Nahaunang Kababayen-an sa Pagpahiuli
Nagmaisogon sa Politikal nga mga Kalisod sa Washington, DC
Si Emmeline B. Wells ug si Zina Young Williams napanalanginan og kompiyansa sa ilang pagsulti sa dili popular nga isyu sa mga lider sa gobyerno.
Paghulagway pinaagi ni Toni Oka
Ang duha ka babaye nanganaog sa tren didto sa kaulohan sa Estados Unidos nga ang Washington DC, gipangkapoy apan determinado. Human sa lima ka adlaw nga pagbiyahe gikan sa Siyudad sa Salt Lake, si Emmeline B. Wells ug si Zina Young Williams naglaom sa pagpadayon sa kawsa sa mga miyembro sa Simbahan apan nasayod nga mag-atubang sila og pagsupak.
Niadtong Enero 1879 mitambong sila og nasodnong mga panagtigom mahitungod sa katungod sa kababayen-an sa pagbotar ug sa gipresentar nga mga petisyon ngadto sa kongreso sa Estados Unidos, naghangyo sa mga magbabalaod sa pagtangtang sa pintas nga pamalaod batok sa Simbahan.
“Ako nagtinguha sa pagbuhat sa tanan diha sa akong gahom sa pagtabang nga mapagaan ang kahimtang sa akong kaugalingong katawhan ilabina sa kababayen-an,” mirekord si Emmeline sa iyang diary.1 Gikan sa 1877 hangtod sa 1914, siya ang editor sa usa ka publikasyon alang sa kababayen-an sa Simbahan nga gitawag og Woman‘s Exponent, diin iyang giawhag ang kababayen-an sa maayong mga buhat diha sa panimalay ug sa komunidad.
Ang nasudnong mga lider sa mga katungod sa pagbotar nga sila si Elizabeth Cady Stanton ug Susan B. Anthony “kinasingkasing nga miabi-abi” sa duha ka babaye gikan sa Utah.2 Matinabangon sila nga midistino kanila ngadto sa usa ka komite sa pagdala sa mga mensahe ngadto sa presidente sa nasod, si Rutherford B. Hayes.3
Si Emmeline kompiyansang nakigsulti kaniya, sa pagreport, “Human kami nakahatag kaniya og pipila ka mga kamatuoran kalabot sa kahimtang niini nga mga katawhan, ug unsa ang posible nga mga sangputanan sa grabe ug mapintas nga mga pamaagi, miingon siya nga wala pa gayod siya mikonsiderar sa hilisgotan diha sa panglantaw nga among gipresentar niini.” Gidapit ni Presidente Hayes ang iyang asawa, si Lucy, sa pagpaminaw sa ilang hangyo. “Ang iyang mga pagsabot sa mga pagbati maklaro gayod.”4
Sulod sa duha pa ka semana, si Emmeline ug si Zina midala sa mga mensahe alang sa Simbahan ngadto sa impluwensyal nga mga magbabalaod. Si Emmeline nahinumdom nga sila “kanunayng nakahimamat sa mga tawo nga nagpakita og labing dako nga tinguha sa” ilang mensahe.5
Bisan tuod wala sila molampos sa pag-usab sa opinyon sa publiko nianang tuiga, sulod sa 17 pa ka tuig, si Emmeline ug ang iyang mga kaigsoonan sa Relief Society dayag nga namulong alang sa mga katungod sa kababayen-an ug sa mga miyembro sa Simbahan. Malipayon kaayo kay, niadtong 1896, ang Utah nahimong estado, ug daghang relihiyoso ug sibil nga mga katungod ang napahiuli.