Lua Tupulaga o le Auaunaga Faafaifeautalai mo Aiga Fiti e Toalua

Potu o Talafou

Na iloa e tuafafine faifeautalai e toalua na galulue i Fiti i Le Ekalesia a Iesu Keriso o le Au Paia o Aso e Gata Ai o o la’ua tamā sa soa faifeautalai foi i Fiti a o avea ma talavou matutua

Na maua talu ai nei e ni tama’ita’i talavou o loo avea ma faifeautalai a Le Ekalesia a Iesu Keriso o le Au Paia o Aso e Gata Ai i Fiti se mea e ofo ai.

Sa tofia talu ai nei ia Lolene Tuiqali ma Josephine St. John e avea ma soa, o le mea e nonofo ai ma galulue faatasi.

E lei leva ona amata le la galuega faafaifeautalai o se soa, ae fai e Sister Tuiqali se valaau faavitio i lona tamā. A o la talanoa sa iloa ane e lona tama o le soa a [Sister Tuiqali] o le afafine o le alii sa la galulue faatasi a o avea o ia ma faifeautalai i Fiti i le 1987.

Sa aoao atu e Lolene Tuiqali ma Josephine St. John i tagata le talalelei toefuataiina a Iesu Keriso ma tuuina atu auaunaga i nuu o se soa faifeautalai i Fiti talu mai Fepuari o lenei tausaga.

O loo auauna atu nei talavou volenitia i le eria o Nadi, e le mamao ese mai le mea sa soa ai o la’ua tama.

“Sa ma imeli i lo matou peresitene o le misiona ma fai atu, “O se mea moni malie sa soa o ma tama i Fiti,’” le tala a Sister Tuiqali.

“Sa ou matuai fiafia lava, ae sa sili atu le fiafia o lo’u tama ina ua ia iloa o le a ma galulue ma Sister Tuiqali,” le tala lea a Sister St. John. “Na ia aumaia le tele o fautuaga e uiga i le galulue ai i lena eria o Fiti.”

“O Sister Tuiqali ma Sister St. John o se faamanuiaga i le Misiona a Fiti Suva,” na saunoa ai Brad Markus, peresitene o le Misiona a Fiti Suva.

“O le mea moni o le avea ai o i la’ua o se soa o se molimau lea e silafia e le Tama Faalelagi auiliiliga uma o o tatou olaga. Ese le faamalieloto o le iloa e saunia e lo tatou Tama o i le Lagi se avanoa mo tamā e soa ai ona oo lea i le 34 tausaga mulimuli ane, toe faamanuia i latou e ala i le faatagaina o o la’ua afafine e galulue o ni soa faifeautalai.”

Na mafai e tuafafine faifeautalai e toalua nei ona feiloai atu i le tele o tagata lava ia na tautuaina e o la tama i la la’ua misiona, ma sa faasoa ane e le toatele o tagata tala e uiga i o la tama.

“Sa ou manao e oo i mea sa faamatala soo mai e lo’u tama e uiga i lana misiona,” le tala a Sister St. John. “Ina ua ou iloa o le a ou galue i Fiti, sa faateleina moni ai lo’u naunau e galue.”

Sa la faamatalaina foi a’o lei avea i la’ua ma soa, sa fesoota’i teisi o la’ua tama, ae talu ai ona avea nei i la’ua ma soa, ua talanoa o la’ua tama i vaiaso uma.

“O se mea malie le vaaia o vavega,” le tala a Sister Tuiqali. “E le o vavega tonu ia sa oo i ai o la tama, ae o a ma’ua lava vavega. O se mea lelei tele mo i ma’ua, aemaise i le avea ai ma soa.”

Talu ai tapu o le KOVITI-19 i Fiti, sa manaomia ai ona fatuina e faifeautalai ni auala e sailia ai ma aapa atu ia i latou o loo siomia ai i latou. E toatele na mafai ona maua ma a’oa’o atu tagata i luga o le initoneti. Sa faamatala e Sister St. John e faapea, o lona malamalama i tekinolosi na faateleina a o ia aoao e faaaoga i le taimi o lana misiona.

Sa avea Sister Tuiqali ma faifeautalai mo le silia ma le ono masina, ma o lana galuega totofi talu ai nei o le a’oa’o faamasani o Sister St. John, lea na amata lana auaunaga ia Fepuari.