ina ua ou iloaina lenei mea, na ou iloa ai foi mo au, o le tali aupito loloto i le tatalo po o le faamafanafanaga silisili mai le Tama Faalelagi po o le Faaola e i ai pea lava iupu, pe o na upu e sau mai se tasi sa uunaia e talanoa mai ia te au, e ala i upumoni o i tusitusiga paia, e ala i tusi, pe e ala i upusii matagofie mai perofeta ma aposetolo. O upu sa faatumulia ai lava lou agaga ma tuu mai ai ia te au le mafanafana nai lo se isi lava mea.

Sa ou mafaufau foi i le auala La te ofoina atu ai le alofa ia te au e ala i isi auala, e pei foi o e pele ia te au, e ala i tagata ese, ma e oo lava i le fiafia i “faafuaveta” ma alofa mutimutivale. Sa ootia au i loimata ina ua ou iloaina tonu lava le auala La te faaalia ai le La alofa ia te au i le tele o auala, ae maise lava i le ala silisili ou te mauaina ai. La te iloa moni lava i tatou ma le ala e aapa patino mai ai ma le mataalia.

E mafai foi ona tatou faaalia ia i La’ua le alofa i auala sili tatou te iloa e e fai ai—i le faasoaina atu o le talalelei, mulimuli ia i Laua, ma auauna atu i isi.

Afai e te manaomia se fesoasoani e iloa ai le auala La te faaalia ai le alofa ia te oe, ole atu i le Tama Faalelagi mo se fesoasoani ina ia iloa ai. O le a Ia faaali atu ia te oe.¹³

Fausiaina o Sootaga Moni

O lenei aafiaga na ou maua ai se vaaiga puupuu i le tele o le malosi faaleagaga e mafai ona ou mauaina e ala i le faamuamua o le ma mafutaga ma le Tama Faalelagi ma le Faaola.

Ma ua ou fuafua e faaauau pea le faaaogaina o nei motugaafa mo le sootaga. Ua ou vaai moni lava i lau sootaga ma i Laua e moni, mamana, pele, ma e faavavau. E le faapea e le mafai ona tatou pai ia i Laua, e pei ona sa ou manatu ai.

E faatasi i La’ua ma i tatou. O loo i ai i faamatalaga auiliili. Ua La tutu e saunia e liligi mai ia i tatou le malosi, mafanafana, poto, taitaiga, ma le filemu, aemaise lava pe a tatou faaavanoaina le taimi ma le avanoa mo i La’ua i o tatou olaga.

Faataitai ni au lava auala e ola latalata atu ai ia i La’ua ma vaai po o le a se mea e tupu! E mafai ona ou molimau atu a o tatou faamuamua nei sootaga taua ma mulimuli ia i La’ua, o le a mafai ona tatou maua le uunaiga faamalolo a le Faaola, agai i luma ma le faatuatua (tagai i le Filipi 4:13), ma maua le mautinoa sili atu ma le olioli.

Ua ou iloa o loo ia te au.

O Chakell Wardleigh Herbert o se faatonu mo le Liahona ma le AM Faalevaiaso. E masani lava ona e maua atu ia o loo talie ma lona toalua, o loo faaaluina se taimi umi e faamatala ai tala ona o nisi tulaga faalavelave ia te ia, e pei o le tatai atu i faasalalauga ma tusi, po o le tosina atu i ni maile aulelei. O le mea moni, e faigofie lava ona faalavelaveina o ia e mea matagofie o le olaga.

Nisi Faamatalaga mai Isi Autalavou Matutua

Sa ou fai atu i nisi o uo e taumafai e mulimuli i nei motugaafa ma apoapoaiga faaperofeta, ma faasoa atu pe na faapefea ona suia a latou sootaga ma le Tama Faalelagi ma le Faaola. O nisi nei o o latou manatu faaalia:

“Ou te lagona e pei ua tele atu lou faaosofia e taumafai pea ia avea atili e pei o Keriso. Ua ou malamalama atili ia te Ia. Ma ua faateleina foi le ma mafutaga ma lou Tama i le Lagi. Ua iu ina ou lagona e pei lava o loo ou i ai i o La lima.”—Joëlle Spijkerman, Gelderland, Netherlands

“Sa atili anoa au tatalo a o ou vaai faalemafaufau i le i ai o le Tama Faalelagi i totonu o le potu faatasi ma au. Na fesoasoani lenei mea ia te au e faamatala ai ou mafaufauga ma lagona. Sa ou galue e faalogologo mo tali i le aso atoa ae le na o le tatalo. Ina ua ou faalogo a o ou tatalo, sa pei o loo ou fefaasoaai ma le Atua nai lo le talanoa atu ia te Ia. Sa ou lagona sa faalogo mai ma na saunoa sa’o mai o Ia ia te a’u. O nisi taimi o le a ou maua ai se malamalamaaga faapitoa faaleagaga po o se tali i se fesili, ae e tele lava ina ou lagonaina e alofa o Ia ma le Faaola ia te au ma ua La silafia au.”—Stephanie Roussety, Victoria, Australia

“I se tasi aso, sa ou lokaina ai au lava i totonu o se potu ina ia le mafai ona faalavelave mai se isi ia te au ma tootuli ai i ou tulivae e tatalo. A o ou salamo ma faamatala atu ma le faamaoni lou fefe, sa ou lagonaina le fufulueseina o au mea sese. Sa ou iloa sa i ai iina ma faamafanafanaina au e le Tama Faalelagi ma le Faaola i le mea na ou lagonaina. O lenei aafiaga ua aoaoina ai au e tatau ona ou taulai atu ia i La’ua nai lo mea o le lalolagi. Ua ou aoaoina o le a i ai pea i La’ua iina mo i tatou, e oo lava i o tatou taimi o tofotofoga sili ona faigata.”—Zoe Campbell, Aberdeen, Scotland

