E Mafai Faapefea ona Ou Alualu i Luma i le Ala o Feagaiga A o Ou Nofofua?

Saunia e Marjorie Cornillez

E alala le tusitala i Samar i Matu, Filipaina.

E tusa lava po o le a le vaitau o le olaga o loo tatou i ai, o le agai i luma o lona uiga o le agai atu ia Keriso.

Ata

tamaitai talavou i le ofutele piniki

Ina ua ou toe foi atu i Filipaina ina ua mae’a la‘u misiona, o le mea muamua lava sa ou manao e fai o le feiloai lea ma se tasi e umia ma le agavaa le perisitua e mafai ona ou faaipoipo i ai i le malumalu ma fausia se aiga e faatotonugalemu ia Keriso.

Sa ou manatu o le mauaina o ia o le a faigofie. Ae o lenei ua fai si tele o tausaga talu ona ou toe foi i le fale, ma ou te le’i mauaina lava se tasi e faaipoipo i ai.

Ua uunaia a’u e sini i lo‘u olaga atoa. I le a’oga maualuga, sa ou faia ai ni sini mo lo‘u lumanai, ni sini patino o le a fesoasoani ia te a’u e alualu ai i luma i luga o le ala o feagaiga—na pau lea o le ala o le a iu ina taitaiina ai a‘u, ma i tatou uma, e toe foi atu ai e nonofo faatasi ma le Tama Faalelagi.

Sa ou faia ni sini e faau’u mai le seminare ma le inisitituti, e faauma a‘u aoaoga, ia maua faaeega paia i le malumalu, ia auauna atu i se misiona, ia maua se galuega e o faatasi ma lo’u faailoga, ma ia fausia se aiga e faavavau.

Ua ou ausia na sini uma e ese mai le tasi, ma e ui lava i le mitamita i mea uma ua ou ausia, ae o nisi taimi ou te lagonaina ai e pei ua ou le toe alualu i luma.

O Se Taofi i le Alualu i Luma

Mo le tele o tausaga sa ou faaaluina le tele o le taimi e saili ai ma tatalo ia maua se tasi e faatasi mo le faavavau. Sa ou usita’i i taimi uma i poloaiga, faaaoga aoaoga a perofeta ma ta’ita’i i lo’u olaga, ma taumafai ia agavaa e ulu atu i le malumalu. O lea la, i le le fiafia, sa ou mafaufau ai i nisi taimi pe aisea, ina ua uma ona ou taumafai malosi, e le mafai lava ona ou ausia lenei sini e tasi ma e masani ona ou lagonaina le le mafai ona agai i luma i le ala o feagaiga.

O le a se mea o loo misi ia te a’u?

I se tasi po a o ou lagonaina le lotovaivai faaopoopo e uiga i lo’u tulaga faalefaaipoipoga ma foliga mai ua leai se alualu i luma, sa sasa’a atu o’u lagona i le Tama Faalelagi. Sa ou lagona le mau, tuuatoatasi, ma le leiloa. A o ou tatalo ma mafaufau loloto, sa oo mai se faamanatu manino ia te a’u:

“Ia e faatuatua i le Alii ma lou loto atoa. …

“Ia e manatua o ia i ou ala uma, ona faatonuina ai lea e ia lava ou ala” (Faataoto 3:5–6).

I lena taimi, sa ou iloaina ai o na “ala” na aofia ai le ala o feagaiga.

Sa faamanatu mai ia te a‘u afai ou te “faamuamua le Atua” i lo‘u olaga, e pei ona aoao mai Peresitene Russell M. Nelson,¹ O le a Ia taitaiina a’u ia Keriso ma tuuina mai ia te a‘u le malosi faaleagaga, faamanuiaga folafolaina, ma le alualu i luma e faavavau.

Agai atu ia Keriso

Sa faasoa mai e Elder Marvin J. Ashton (1915–1994) o le Korama a Aposetolo e Toasefululua le mea lenei: “Seti ni au sini. … Ae aua ne’i ita aua e leai ni manumalo manino. Faamanatu ia te oe lava ia o le taumafai e sili atu le taua nai lo le taunuu atu.”²

Mo se taimi umi lava, sa na o o’u faamoemoega mo le faaipoipoga ma lo’u “toilalo” i le le ausiaina o lena feagaiga. Sa galo ia te a’u le taua o feagaiga na ou osia ma le ala na fesoasoani ai na feagaiga ia te a’u e agai atu ai ia Keriso.

