E Na’o Tusiga Faatekinolosi: Talavou Matutua
Agalelei: O se Mea e Manaomia e le Lalolagi Atoa
O le agalelei, e mafai ai ona tatou fesoasoani i a tatou lava auala laiti e suia ai le lalolagi mo le lelei sili atu.
Atapue mai le Getty Images
Ina ua oo i le taimi e faamanuia ai lo‘u afafine, o Amelia, sa tele naua mea sa ou manao e faaaofia i lona faamanuiaga. A o ou mafaufau loloto muamua e uiga i mea e fai atu, sa ou lagonaina e tatau ona ou faamanuiaina o ia ia tuputupu a’e i le soifua maloloina ma le malosi. Sa ou lagonaina foi le musuia e faamanuia o ia ina ia faatotonugalemu lona olaga i le talalelei a Iesu Keriso.
A o o’u tu i le li‘o i le sauniga faamanatuga ma amata ona faamanuia lo’u afafine laitiiti, sa ou faasoaina atu nei mea uma ma isi uunaiga faaleagaga. Ona faafuasei lea, ona ou lagonaina le uunaiga e faaopoopo se mea. Sa ou te‘i i le malosi o le oo mai o lenei uunaiga ia te a’u.
Faatasi ai ma Amelia i o‘u lima, sa ou fai atu ai, “E i ai taimi, o le a agaleaga ai tagata ia te oe, ae ou te faamanuia ia te oe o le a e mulimuli i le faataitaiga a le Faaola ma ia agalelei i taimi uma.”
E tele ni mea na ou mafaufau i ai e uiga i lenei vaega o le faamanuiaga a Amelia talu mai lena taimi. Ua ou iloaina o le agalelei e le o se mea ou te moomoo i ai mo na o lo’u afafine. O le Agalelei o se mea e manaomia e le lalolagi atoa. E masani ona foliga mai o loo i ai i soo se mea le faigata ma le le magafagafa, ae o ni nai auala nei e mafai ona tatou faia ai le lalolagi o siomia i tatou ia agalelei teisi atu.
1. Ia Agalelei Atu i Isi Tusa Lava Pe E te Le Ioe ia i Latou
Vaai i se talafou talu ai nei ma o le a le umi se taimi ae e te vaai ai i tagata o agaleaga le tasi i le isi. O nisi e manatu ia i latou e ese o latou manatu e le taualoa, faaseseina, pe leaga foi. Latou te galulue e pei e leai se avanoa mo ni manatu eseese, ma o le faaaloalo i isi vaaiga e masani ona vaaia o se vaivaiga. Ae e le tatau ona faapena.
Na saunoa Dallin H. Oaks Peresitene Dallin H. Oaks, Fesoasoani Muamua i le Au Peresitene Sili: “O soo o Keriso e tatau ona avea ma faataitaiga o le faaaloalo. E tatau ona tatou alolofa atu i tagata uma, avea ma tagata e faalogo lelei, ma faaalia le popole mo o latou talitonuga faamaoni. E ui lava atonu tatou te le malilie [i isi manatu], e le tatau ona tatou le ioeina.”1
O le agalelei e tusa lava po o a o tatou manatu e mafai ona fesoasoani ia i tatou e vaavaai mo le mea sili i le tasi ma le isi ma lagona atili ai le fesootaiga.
2. Taulai Atu i le Agalelei i le Aiga
Sa faapea mai Peresitene M. Russell Ballard, Sui Peresitene o le Korama a Aposetolo e Toasefulu ma le lua, “E pei o fasi auro ninii lea e faaputuputu i le aluga o taimi ma avea ai ma se oa tele, o a tatou auaunaga agalelei iti ma faatauvaa e faaputuputu e avea o se olaga e faatumulia i le alofa mo le Tama Faalelagi, ma tuuto atu i le galuega a le Alii o Iesu Keriso, ma lagona ai le filemu ma le fiafia i taimi uma lava tatou te aapa atu ai le tasi i le isi.”2
O se fale e tumu i le agalelei o se nofoaga o le alofa, agaalofa, ma le mafanafana. I le taimi o luitau o le olaga, o le agalelei e aumaia ai foi lagona o aiga o le faamautinoaga, malamalama, ma le alofa. E faaleleia ai sootaga faaleaiga ma e taua pe afai tatou te mananao e fausia se aiga filemu ma agaalofa.