“Sa amata ona ou nofouta i la’u sootaga ma i La’ua. Sa ou aoaoina le auala e mafai ai ona faasoa sa’o ma i La’ua. Ou te iloa ua silafia e le Tama Faalelagi ma le Faaola ou lagona—e sili atu nai lo lou iloaina o au lava ia. O lenei aafiaga na mautinoa ai le faateleina o lou fiafia ma sili atu ai le filemu.”—Bethany Robinson, Kent, England

“Sa i ai ni aʻu tauiviga patino mo se taimi umi. Ae sa matou savavali faatasi ma lou Tama Faalelagi ma le Faaola ma fesoasoani mai ia te au e suia lou loto. Ua sili atu foi lou faalogo i le Agaga Paia ma iloa ai le mea e tatau ona ou suesue i ai i tusitusiga paia. Sa ou galue i le atiina ae o lou faatuatua mo sina taimi, ma ou te iloa e le mafai ona ou faafitia le alofa mutimutivale ma le mana o le Faaola ma le tele o Lona alofa ia i tatou ma lo tatou Tama Faalelagi!”—Sariah-Lake Tipi Peneha, Waikato, New Zealand

“I taeao taitasi sa ou faia se mea ese—faatutuina o ni sini, suesue i tusitusiga paia, ma suesue i lou faamanuiaga faapeteriaka ma meaalofa faaleagaga—ma o taeao uma lava sa mafai ona ou lagonaina le alofa o le Atua. Ou te iloa o Ia ma le Faaola o au lagolago sili ia, ma La te alolofa ia te au, o loo fesoasoani mai ia te au, ma o le a i ai lava iina mo au. Ma ua ou iloa ua lava lou lelei.”—Jemma Telleman, Queensland, Australia

“Ina ia faamaoni, i le amataga na ou tau fefe i le Tama Faalelagi ma Keriso. Sa ou oo atu i le mafaufauga lea sa faatalitonuina ai au pe afai ou te lei faia mea uma i le ala na La mananao mai ai ia te au, o le a ou tuua i La’ua i lalo. Sa ou lagonaina le aveesea o au mai ia i La’ua ona o le fefe. O lenei aafiaga na fesoasoani ia te au e manatua ai mea e sili ona taua e uiga ia i La’ua—La te alolofa ia te au e aunoa ma se tuusaunoaga. La te iloa le tele o lou popole i le tuuina o i laua i lalo, ae o loo i ai foi se La galuega maoae mo au e ausia iinei. Ou te lagona le latalata atili atu ia i La’ua i le taimi nei ma usiusitai atili i le finagalo o le Atua.”—Gabrielle Lyn Shiozawa, Washington, USA

“Ae lei faia lenei mea, sa masani ona ou lagona e pei sa faigata le i ai o le faatuatuaina ma le talitonuga i le Tama Faalelagi ma le Faaola. Sa ou manao e aoao pe faapefea ona ou faia lena mea ona sa tatau ona ou alu i le iunivesite i le tausaga lenei ma sa ou tulimatai atu i ai. Ona o le KOVITI-19 na mafua ai ona tuai lena fuafuaga. Sa tele ina ou muimui agai le Atua. Ae ina ua amata ona ou suesue i le soifuaga o le Faaola, o Lana taulaga togiola, o Lona alofa tunoa, ma lou faamanuiaga faapeteriaka ma le iloaina o la Laua taitaiga ma faamanuiaga i lou olaga, sa ou maua ai le tele o le talitonu ma le faatuatua ia i La’ua. Ua ou lagonaina nei le tele naua o le mana e tulei atu ai i luma ma le faamoemoe ma le faatuatuaga.”—Claudio Acuña, Antofagasta, Chile

Faamatalaga

1. Tagai James E. Faust, “A Personal Relationship with the Savior,” Ensign, Nov. 1976, 58–59.

2. Tagai “How I #HearHim: Elder Jeffrey R. Holland” (video), ChurchofJesusChrist.org/media.

3. Tagai Russell M. Nelson, “Faalogo ia te Ia,” Liahona, Me 2020, 88-92.

4. Tagai Thomas S. Monson, “O Le Meaalofa Faalelagi o le Lotofaafetai,” Liahona, Nov. 2010, 87–90.

5. Tagai Dallin H. Oaks, “Ositaulaga,” Liahona,Me 2012, 19–22

6. Tagai Russell M. Nelson, “O Perofeta, Taitaiga, ma le Tulafono Faalelagi” (faigalotu i le lalolagi atoa mo talavou matutua, 8 Ian, 2017), broadcasts.ChurchofJesusChrist.org.

7. Tagai i le M. Russell Ballard, “How I Hear Him in Still and Quiet Moments,” blog post, July 17, 2020, ChurchofJesusChrist.org.

8. Tagai Cristina B. Franco, “O Le Olioli o Auaunaga Lē Manatu Faapito” Liahona, Nov. 2018, 55–57.

9. Tagai Russell M. Nelson, “Ia Faamuamua le Atua,” Liahona, Nov. 2020, 94.

10. Tagai Russell M. Nelson, “E Mafai Ona Tatou Faia ia Lelei Atu ma Ia Tatou Lelei Atu,” Liahona, Me 2019, 67–69.

11. Tagai Dieter F. Uchtdorf, “O Le Alofa o le Atua,” Liahona, Nov. 2009, 21–24.

12. Tagai Gary Chapman, The 5 Love Languages: The Secret to Love That Lasts (2010).

13. Tagai Sheri L. Dew, Worth the Wrestle (2017), 8, 9, 41.