Unsaon Nato Pagpundok sa Israel Karon
Ang pipila sa mga patriyarka sa stake mipaambit sa ilang lahi nga panglantaw ug mga panabot kabahin sa kaimportante sa pagpundok sa Israel.
Sa karaang panahon, ang Ginoo mihimo og pakigsaad uban kang Abraham nga ang iyang kaliwatan mahimong usa ka pinili nga mga katawhan (tan-awa sa Genesis 12:1–2). Kon ang mga kaliwat ni Abraham, ang napulog duha ka mga tribo sa Israel, misupak, sila gisilotan sa Ginoo, nabihag sa Assyria ug sa Babylon, ug sa kataposan nagkatibulaag ngadto sa tanang nasod (tan-awa sa Levitico 26:33). Sa gihapon, ang Ginoo nagtinguha sa pagpanalangin kanila.
Ang karaan ug mga propeta sa bag-ong panahon nanagna nga ang Israel, ang mga katawhan sa pakigsaad sa Ginoo, pagapundukon na sa makausa pa. Karon, kita adunay sagradong responsibilidad sa pagtabang sa pagdala sa nagkatibulaag nga Israel ngadto sa panon sa Ginoo. Kalabot niining importanting buhat, si Presidente Russell M. Nelson nagtudlo: “Kon maghisgot kita sa pagpundok sa Israel sa duha ka habig sa tabil, naghisgot kita, siyempre, sa buhat sa misyonaryo, templo, ug family history. Naghisgot usab kita sa paglig-on sa pagtuo ug pagpamatuod diha sa mga kasingkasing niadtong kauban nato sa pagpuyo, pagtrabaho, ug pagserbisyo.”1
Isip mga sakop sa tribo sa Israel, gihatagan kita og piho nga mga responsibilidad ug mga panalangin. Ang patriyarkal nga mga panalangin nagpahibalo kanato sa atong kaliwatan diha sa balay ni Israel ug sa ingon sa atong personal nga responsibilidad sa pagpundok sa Israel. Tungod kay dinasig ang mga patriyarka sa pagpahibalo kanato niana nga kaliwatan, kami nangutana og pipila ka mga patriyarka sa pagpaambit sa ilang lahi nga panglantaw ug mga panabot sa kaimportante sa pagpundok sa Israel.
Sa Tuo: litrato ni Craig Alan Shelley
Atong Kaliwatan
Ang tanang mga tawo—bisan kadtong dili kaliwat ni Abraham—mahimong kabahin sa balay ni Israel kon sila mohimo og mga pakigsaad uban sa Dios. Si Presidente Russell M. Nelson nagtudlo: “Ang uban nato mga tinuod nga binhi ni Abraham; ang uban gipundok sa iyang pamilya pinaagi sa pagsagop. Ang Ginoo wala maghimo og kalainan. … Ang Iyang Simbahan naghatag og patriyarkal nga mga panalangin sa paghatag sa tigdawat og panan-awon sa iyang kaugmaon ingon man usab usa ka sumpay sa nangagi, gani usa ka pagpahayag sa kaliwatan.”2
“Sa pagbuhat sa atong bahin sa pagpundok sa mga tribo sa Israel, kinahanglan gayod una natong masabtan kon unsa ang kinahanglan natong buhaton,” miingon si Brother Keith Stapleton, usa ka patriyarka sa Georgia, USA. “Kon ang mga kaliwatan sa usa ka tawo gipahayag sa ilang patriyarkal nga panalangin, kinahanglan ilang ton-an ang mga panalangin ug ang mga responsibilidad sa mga tribo sa Israel.”
Daghang mga miyembro sa Simbahan karon sakop sa tribo ni Efraim o Manases. Ang mga kaliwatan niining mga tawo gisugo sa pagpundok sa nagkatibulaag nga Israel, o ang “pag-awhag og dungan ang mga katawhan” (Deuteronomio 33:17).
Apan bisan unsa man nga tribo kita nahisakop, matag usa kanato adunay importante nga tahas nga buhaton sa pagpundok. “Kon kita makasabot nga kita gikan sa usa sa mga tribo nga nakita sa karaang mga propeta nga molihok ug mopundok sa Israel, kini naghatag kanato og pagsabut sa katuyoan,” miingon si Brother Barre Burgon, usa ka patriyarka sa Utah, USA.
