E Na’o Tusiga Faatekinolosi: Atatosi o le Faatuatua
Sa Faamalolo A’u e le Alii
Talu ona ma mauaina O Le Ekalesia a Iesu Keriso o le Au Paia o Aso e Gata Ai, ma te lei misia lava ni faamanuiaga.
Ata na pu’eina e Leslie Nilsson
Mo le tele o tausaga, sa ou ma‘i. Sa ou inuina ni fualaau, ae sa lei faaleleia lava lo‘u tulaga. Sa tau le mafai ona ou savali i se auala taamilo e aunoa ma le tu faatolu pe faafa. Sa ou manatu atonu sa tofotofoina a’u mo le le auai i se lotu.
Ma te faafetai tele ma lo‘u toalua o Silvia i uso ma tuafafine o e na fesoasoani e aumaia i ma’ua i le O Le Ekalesia a Iesu Keriso o le Au Paia o Aso e Gata Ai. Sa fai mai se tasi o uso, “O le a ou le ta’uina atu ia te oe e tatau ona e alu i le lotu. O le Alii o loo fetalai mai ia te oe e te alu.”
O le mea lena na matou lagonaina.
Sa matou salamo i a matou agasala ina ua faailoaina mai ia i matou le Ekalesia. O le salamo e matua’i taua lava. Sa matou lafo ai o matou manaoga ma aioi atu i le Alii e faamagalo i matou ia matou agasala ma pipiimau pea ia i matou seia oo ina matou feoti.
Ina ua uma ona matou mauaina le talalelei ma amata ona auai i sauniga, sa amata ona ou maua se lagona lelei. Ina ua amata ona matou auai i le malumalu, sa sili atu ona faaleleia atili lo‘u soifua maloloina. Sa mafai foi ona ou toe taalo i le fútbol(soka) . Sa ia faamaloloina a’u mai lo’u mai. E i ai ni a ma luitau faaletino ma lo’u toalua, ae ona o lo maua faatuatua, e faamanuiaina ma faamalosia ai i maua e le Alii.
Talu ona matou mauaina le Ekalesia, matou te lei misia lava ni faamanuiaga. Matou te totogi a matou sefuluai, ma e tele atu mea e tuuina mai e le Alii ia i matou nai lo mea matou te tuuina atu ia te Ia. Matou te faafetai mo le aiga ua Ia tuuina mai ia i matou. Matou te faafetai ua lava mea e mafai ona matou foai atu i e matitiva. Matou te faafetai mo le olaga maloloina ua matou olioli ai. Ua matou fiafia lava. Matou te alolofa ma faafetai mo le Ekalesia. Matou te iloa e moni!
Ua matou iloa o loo i ai o matou ola i aao o le Tama Faalelagi ma Iesu Keriso, o lea matou te tatalo ai i le Tama Faalelagi mo le tele o taimi i le aso. Tatou te le iloa po o afea o le a oo mai ai le taimi tatou te feoti ai, pe a afio mai le Alii mo i tatou, ae tatou te faafetai ua Ia faaali mai ia i tatou le ala e toe foi atu ai ia te Ia.