Taumafai ia Avea—o se Mamanu mo le Tuputupu Ae ma le Maloloina i le Mafaufau ma Lagona
O le mamanu o le tuputupu ae o loo faataatia atu i le polokalama a Tamaiti ma le Autalavou, e mafai ona fesoasoani ia i tatou uma a o tatou taumafai ia avea atili faapei o le Faaola.
Atapue mai le Getty Images
E tupu le tuputupu ae moni pe a tatou taumafai e tuputupu ae i ni vaega eseese. Ua tatou aoao e faapea “Ua tupu le poto ma le tino o Iesu, ua alofagia o Ia e le Atua atoa ma tagata” (Luka 2:52). Tatou te iloa sina mea itiiti e uiga i lenei vaitaimi o le soifuaga o le Matai, ae ua tatou aoao mai i lenei fuaiupu na “faateleina” o Ia—na tuputupu ae ai—faaleatamai, faaletino, faaleagaga, ma faaleagafesootai. O le tele o suesuega ua fautua mai ai e faapea, o le taumafai e tuputupu ae i vaega eseese i o tatou olaga e lagolagoina ai le maloloina o lagona ma le mafaufau.1
O le tuputupu ae ma le gafatia e faavavau o autu ia o le talalelei toefuataiina a Iesu Keriso. O lo tatou gafatia e avea ai faapei o le Tama Faalelagi o le totonugalemu lea o le talalelei, ma fesoasoani tatou te lagona ai le alofa, faamoemoe, ma le lotofaafetai.2
Na aoao mai Peresitene Dallin H. Oaks o le Fesoasoani Muamua i le Au Peresitene Sili: “O le Faamasinoga Mulimuli ua le na o se iloiloga o le aofaiga atoa o amioga lelei ma amioga leaga—o mea ua tatou faia. O se faailoaga o aafiaga mulimuli o a tatou galuega ma mafaufauga—o tagata ua avea ai i tatou. E lē lava mo soo se tasi le tau lava ina faatino. O poloaiga, sauniga, ma feagaiga o le talalelei e le o se lisi o tupeteu e manaomia ona fai i se teugatupe i le lagi. O le talalelei a Iesu Keriso o se fuafuaga lea ua faaali mai ai ia i tatou le auala e avea ai ma tagata ua finagalo lo tatou Tama Faalelagi e avea ai.”3
O Se Mamanu mo le Tuputupu Ae
Ua valaaulia tamaiti ma le autalavou e mulimuli i le mamanu o le iloaina o mea e manaomia ona latou galulue ai, ma fuafua pe faapefea ona latou faia, e ala i le faatinoina o la latou fuafuaga o le faatuatua, ma manatunatu i mea ua latou aoaoina.4 O lenei mamanu e mafai ona fesoasoani ia i tatou uma a o tatou taumafai e tuputupu ae ma avea atili e pei o le Faaola.
Mo se faataitaiga, sa aoao mai le perofeta o Alema e faapea, “e tusa pe ua le mafai ona e faia o se isi lava mea nai lo le fia talitonu, ia tuu lea manao e galue i totonu ia te oe” (Alema 32:27). A o tatou faafaileleina lena manao, o le a tupu ae le mea na taua e Amoleka o le “faatuatua e salamo ai” (Alema 34:16). O le manao lea na ta’ua e Alema ma o le faatuatua lea na molimau ai Amoleka e le tumau pea le le gaoioi. O lo tatou manao ma le faatuatua ia Iesu Keriso e taitai atu ai i tatou ia salamo moni. Ma o lenei faagasologa o le salamo e taitai atu ai i tatou ia tuputupu ae pea.
Na faamalamalama mai e Peresitene Russell M. Nelson, “E leai se mea e sili atu ona saoloto, sili atu ona malualii, pe sili atu ona taua i lo tatou alualu i luma faaletagata lava ia nai lo se taulaiga masani, i aso taitasi i le salamo. O le salamo e le o se mea e faa-tasi ona tupu; ae o se faagasologa. O le ki i le fiafia ma le filemu o le mafaufau. Pe a vaavaalua ma le faatuatua, e tatala e le salamo lo tatou faitotoa e maua ai le mana o le Togiola a Iesu Keriso.”5
O le Tuputupu Ae e Manaomia ai le Tautinoga
E pei lava ona manaomia e le salamo le galue faifai pea ma le tuuto, ae o le a tupu le tuputupu ae moni pe a tatou taumafai e ofo atu o tatou “agaga atoa” (Ominae 1:26) i ni eria eseese. O loo ia i tatou uma taitoatasi ni meaalofa faaleagaga, e fesoasoani e fausia ai le malo o le Atua. I lo tatou taumafai e avea ma “tagata fou” (2 Korinito 5:17), ua valaaulia ai i tatou e auauna atu i le Alii ma o tatou “loto, manatu, mafaufau, ma le malosi atoa” (Mataupu Faavae ma Feagaiga 4:2). A o tatou taumafai e tuputupu ae i vaega eseese, tatou te fausia le maufetuunai ma le faamalosia o lo tatou faatuatua ia Iesu Keriso, lea o le a fesoasoani ia i tatou e faafetaiaia ai luitau o le olaga.
E mafai e tamaiti ma le autalavou—ma i tatou uma lava—o e faatutu ni sini faigofie ma pupuu ina ia tuputupu ae ai faaleagaga, faaleagafesootai, faaletino, ma le faaleatamai ona oo i le maloloina sili atu o le faalelagona ma faalemafaufau. O nei mataupu faavae e le oo i ai ni manatu faavae mo fesoasoaniga a le tagata lava ia; o i latou o ni auala lelei e taumafai ai e avea ma soo o Iesu Keriso ina ia “foliga mai o le a tatou faapei o ia, ona o le a tatou vaai ia te ia e pei ona i ai o ia; tau ina ia tatou maua lenei faamoemoe; tau ina ia mafai ona faamamaina i tatou, e pei ona mama o ia” (Moronae 7:48).
