Seevae Tenisi i Totonu o le Malumalu
Mata o le a faamasinoina au e isi i le ala le tonu na ou faamasinoina ai se isi tagata?
Atapue mai le Getty Images
I le taimi o se sauniga perisitua, sa ou matauina ai se tagata o le korama o ofuina se ofuvae li ma ni seevae tenisi. Sa ou mafaufau, “Aisea o le a sau ai o ia i le lotu i ofu e le masani ai? Pe fouvale ea o ia? Pe loto maaa o ia? Pe le o lagonaina ea e ia le Agaga i lona olaga?”
Afai na ia te ia moni lava se molimau ola, e mautinoa lava o le a ia faaalia se faaaloalo sili atu mo sauniga ma nofoaga paia.
I se vaiaso mulimuli ane, a o ma asiasi ma lou toalua i le ma tama teine, na ma mananao ma te o ma ia i le malumalu. A o ou tatalaina lau atopau, sa ou tei i le iloaina sa galo ia te au o’u seevae lotu! Ona sa vave ona amata le sauniga o le matou malumalu, o lea sa leai ai sou taimi e faatau ai se pea fou. O lea na ou filifili ai e fai ou seevae tenisi.
A o ou faamauluina ou seevae, sa vave ona ou manatuaina le sauniga perisitua. O au lenei, o lea e sauni e alu i se tasi o nofoaga e sili ona paia i le lalolagi ae o loo ou seeina ni seevae tenisi. Sa ou mafaufau po o le a se manatu o isi. Mata e faamasinoina au e pei o le fouvale ma le loto maaa po o le leai o se agaga po o se molimau malosi?
Sa ou maasiasi i lau faaiuga sa vave ona faia muamua, ma le le fetaui. O ai au ou te fesiligia ai le molimau a se tasi ona o ona lavalava? Sa ou le iloaina se mea e uiga i ona tulaga.
Sa taulai atu le Faaola i le alualu i luma faaleagaga o fanau uma a Lona Tama. E pei ona Ia faamanatu atu ia Samuelu, “Aua e le vaai Ieova pei o le vaai o tagata, aua e vaai tagata i le tino ae vaai Ieova i le loto” (1 Samuelu 16:7).
O lavalava o se tagata, foliga vaaia, ituaiga, poʻo le itupa e le tatau ona faia se eseʻesega. O tatou uma o uso ma tuafafine. O le mea moni sa auai lenei uso i le lotu ma sa tatau ona avea ma totonugalemu o lou taulaiga.
E tatau ona tatou taumafai i taimi uma e faaaoga o tatou ofu sili ona lelei pe a tatou o i le lotu po o le malumalu.1 Ae peitai, e le tatau ona tatou faamasinoina isi i mea o loo latou ofuina, aua tatou te le iloa lava o latou tulaga.
O i latou uma o loo siomia i tatou e i ai lo latou gafatia faalelagi. E tatau ona tatou ofoina atu le alofa faaKeriso i o tatou uso ma tuafafine uma e tusa lava po o le a lo latou foliga vaaia, e tusa lava pe latou te seeina seevae tenisi i totonu o le malumalu!