Pagsabot sa Inyong Balaanong Pagkatawo

Pinaagi sa mga kawani sa YA Matag Semana

Kon tinuoray kitang magtinguha sa pagsabot sa atong balaanong pagkatawo, ang atong panglantaw mausab.

Kinsa ako? Kinsa ako gustong mamahimo? Kini mao ang duha ka pangutana nga tanan nato tingali mangutana sa usa ka punto sa atong kinabuhi.

Ang pagsabot sa atong pagkatawo mao ang labing importante kon sa unsang paagi kita motan-aw sa kaugalingon ug sa uban. Apan kini nga mga pangutana mahimong lisod nga tubagon kon ang mga tingog sa atong palibot mag-ingon nga ang atong pagkatawo ug bili nagagikan sa temporal nga mga butang sama sa atong hitsura, sosyal nga kahimtang, o kalamposan sa trabaho o sa eskwelahan.

Sayon ra kaayo nga maminaw sa kalibotan, ug ang mga tingog niini makapabati kanato nga nabug-atan, nagsubo, o nahisalaag. Apan kon kita makasabot gayod sa atong diosnong kinaiya, kita makasugod sa pagtan-aw sa atong kaugalingon ug sa uban sama sa pagtan-aw sa Dios kanato.

Kinsa Kita?

Pipila kanato nagdako nga nagkanta sa “Ako Anak sa Dios” (Mga Himno, nu. 189) o nakakat-on niini sa usa ka punto. Apan bisan kon kamo nakasag-ulo sa mga pulong, sayon ra nga mabalewala ang kaimportante sa atong langitnong panulundon.

Si Apostol Pablo mitudlo nga kita mas labaw pa kay sa mortal nga mga binuhat:

“Makighiusa ang maong Espiritu sa atong espiritu aron pagmatuod nga kita mga anak sa Dios” (Mga Taga-Roma 8:16).

Ang mga propeta ug apostoles sa modernong panahon mipamatuod pag-usab niini nga kamatuoran. Si Presidente M. Russell Ballard, Akting nga Presidente sa Korum sa Napulog Duha ka Apostoles, mitudlo: “Tungod kay kita espiritu nga mga anak sa Dios, ang tanan adunay balaang gigikanan, kinaiyahan, ug potensyal. Ang matag usa kanato ‘hinigugmang espiritu nga anak nga lalaki o babaye sa langitnong mga ginikanan.’ Mao kini ang atong kailhanan [identity]! Mao kini kon si kinsa gayod kita!”¹

Kini nga kamatuoran naglakip sa kahibalo nga kita nagpuyo uban sa Dios sa wala pa kini nga kinabuhi, nga kita gilalang diha sa Iyang panagway, ug nga kita dili lamang adunay balaanong kinaiya apan usab adunay balaan nga padulngan.

Pag-ugmad og Pagsalig

Bisan pa sa tanan niini nga mga pahinumdom, usahay kita gihapon makapangutana kon kinsa kita. Si Satanas kanunay nga naningkamot nga kita makalimot kon si kinsa kita tungod kay siya nasayod nga kon kita makasabot ug magpuyo sumala sa atong balaanong pagkatawo, kita mapanalanginan og balaanong gahom. Ang atong pagsalig mapalambo samtang makaila kita sa Langitnong Amahan ug ni Jesukristo.

Samtang magtuon kamo sa mga kasulatan, pangita og ebidensiya sa gugma sa Dios alang sa Iyang mga anak. Pag-ampo nga makakita sa impluwensiya sa Dios diha sa inyong kinabuhi, ug irekord ang mga higayon nga mabati ninyo ang Iyang gugma o makaila sa Iyang giya. Kon moabot ang negatibong mga hunahuna, pahinumdomi ang inyong kaugalingon kon giunsa ninyo pagkahibalo nga ang Dios nakaila ug nagpakabana kaninyo.

Kat-oni ang mga hiyas sa Manluluwas. Samtang inyong buhaton, mas makita ninyo kini diha sa inyong kaugalingon ug makabaton og mas klaro nga panglantaw sa tawo nga kamo mamahimo pinaagi sa Iyang tabang (tan-awa sa Moroni 7:48).

Ug ang pagpalambo og mas suod nga relasyon uban sa Langitnong Amahan ug sa Manluluwas makatabang kaninyo nga makakita sa walay kinutoban nga potensiyal nga Sila nakakita diha kaninyo.

Pagkahibalo sa Atong Diosnong Kinaiya

Busa unsa ang mabuhat niini nga kahibalo alang kaninyo? Kon kita tinud-anay nga makasabot nga kita mga anak sa Dios, kita:

Makakaplag sa atong bili diha sa atong relasyon uban sa Dios kay sa temporaryo o kalibotanong mga kapanguhaan.
Makakita nga ang Iyang gugma magwagtang sa kahadlok ug magdala og kalinaw sa atong mga kinabuhi (tan-awa sa 1 Juan 4:18).
Makakita lapas sa atong mga panaglahi ug makahigugma sa uban. Kitang tanan “mga igsoong lalaki ug mga igsoong babaye tungod sa usa ka komon nga balaang panulundon,” mipasabot si Presidente Ballard. “Kanang usa ka yano, makapahiusa nga kamatuoran kinahanglang mopatigbabaw sa tanan nga atong gitugotan nga makaingon og pagkabulag ug pagkabahin taliwala kanato.”²
Pagbaton og mahangturon nga panglantaw. Ang atong balaanong pagkatawo nagpahinumdom kanato sa atong kataposan nga tumong—nga mahimong sama sa atong langitnong mga ginikanan ug makabalik sa pagpuyo uban kanila. Sama sa gitudlo ni Elder José A. Teixeira sa Seventy, “Ang pagsabot kon kinsa gayod kamo mas makaandam kaninyo sa pag-ila ug paghinumdom sa inyong agianan pauli ngadto sa inyong langitnong panimalay ug mangandoy nga maanaa didto.”³
Pangita og pagsalig ug padayon sa pagsalig sa giya sa Dios latas sa tanang oportunidad, hagit, ug kasinatian nga moabot kanato.

Ang pagkahibalo kon kinsa gayod kita makatabang kanato nga makakaplag og malungtarong kalipay ug kalinaw. Mao nga kon magkalisod ang kinabuhi o ang mga tingog sa kalibotan magkakusog, hinumdomi nga ang atong Langitnong Amahan kanunay nga anaa aron sa pagtabang kanato nga makakita sa atong mga kaugalingon kon kinsa gayod kita ug kon kinsa kita mamahimo.