Matutua ma le Faamaoni
Sini mo e Talavou i le Loto
E alala le tusitala i Iuta, ISA.
A o ou aoao e uiga i le polokalama fou a Tamaiti ma le Autalavou, sa ou manao e auai i ai.
Ata na tusia ma ata o galu mai le Getty Images
Ina ua amata e le Ekalesia le polokalama fou a Tamaiti ma le Autalavou, sa ou faalogo o loo talanoaina e a tatou fanau ma a latou fanau a latou fuafuaga mo sini ma lesona. Toeitiiti atoa lou 80, ae sa ou manao e avea ma se vaega o lenei avanoa maoae o le fausia o molimau.
E nonofo solo i totonu o le atunuu lau fanau ma a latou fanau, ma e le mafai ona matou feiloai uma i le tagata i le tagata. Nai lo lena, sa tonu ia i matou e fai se matou fonotaga faalemasina i le initoneti. O le a faia e se tasi o fanau a fanau se lesona ma taitai ai se talanoaga faaletalalelei. A maea, ona faasoa mai lea e tagata uma a latou sini ma lo latou alualu i luma i le ausiaina o ia mea. Ioe, o nisi sini e patino lava, ma e matou te faaaloalogia le tulaga patino o tagata taitoatasi.
A o ou talanoa atu ma le fanau o lau fanau i a latou sini, sa amata ona ou mafaufau i au lava sini. O le a le mea na ou manao e ausiaina?
O se lisi lenei o sini na ou faia, i le mulimulitaia o mataupu ma mamanu o loo faaaogaina i le Polokalama a Tamaiti ma le Autalavou. Ou te fia taua i latou o au sini mo e talavou i le loto.
Faaleatamai. Sa talosaga mai le Au Peresitene o le Aualofa a le matou siteki i tamaitai e tauloto le “O le Keriso Soifua.”1 E umi, ae na ou iloa e mafai lava ona ou taulotoina na mea e tele, ma sa foliga mai o se sini aoga lava.
Faaleagaga. A o ou auauna atu i totonu o le malumalu, e i ai taimi ou te tu ai mo se itula pe sili atu i se faasitepu ma faasino tagata e o atu i le malumalu i le potu e fai ai ofu. Ou te fiafia e faapisi lou mafaufau, o lea na ou filifili ai e tauloto fuaiupu tuai o mau tauloto o le seminare mo le Tusi a Mamona. Ina ua tapunia malumalu i le taimi o le faamai o le KOVITI-19 , sa faaauau pea ona ou faia le sini lenei. O le taulotoina e maua ai e lou mafaufau se mea e fai ma e faatumulia ai au i le Agaga.
Faaletino. O sini faaletino a le fanau a le ma fanau sa faavae i siva, volipolo, ma le faasee i galu, faatasi ai ma isi. E leai ma se tasi o na vaega na fetaui ma au, o lea sa ou filifili ai e savali i ni nai maila i le aso. Ua ou iloa ai ua sili atu ona ou mataala pe a ou faamalositino. E lelei mo lou mafaufau ma lou tino.
Faaleagafesootai. Ou te fiafia e fesootai ma lau fanau ma a latou fanau. Sa masani ona matou talanoa i le telefoni (ma o loo faia pea), ae o tesi o le auala fou lea e fesootai ai i le taimi nei. Sa aoaoina au e tamaiti e uiga i foliga eletonika ma vitio pupuu.
O nisi o fanau a fanau na faaaofia le aoao e kuka o se sini. A latou o mai i le taulaga, matou te kuka faatasi. Mo i latou e nonofo mamao ese atu, matou te faia se valaau faavitio e talanoaina fua o kuka ma kuka i le “taimi lava lena.”
Ou te fiafia foi e valaau atu i uso o loo ou auauna i ai. I le taimi o le faataumamaoina o agafesootai, na aumaia e le faama’i, o le talanoa i luga o le telefoni ua avea o se auala matagofie e fesootai ai. O nisi taimi ou te alu ai i o latou fale ma tuua ni meaai faapepa i a latou faitotoa ma se tamai faamatalaga e faailoa atu ai lou alofa mo i latou.
O le Tuputupu A’e i le Talalelei
Oka o se faamanuiaga o le polokalama a Tamaiti ma le Autalavou mo au ma lou aiga i le taimi o le faamai. E ui lava ina ua na o au lava i le fale i lea aso ma lea aso, ae ua i ai au sini. E faaauau pea e le fanau a la’u fanau ona atiina ae a latou taleni ma tuputupu ae i le talalelei, ma ua mafai ona ou lagolagoina i latou. Matou te tulimatai atu i a matou fonotaga faaleaiga i le initoneti ma taimi e fefaasoaai ai.
Ma faafetai i musumusuga na oo mai a o fesoasoani i fanau a fanau e galulue i a latou sini, o lea ua sili atu ona manino lou taulai i au sini, o sini pupuu ma le faavavau. Ou te galue ma tatalo i aso uma ina ia “ ia faamuamua le Atua ” i lou olaga ma olaga o tagata o lou aiga.2