Pinaagi sa pagkasayod ug pagsabot sa atong kaliwatan, kita makahibalo ug makasabot sa atong pakigsaad nga responsibilidad sa pagtabang sa pagpundok sa Israel. “Hinumdomi nga ang Ginoo misugo kang Lehi sa dili pag-adto sa gisaad nga yuta nga dili una makakuha sa mga kasulatan nga naghisgot sa iyang kagikanan,” miingon si Brother Vyacheslav Protopopov, usa ka patriyarka gikan sa Moscow, Russia. “Ang Ginoo gusto nga ang Iyang mga katawhan masayod kon si kinsa sila.”
Mga Paagi nga Kita Makapundok sa Israel
Adunay daghang paagi sa pag-apil sa pagpundok sa Israel, nga gihulagway ni Presidente Nelson isip “ang labing importante nga buhat sa kalibotan.”3 Kini nga buhat dili kinahanglan nga labihan ka daghan. Sa pagkatinuod, usa kini ka talagsaong kasinatian nga mahimong kabahin niini. Si Brother Calixto Muruchi, usa ka patriyarka gikan sa La Paz Department, Bolivia, mipasabot nga tungod kini sa gugma sa Dios nga Siya “naghatag kanato og oportunidad nga mahimong mga instrumento sa Iyang mga kamot aron ang tanan Niya nga anak nga mga lalaki ug anak nga mga babaye makahibalo sa gipahiuli nga ebanghelyo ni Jesukristo ug nga kitang tanan makabaton og oportunidad sa pagbalik ngadto sa Iyang presensya ug makapanunod sa kinabuhing dayon.”
Busa unsaon nato sa pagpundok sa Israel? Pipila ka mga butang nga ang matag usa kanato makahimo sa pag-apil niining dakong buhat.
Misyonaryo nga Buhat
Kabahin sa kaimportante sa misyonaryo nga buhat, si Brother Wayne Allgaier, usa ka patriyarka sa Maryland, USA, miingon, “Ang Atong Amahan sa Langit maikagon sa pagpanalangin sa tanan Niyang mga anak. Ang mga paningkamot sa pagpundok kanila og balik ngadto sa Iyang panon nakahatag kanila og dalan ngadto niining mga panalangin.”
“Kita naghatod sa mga tawo sa oportunidad alang sa mahangturong kahimayaan,” midugang si Brother Burgon. “Mao kana ang tibuok katuyoan sa kinabuhi dinhi sa yuta. … Mao gayod kini ang oportunidad alang sa Lagitnong Amahan aron mabawi og balik ang daghan sa Iyang mga anak.”
Ang mga Propeta ug apostoles sa kasagaran nag-awhag kanato sa paghimo sa misyonaryo nga buhat nga usa ka “normal ug natural” nga bahin sa atong inadlaw-adlaw nga kinabuhi.4 Samtang si Elder Neil L. Andersen sa Korum sa Napulog Duha ka Apostoles mipasabot, dili kinahanglan nga mobati nga “sad-an ka tungod kay nagkulang ka sa imong pagpaambit sa ebanghelyo.” Hinoon, ikaw “[maka]ampo … ‘aron makabar[o]g ka nga [usa ka saksi] sa Dios’ [Mosiah 18:9]” ug “mahimong bukas bahin sa imong hugot nga pagtuo diha kang Kristo.”5
Samtang mag-ampo kita alang sa oportunidad “nga makit-an kadtong andam nga mopatigbabaw sa Dios labaw sa tanan diha sa ilang kinabuhi,”6 kita mahimo nga giyahan aron masayod unsaon sa pagpaambit ang kahayag sa ebanghelyo niadtong naglibot kanato.
