Matagofie e Sui A’i le Efuefu

Tusia e Yvette Barnes

I le popofou o le 2019, sa amata ai e Sister Setaita Ata lana misiona i le Misiona Joao Pessoa i Matusasa’e o Pasila. I ni nai masina mulimuli ane, sa mafatia o ia i se manu’a tuga o le tuli ma sa tatau ona toe foi i Ausetalia mo ni togafitiga faafomai mo se taimi umi.

I le naunau ai e faamaea lana misiona, o Sister Ata, o lē e sau mai i le Siteki a Melepone Wyndham, i le Uarota a Williams Landing, sa kilia mo le galuega faafaifeautalai i se tausaga mulimuli ane ma sa toe masii atu ai i le Misiona a Melepone Ausetalia. Ona oo lea ia Oketopa 2020, sa toe mafatia foi o ia i se isi lu’itau faalesoifua maloloina o le ulutiga e le ma’onosa’ia.

Faatasi ai ma ona tiga faaletino, sa ia lagona foi o ia ua taofiofia ai ana soa mai le galulue i le mea e gata mai ai le gafatia. O le i ai o lenei avega mamafa i lona mafaufau, sa musu ai Sister Ata e talanoa i lona peresitene o le misiona, ona o le fefe e vave tuua le galuega o le misiona.

Manatu i lona fiafia ina ua iloa e mafai lava ona faaauau le auauna atu i le Alii—e mafai foi ona faafoe ona manaoga faafomai a o ia faamae’aina le vaega o totoe o lana misiona. Ina ua faamalamalama atu e Peresitene Houghton e mafai ona suia o ia e Faamisiona mo Auaunaga, sa vave ona talia e Sister Ata, e ui ina sa ia le i iloaina pe faapefea ona fai. O le aso lava lena sa latou feiloai ai ma Elder ma Sister Nicholls, o Taitai o Misiona mo Auaunaga e vaaia Ausetalia, e ala i le Zoom e faatalanoa o ia ma faamalamalama ia te ia le faagasologa.

I le avea ai o se Faifeautalai mo Auaunaga, sa tatau ona toe foi Sister Ata i le fale e faaauau ai pea ona togafitiga faafomai, ae e tatau ona tausisia pea lana faatulagaga faafaifeautalai o le tatalo i aso taitasi, suesue i tusitusiga paia, ma faamalositino. O le a fuafua foi ma le agaga tatalo e Elder ma Sister Nicholls ia malosi’aga tulagaese e filima’oti ai le ala sili mo ia e saofaga ai i le faapotopotoina o Isaraelu.

Ina ua latou toe fono e fuafua ai taimi fou o lana auaunaga faafaifeautalai, sa matauina e le au Nicholls o Sister Ata e i ai se taleni matagofie o faatufugaga taulima, e ia te ia se lagona tele o le agaalofa ma se malosiaga momosi o le amio. Sa faaalia e Sister Ata lona manao e galue i le malumalu, ma ina ua mavae ni talanoaga, faatasi ai ma le tatalo i o latou loto, sa latou mamanuina se tofiga fou tulaga ese mo ia:

Taitaiga i le Itu: O le a galue Sister Ata o se taitai mo faifeautalai uma mo auaunaga i lana itu.
Galuega Taulima o Faatufugaga: O le a ia fatuina ni nai faatufugaga o meataulima e musuia ai le faatuatua ia Iesu Keriso ma Lana talalelei.
Auaunaga i le Malumalu: O le a galue o ia i le ofisa i le Malumalu o Melepone Ausetalia mo se aofaiga o taimi e malilie i ai i vaiaso taitasi.

Na mua’i faata’ita’i i le ISA ma Kanata i le 2018, o Misiona mo Auaunaga o se auala mo le autalavou o e e le mafai ona galulue faamisiona tala’i e “auauna atu ai i se siosiomaga e fuafua faapitoa i ana taleni, tomai, ma meaalofa.”¹ O Misiona mo Auaunaga na muai faataitai i Ausetalia i le 2020, ina ua maea le aoaoga faamasani a Elder ma Sister Nicholls mo la la’ua taitaiga.

“Ua fo’ia to’atugā uma!” Na faamalamalama mai e Elder Nicholls, “O faifeautalai mo auaunaga e le nonofo ma se soa; latou te le nonofo foi i ni eria faatonuina ma ni tuaoi patino; latou te faaaogaina a latou pine o igoa i na o taimi e faataunuu ai o latou tofitofiga faafaifeautalai.”

Faapei o faifeautalai la te taitaia, o le misiona a Elder ma Sister Nicholls, e tulaga ese foi. E nonofo i la’ua i lo la’ua lava fale i le Talafatai Auro o Kuiniselani ma vaai ai faifeautalai e nonofo i le fia afe kilomita mai le tasi ma le isi. La te sailia avanoa mo auaunaga—i le Ekalesia ma nuu—ma mafaufau ma le magafagafa i “fafo atu o le pusa’ e faafesootai malosi’aga ma taleni a faifeautalai ta’itasi ma se mana’oga patino.

“Sa ou iloa e i ai sa’u taleni tusiata” na fai mai ai Sister Ata, “ae ou te lei faaaogaina mo se taimi umi. O lea ua ou iloa nei e finagalo le Tama Faalelagi ou te faaaogaina le tusiata e auauna atu ai i isi.”

O le mafaufau i tauiviga faalesoifua maloloina na faalavelaveina ai lana misiona i le amataga, atonu e lei filifilia e Sister Ata na lu’itau mo ia lava, ae ua ia iloa ua ia maua nei matagofie e tele e sui a’i le efuefu.²

“Afai e i ai se isi lava mea, a o lo’u siitia mai i se misiona mo auaunaga na fesoasoani ia te a’u [e] iloa ai mea na tuuina mai e le Tama Faalelagi ia te a’u,” na ia faaopoopo mai, “O se vaega tele o la’u misiona mo auaunaga o le faia o le finagalo o le Alii ma na o le fesili atu lava ia te Ia. E toe foi ai i tua i le Sau, Mulimuli Mai ia te Au: afai e i ai sou manao e auauna atu, ona fesili lea i le Alii ma o le a Ia taitai oe ia iloa le mea e fai ma le ala e auauna atu ai.”