Itulau i le lotoifale
Manatua e le Nuu i se Sauniga Mamalu i Latou na Afaina i le Vaa na Goto i Maupiti
O se itu iloga o le talafaasolopito na faapaiaina i Falani Polenisia, e faamanatu ai le Au Paia o Aso e Gata Ai ma isi na maliliu i le 1967 i se vaa na goto.
Sa faia e Le Ekalesia a Iesu Keriso o le Au Paia o Aso e Gata Ai i Falani Polenisia se sauniga i le Aso Toonai 1 Me, e tatala ai se faailoga faaletalafaasolopito ma saafi ai i e na afaina i se mala na tupu i le toetoe 60 tausaga talu ai. Na tupu lea faalavelave i Maupiti, o se motu e tu i matusisifo pe tusa ma le 300 kilomita o Pape’ete.
Na amata le tala o le malaia i le aso 22 Me, 1963, i le taimi na faapaia ai se falesa fou i le motu lata ane o Huahine, e Elder Gordon B. Hinckley, o le sa avea ma sui auai o le Korama a Aposetolo e Toasefululua i le taimi lea, ma sa avea mulimuli ane ma peresitene o le Ekalesia, na pulefaamalumalu ai i lena sauniga na atoa le aso ma toe foi atu ai i Pape’ete ina ua mae’a sauniga.
O lena afiafi, sa toe momoli ai e se vaa e igoa o le Manuia ia tagata o le Ekalesia mai Huafinei Maupiti. O le taeao na sosoo ai, a o taumafai ai e sopoia le aau ‘amu e si’o ai le motu, sa sa’e le vaa i le malolosi o le aave. Sa malelemo tagata e sefululima ma e toasefulufa tagata o le au paia o le paranesi a Maupiti na maliliu, e aofia ai tina e toasefulu ma tamaiti e toafa.
I Pape’ete, sa ta’u atu ai ia Elder Hinckley le faalavelave, ma sa malaga loa lava o ia i Maupiti, ma malaga atu i le po i se vaa. O le taeao na sosoo ai na ia taunuu ai, ma opo atu ma loimata maligi aiga a o latou faavauvau ai.
Sa silia ma le 150 tagata na auai ai i le sauniga i le Aso Toonai 1 Me, 2021 ma sa aofia ai taitai o le Ekalesia, tagata o le paranesi, o tagata na faasaoina ma tauaiga o i latou sa maliliu i le faalavelave. Sa i ai sui taitasi pe sili atu foi o e na tupuga mai i tagata na aafia. Sa o’oo’o lagona ootia i taimi uma o le sauniga, aemaise o le faitauina o igoa o i latou na aafia. Sa taufai faasoa e tagata uma lo latou lagonaina o le auai ai o e ua maliliu i le sauniga.
Sa saunia musika faaleagaga e le Aufaipese a Maupiti, o e sa lagiina i le faaFalani ma le faaTahiti.
O failauga na aofia ai Holly Hinckley Lesan, tama teine a le afafine o Peresitene Hinckley, o le sa saunoa i le sauniga i sana savali na mua’i pu’eina i le faaFalani. Sa ia faamatalaina le taua tele o aafiaga i Maupiti i lona tamamatua.
“Ou te manatu a na faapea e saunoa lo’u tamamatua i le aso ae le o a’u, semanu na te faailoa atu lona alofa loloto mo le Au Paia o atumotu o le moana. Semanu na te tuu atu lana molimau i le moni o le toetu o lo tatou Faaola, le mautu o le iloa o i latou na uma lo latou soifua i lena aso matautia i Maupiti, o le a toe ola mai, ma o le a tatou toe faatasi ma i latou i se aso. O mala o le olaga nei, e le mafai ona taofia ai le matagofie o la tatou malaga i le faavavau.
Sa faaiuina sauniga i se tolaulauga faavitio i le FaaFalani ma le FaaTahiti mai ia Elder Ian S. Ardern, peresitene o le Eria a le Pasefika o le Ekalesia, o le sa saunoa mai lona ofisa i Aukilani.
Na ia saunoa, “Pe a oo mai mala, ma o le a oo mai ia i tatou taitoatasi, tatou te maua le mafanafana i le Aoaoga Faavae autu a Keriso. O lena aoaoga faavae autu e faamautinoa ai ia i tatou e faapea o le a i ai le toetutu ma o le a tatou toe ola mai. Ua tatou iloa foi e taua o tatou augatama uma ia i tatou. O le toatele e leai se maafaamanatu e faatula’i mai e faamamalu ai i latou, pe latou te faamoemoe foi o le a i ai, ae o le mea moni tatou te faamamaluina i latou i le ala tatou te ola ai i o tatou olaga. Ou te iloa e le faagaloina tagata o Tahiti, e le Alii.
Ina ua maea le polokalama, sa faapotopoto le potopotoga i luga o le malae i fafo o le falesa o Maupiti, o Moana Teriipaia, Peresitene o le Siteki a Bora Bora Stake, ma Mark Banner, Peresitene o le Misiona a Falani Polenisia, faatasi ai ma Alice Atuahiva, Pulenuu Lagolago o Maupiti, ma lagolago atu ia Elder Sinjoux e tatala le faailoga o le talafaasolopito. Ona ofoina lea e Elder Sinjoux, o le Fitugafulu Eria mo Falani Polenisia se tatalo na logo i loto, ma le loto nutimomoia o le manatuaga. O loo ta’ua i le faailoga le tala i le faaFalani ma le faaTahiti ma o loo faatu i luga o le palapala e faasaga i le sami o loo siomia i auvae mauga papa, ma lanulauava ma se falesa paepae matagofie.
Sa faafeiloaia e le Pulenuu o Maupiti, o Woullingson Raufauore, aumalaga a taitai o le Ekalesia na taitaia e Elder Sinjoux ina ua taunuu. “Ou te faafetai i Le Ekalesia a Iesu Keriso o le Au Paia o Aso e Gata Ai i le faia o lenei sauniga faamanatu. O le faia o lenei mea e matua maoa’e aua, i se isi itu, ua ia i tatou uma le tiute e manatua ia tagata na tatou galulue faatasi.”
Na maliliu le faletua o Mihimana Pahuiri ma lana tama faatoā savali i le mala. “O lenei mea o se su’ega moni, ma sa mafai ona taofia ai le tuputupu a’e o le ekalesia i Maupiti. Ae o le faatuatua o tagata o le ekalesia na mafai ai ona faaauau ona ola le talalelei. Sa le o a’u o se tagata o se ekalesia i lena taimi o le faalavelave, ae o lo’u toalua o se tasi o le ekalesia. Sa tonu ia te a’u ou te papatiso ina ia mafai ai ona ou alu i le malumalu ma faamau ai ma lo’u toalua ma le ma tama.”
Sa toe ta’ua e Elder Sinjoux ia upu a le Aposetolo na asiasi ane i le 1963. “Sa saunoa Elder Hinckley, ‘O le a ou le faagaloina lava Maupiti.” E faapena foi, o le a le faagaloina lava e lo tatou Tama Faalelagi ma lo tatou Faaola o Iesu Keriso i tatou. O lo La’ua finagalo aupito sili o le valaaulia lea o i tatou e toe foi atu i lo La’ua afioaga pe a uma lenei olaga.