O le Tuputupu Ae e Manaomia ai le Onosai ma le Filiga
A o tatou taumafai e tuputupu ae ma agai i luma, e tatau ona tatou manatua “e le tatau [ia i tatou] ona momo’e televave atu nai lo [tatou] malosi” (Mosaea 4:27). Tatou te taumafai ia filiga, ma pe a tatou pauu, tatou te taumafai e toe tutula’i (tagai Mataupu Faavae ma Feagaiga 117:13). O le tuputupu ae patino e manaomia ai le onosai. Ina ua faamaloloina e Iesu le tagata tauaso, na iloa muamua e le tagata tauaso “tagata ua faapei o laau, o loo savavali.” O Iesu ua “toe faaee atu lea e ia o ona aao i ona mata, … ona toe lelei lea o ia, ua na iloa lelei foi o tagata uma” (Mareko 8:24–25). O le faamalologa ma le tuputupu ae—pe faaletino, faalelagona, pe faalemafaufau—e mafai ona auaua’i mai ma atonu e le vave ona tupu.
O le Tuputupu Ae e Manaomia ai lo Tatou Faaaogaina o Punaoa Uma e Avanoa mo i Tatou
E leai se fofo faigofie mo le maloloina faalelagona ma faalemafaufau. O le a tatou oo i le atuatuvale ma le fememeai ona o loo tatou ola i se lalolagi pa’ū ma se tino pa’ū. E le gata i lea, e tele mafuaaga i mea e ono taitai atu i le iloaina o le gasegase faalemafaufau. E tusa lava po o le a lo tatou manuia faalemafaufau ma le faalelagona, o le taulai atu i le tuputupu ae e maloloina nai lo le faamemelo i o tatou vaivaiga. Na aoao mai Elder Dieter F. Uchtdorf o le Korama a Aposetolo e Toasefululua: “O le Ekalesia e le o se potu o faaaliga taavale—se nofoaga e faaaliali atu ai i tatou lava ina ia mafai ona faamemelo mai i ai isi i lo tatou faaleagaga, gafatia, po o le uluola. Ae e tai pei lava o se fale inisinia, lea e aumai i ai taavale ua manaomia ona toe faaleleia ina ia faaleleia ma toe faafou.”6
O le faateleina o lo tatou faaleagaga o se vaega taua o le manuia o le mafaufau ma le faalelagona, ae e masani lava ona tele atu mea e mafai ona tatou faia, ma e finagalo le Alii tatou te faaaogaina uma ia meafaigaluega ua Ia tuuina mai ia i tatou e faaaoga. E i ai nisi taimi e matamuli ai i le faaaogaina o punaoa faaopoopo ao tatou galulue e faaleleia atili o tatou soifuamaloloina faalemafaufau ma faalelagona, ae ua aoao mai taitai o le Ekalesia e mafai ona taua nei punaoa.
Na aoao mai Sister Reyna I. Aburto, o le Fesoasoani Lua i le Au Peresitene Aoao o le Aualofa e faapea: “E pei lava o soo se vaega o le tino, e oo atu le faiai i faamai, mafatiaga, ma faaletonu o le tino. Pe a mafatia o tatou mafaufau, e tatau ona tatou saili atu i le fesoasoani mai le Atua, mai ia i latou o loo siomia i tatou, ma mai polofesa o le soifua maloloina faafomai ma faalemafaufau.”7
O loo i ai le tatou matafaioi “Ia tatou faia ai ma le fiafia mea uma ua i ai i lo tatou mana; ona mafai lea ona tatou tutu, ma le mautinoa atoatoa, e vaai i le faaolataga a le Atua, ma mo lona aao e faaali mai” (Mataupu Faavae ma Feagaiga 123:17). Atonu tatou te le vaaia Lona aao i le ala tatou te faamoemoe ai pe mananao ai foi, ae o i latou e faalagolago ia te Ia e mafai ona vaai i ai.
O Le Faataitaiga a le Faaola o le Tuputupu Ae
O le faataitaiga aupito sili o le tuputupu ae, o lo tatou Faaola, o Iesu Keriso. Ua aoao mai tusitusiga paia e faapea “sa lei maua e ia le atoatoaga i le amataga, ae sa maua e ia le alofa tunoa mo le alofa tunoa;
“Ma sa lei maua e ia le atoatoaga i le amataga, ae sa alualu pea mai lea alofa tunoa i lea alofa tunoa, seia oo ina maua e ia le atoatoaga;
“Ma sa faapea ona taʼua ai o ia o le Atalii o le Atua, ona sa lei maua e ia le atoatoaga i le amataga.”(Mataupu Faavae ma Feagaiga 93:12–14).
A o tatou taumafai e tuputupu ae ma alualu i luma, e mafai foi e i tatou ona maua “le alofa tunoa mo le alofa tunoa.” Pe a oo ina faigata le olaga, e tatou te ono mafaufau faapea ua tuulafoaiina i tatou e le Atua. E mafai ona tatou maua le filemu ma le mafanafana i le upumoni e faapea o loo silafia i tatou e le Atua le Tama ma lo tatou Faaola, o Iesu Keriso, ma silafia le ala e fesoasoani mai ai ia i tatou e ala i o tatou tofotofoga. O le talitonu ia Iesu Keriso e le o lona uiga e faapea o luitau faaletino o le a muta lo latou i ai, a e tatou te talitonu faapea e mafai e le Alii ona aumaia ia i tatou le malosi e fetaiai ai ma o tatou luitau ao tatou tauivi e avea atili e pei o Ia.8