Mai le Sosaiete a le Au Suisui i le Aualofa

Saunia e Patricia Lemmon Spilsbury

Matagaluega o Talafaasolopito a le Ekalesia

O le a se mea e mafai ona fai e Margaret Cook, o se tuafafine nofofua e le tele sona tamaoaiga, e fesoasoani ai e saofaga i le fausiaina o le Malumalu o Navu?

Ata

Margaret Cook sewing

Ata na tusia e Toni Oka

I Navu i le amataga o le vaitau o le 1840, sa matitiva le Au Paia ma sa tau leai ni oloa. O le mea e manaomia, sa aofia uma i le fausiaina o fale ma pisinisi. Ae o le latou fiafia autu lava lea sa i ai o le fausiaina o le Malumalu o Navu.

E masani ona valaau ia taitai o le Ekalesia i le Au Paia i le eria ma e o mamao e fesoasoani i le galuega ma mea e faaaoga. I le nusipepa a le Ekalesia Times and Seasons, sa aoaoina ai le Au Paia e faapea “o le Malumalu e ao ona fausia i le sefuluai ma le faapaiaina, ma o tagata uma lava e saoloto e faapaiaina mea uma latou te maua i o latou loto ina ia faia … , pe o tupe po o le a lava le mea e mafai ona faamanuiaina ai o ia.” Sa uunaia foi e taitai o le Ekalesia le Au Paia e foai atu “ie moega, totini, totini lima, seevae, lavalava o ituaiga uma, ma oloa faleoloa … mo le faamafanafanaina o le aufaigaluega i lenei taumalulu.”¹

I le aso 1 o Mati, 1842, na asiasi atu ai Margaret Cook ia Sara Kimball e fai ni galuega suisui mo ia. Sa la talanoaina le aioiga talu ai nei mo le lagolagoina o tagata faigaluega o le malumalu. E le tele mea na maua e Margaret, ae o lona tomai suisui e mafai ona aoga ia i latou o loo manaomia ni lavalava. Afai e mafai ona maua ie, na fai mai Margaret e “fiafia e foai galuega suisui.”² Fai mai Sara o le a ia tuuina mai mea e faaaoga, ma a o faaauau pea ona la talanoa, sa la tau mafaufau pe mananao isi e fesoasoani mai foi. Sa la talanoa ma uo e uiga i le faatulagaina o se sosaiete suisui.

O lenei talanoaga, na musuia e Margaret ma Sara na galulue ai i luga o musumusuga, na taitai atu ai i nisi fegalegaleaiga musuia ma isi, e aofia ai le Perofeta o Iosefa Samita. I le tali mai, na tau atu e le Alii i Lana perofeta ua ia te Ia “se mea e sili atu” mo tamaitai ma na musuia Iosefa e faatulagaina i latou i lalo “o le mamanu o le perisitua.”³ O lenei mea na faataatia ai le faavae faafaaaliga o le mea ua tatou iloa i aso nei o le Aualofa, o se tasi o faalapotopotoga o auaunaga e aupito sili ona matua ma silisili ona telē a tamaitai.