Sa galo ia te a‘u le matagofie o o’u tulaga. I le taimi nei, ona e leai sa’u fanau po o le tele o matafaioi i le fale, ua ia te a’u le taimi e atiina ae ai nisi tomai mo le lumanai. Ua mafai ona ou tuuina atu se aofaiga tele o lo’u taimi e auauna atu ai i isi ma auauna atu ia i latou i la‘u uarota. Ua mafai ona ou feiloai i nisi tagata ma aoao mai ia i latou. Ou te faaaluina le taimi e faaleleia ai a‘u sootaga ma o’u matua ma nai o‘u tei. Ma o le mea e sili ona taua, o loo tele pea avanoa ou te maua e faaauau ai ona avea atili e faapei o le Faaola.

Ua ou iloaina afai o loo ou savali pea i luga o le ala lea e taitai atu ai a’u ia Iesu Keriso, ona ou i ai lea i le mea e tatau ona ou i ai.

O loo o’u agai i luma i luga o le ala o feagaiga.

Sa aoao mai fo’i Peresitene Nelson “o fea lava o loo e iai i luga o le ala o feagaiga … Ou te folafola atu ia te oe afai o le a e faia ma le loto faamaoni ma tumau ai pea lava i le galuega faaleagaga e manaomia e atina’e ai le tomai taua, faaleagaga o le aoao pe faapefea ona faalogo i musumusuga a le Agaga Paia, o le a e maua taitaiga uma o le a e manaomia i lou olaga.”³

Ou te iloa afai e taitaiina a’u e le Agaga, o le a taitai atu A’u i le mea e finagalo o Ia ou te i ai, ma o le mea lea ou te fia i ai.

E Mafai Faapefea Ona Tatou Alualu Pea i Luma?

Afai e i ai se taimi e te lagona ai le lotovaivai po o le le mautonu i luga o le ala o feagaiga, ou te iloa ou lagona. E i ai taimi ou te lagona ai le le to’amalie po o le le fiaauai i le lotu ona ou te nofofua. Ua ou faalogo foi i le tele o tala malie mai lo’u aiga ma le uarota e uiga i lo’u tulaga faalefaaipoipoga—e pei ona i ai i le toatele o i tatou o tagata nofofua.

Ae ua ou aoaoina e tusa lava po o a o’u tulaga, e mafai lava ona ou alualu pea i luma i luga o le ala o feagaiga. E mafai ona ou taula’i atu i feagaiga na ou osia ma le alualu i luma ma folafolaga e faavavau ia e oo mai i le tausia o na feagaiga.

Po o a lava o tatou tulaga o i ai nei, ua tatou maua le avanoa e faaleleia ai i tatou lava ma avea ai ma tagata tausi feagaiga e finagalo le Alii ia avea ai i tatou.

E pei lava ona fautuaina e le Alii ia Emma Samita, e mafai foi ona tatou “tuu ese mea o lenei lalolagi, ma saili mo mea o se lalolagi sili atu ona lelei” ma taofi mau i a tatou feagaiga ma le Atua (Mataupu Faavae ma Feagaiga 25:10)..

Faaipoipo pe nofofua, fanau po o le leai o ni fanau, o tatou uma e mafai ona alualu i luma i luga o le ala o feagaiga a o tatou mulimuli i Ana fautuaga, alofa ma auauna atu i isi, vaavaai mo faamanuiaga o i ai nei, lagona ma faailoa atu le lotofaafetai, ia iloa e manaomia o tatou manatu i le fausiaina o le malo o le Atua, faia galuega o talafaasolopito o aiga, faalautele o tatou valaauga, taumafai ia agavaa pea e ulu atu i le malumalu, ma fesoasoani i isi ia tumau foi i le ala.

Ou te iloa a o tatou faaauau pea ona agai i luma ma iloa le taua o a tatou feagaiga ma le mana faaleagaga o loo latou tuuina mai, e mafai ona tatou saunia i tatou lava (ma le lalolagi) mo le taimi e toe afio mai ai le Faaola, ma o le a sili atu ona tatou saunia e maua faamanuiaga folafolaina i le lumanai.