3. Ia Onosai i Isi—ma Oe Lava—Pe A Faia Ni Mea Sese
Pe a faia e i latou o siomiaina i tatou ni mea e le fiafia ai i tatou, e mafai lava ona tatou filifili ia onosai ma agalelei atu ia i latou, i le ala lava e tasi tatou te mananao ai ia i latou e taulimaina i tatou. E mafai foi ona tatou filifili ia agalelei pe a liliu ese i latou tatou te alolofa i ai ma alolofa i ai mai mea e finagalo lo tatou Tama Faalelagi tatou te faia.
Na saunoa Elder Dieter F. Uchtdorf o le Korama a Aposetolo e Toasefululua e uiga i lo tatou tiute “o le alofa lea i le Atua ma alolofa i [o tatou] tuaoi.” Afai tatou te faia, “O le a faia e le Atua vavega e ala mai ia i [tatou] e faamanuia ai Ana fanau faapelepele.”3
E manaomia foi ona tatou agalelei ia i tatou lava. Na saunoa Elder Jeffrey R. Holland o le Korama a Aposetolo e Toasefululua, “I le avea ai ma fanau a le Atua, e le tatau ona tatou faalumaina pe faatiga ia i tatou lava, e pei o le sasaina o i tatou lava o le a avea ai i tatou ma tagata e finagalo le Atua e avea ai i tatou.”4 E manaomia e tagata uma le onosai ma le agalelei, ma e aofia ai ma oe.
4. A Agaleaga Isi, Ia Agalelei Pea
E i ai taimi, o le a taulimaina ai i tatou e tagata ma le agaleaga. A tupu lena mea, po o le a lava le faigata, e manaomia ona tatou taumafai pea ina ia agalelei atu.
Na aoao mai le Faaola, “Ia outou alolofa atu i e ua ita mai ia te outou, ia outou faamanuia atu i e ua fetuu mai ia te outou, ia outou agalelei atu i e ua inoino mai ia te outou, ia outou tatalo foi mo e ua tuuai fua mai ma faasaua mai ia te outou” (Mataio 5:44).
E le faapea la tatou te faatagaina isi e soli tatou e pei o se fala fola i le faitotoa—e taua i taimi uma le faatumauina o ni tuaoi maloloina. Ae e tatau ona tatou taumafai e taulimaina tagata taitoatasi o se atalii/afafine o le Tama Faalelagi, ma e tatau ona tatou manatua e tofu tagata uma ma luitau, o le tele lava e le mafai ona tatou vaai i ai.
E ala i le aapa atu i le agalelei ma auauna atu ia i latou o e agaleaga mai, e mafai ona e fesoasoani ia i latou ia suia. Ae e tusa lava pe latou te le faia, o le faaalia o le agalelei o le a faia ai se eseesega mo oe. O le filifili e agalelei e faasaoloto ai oe mai le nofo ai i le agaleaga o isi. E faatagaina ai foi oe e saili ni auala e fesoasoani ai ia i latou o siomia oe ma maua le fiafia i le aluga o le ala.
Mulimuli i le Ala a le Faaola
E tele auala e aoao ai ia agalelei atili, ae o le auala sili o le vaai atu lea i le Faaola ma mulimuli i Lana faataitaiga.
Sa Ia faaalia le agalelei i mea uma na Ia fetalai ai ma faia. Afai tatou te vaavaai i fafo atu o i tatou lava ma galulue i le agalelei, e oo lava ia i latou o e agaleaga mai, e mafai ona tatou fesoasoani i la tatou lava auala itiiti e suia ai le lalolagi mo le lelei sili atu.
A o tatou faataitai i le Faaola ma liliu atu o tatou loto i fafo, o le a tatou maua avanoa e aapa atu ai i tagata o loo manaomiaina. Ma i le auauna atu i isi, o le a tatou latalata atili atu ai i le Faaola ma faateleina atili ai le alofa ma le agalelei. Na saunoa mai Elder Gary E. Stevenson o le Korama a Aposetolo e Toasefululua: “A o tatou vaavaai atu i se vaaiga o le talalelei, ua tatou iloa foi o loo tatou i ai foi i lalo o le vaavaaiga a se tagata tausi soifua agaalofa, o le na te faalauteleina o Ia lava i le agalelei ma se agaga faafailele.”5
O lea ou te valaaulia ai outou, faatasi ai ma Amelia, e faasalalau atu sina agalelei laitiiti ma faia se eseesega i aso o se tasi! E pei ona saunoa Peresitene Gordon B. Hinckley (1910–2008), “E mafai ona tupu vavega ma o le a tupu pe a i ai le agalelei, faaaloalo, ma le alofa.”6