Litrato sa Nuku‘alofa Tonga Temple pinaagi ni James Babcock
Buhat sa Templo ug Family History
Ang pagpundok sa Israel mahitabo sa duha ka habig sa tabil. Si Brother Allgaier nakamatikod sa pagpaspas sa pagpundok sa Israel pinaagi sa family history ug buhat sa templo: “Nakadungog kita ni Presidente Nelson nga namulong pa og dugang sa pagpundok sa Israel nga dili lang sa misyonaryo nga buhat apan sa duha ka habig sa tabil. Adunay daghan pang tawo sa pikas habig sa tabil kay sa ania dinhi sa yuta nga naghulat alang niining importante nga mga ordinansa nga himoon. Kadtong mga tawo sama ra ka importante sa mga tawo kinsa buhi karon nga nagkinahanglan sa ebanghelyo sa ilang kinabuhi dinhi sa yuta.”
Si Presidente Nelson nagtudlo, “Bisan kanus-a nga mobuhat kita og bisan unsa sa pagtabang ni bisan kinsa—sa matag habig sa tabil—sa paghimo ug pagtuman sa ilang mga pakigsaad sa Dios, nagtabang kita sa pagpundok sa Israel.”7
Paglig-on sa Zion
Kauban sa misyonaryo, templo, ug buhat sa family history, si Presidente Nelson nagtudlo nga ang pagpundok sa Israel usab “[nagpasabot] sa paglig-on sa pagtuo ug pagpamatuod diha sa mga kasingkasing niadtong kauban nato sa pagpuyo, pagtrabaho, ug pagserbisyo.”8
Kini nagpasabot nga kita kinahanglan gayod nga motukod sa atong kaugalingong hugot nga pagtuo ingon man usab sa pagsuporta ug paglig-on sa uban. “Kita kinahanglan nga hingpit nga malambigit sa ebanghelyo,” miingon si Brother Lovelock, usa ka patriyarka gikan sa Queensland, Australia. “Kon ato kanang buhaton, kita nagtabang sa pagpundok sa Israel.” Kon kita malambigit diha sa ebanghelyo, makapalig-on kita sa uban samtang kita mangalagad, motuman sa atong mga calling, ug mosuporta sa atong mga pamilya.
Apil sa Pagpundok
“Ang pagpundok mahitabo kon kita motabang niini o dili,” miingon si Brother Allgaier. “Kini mao ang buhat sa Ginoo, ug Siya mosiguro aron kini mahuman. Alang niadtong mas aktibo niini, adunay dugang pa nga mga panalangin nga gibu-bu diha sa ilang mga ulo.”
Samtang kita magtinguha sa pagtudlo sa ebanghelyo, mopasanay og matarong nga mga pamilya, mopalambo sa atong mga calling, ug sa mangalagad niadtong naglibot kanato, nagtabang kita sa pagpundok sa Israel. Miingon si Brother Burgon, “Adunay pagkadinalian taliwala sa mga propeta, sa Korum sa Napulog Duha ka Apostoles, ug uban pa sa pagpangulo sa Simbahan nga panahon na kini nga pakusgan ang pagpaningkamot. Panahon na sa pag-andam sa atong kaugalingon ug moandam sa uban alang sa mahangturon nga himaya.”
“Niining milabayng pipila ka tuig,” miingon si Brother Lovelock, “ang batan-ong katawhan nga mianhi aron sa pagdawat sa ilang patriyarkal nga panalangin mao ang matahom ug lig-on nga mga kalag. Ako walay pagduha-duha nga ang pipila sa labing bililhon ug halangdon nga mga anak sa Dios uban kanato karon, ug sila nangandam alang sa Ikaduhang Pag-anhi sa atong Manluluwas, si Jesukristo, ug pagtabang niining talagsaong buhat sa pagpundok sa Israel.”
Ang pagpundok sa Israel nahitabo na karon, ug ang Ginoo nanagna nga kini mahimong usa ka mahimayaon nga panghitabo (tan-awa sa Jeremias 16:14–15). Si Presidente Nelson miingon: “Kon kita makaamgo nga kita mga anak sa pakigsaad, makaila kita kon kinsa kita ug unsa ang gipaab[o]t sa Dios nato. Ang Iyang balaod nahisulat diha sa atong mga kasingkasing. Siya mao ang atong Dios ug kita Iyang katawhan.”9 Isip mga kaliwatan sa amahan nga si Abraham, kita ang responsable sa pagdapit sa uban aron mapundok ngadto sa panon sa mga misyonaryo, templo ug buhat sa family history. Sa pagbuhat sa ingon, mas maandam kita alang sa kinabuhing dayon.