Ang Labing Mahinungdanon nga mga Gasa sa Pasko

Ni Elder Dieter F. Uchtdorf

Sa Korum sa Napulog Duha ka Apostoles

Unsa nga gasa ang atong mahatag sa atong Manluluwas tungod sa tanan nga Iyang nabuhat alang kanato?

Ang Pasko kanunayng usa ka espesyal nga panahon alang kanako. Usa ka panahon sa paghigugma. Usa ka panahon sa paghatag. Usa ka panahon sa paghinumdom.

Nakahinumdom ko sa buhong, gatosan na katuig nga tradisyon sa Pasko sa Czechoslovakia nga mipahingangha kanako sa bata pa kaayo ko. Nakahinumdom ko sa mga kahoy sa Pasko nga gipahayagan sa kandila, mga gasa nga kinamot pagkahimo, ang kahumot sa mga giandam nga mga pagkaon. Nakahinumdom ko sa matahom nga mga kanta sa pasko ug sa talagsaong musika sa organo nga nakapasanag sa mangitngit nga kadalanan sa Zwickau sa Silangang bahin sa Germany. Nakahinumdom usab ko nga sa gamayng lawting sa among pamilya naghuot didto human kami miikyas sa ikaduhang higayon gikan sa makuyaw nga mga sitwasyon ug misugod og bag-ong kinabuhi sa Kasadpang bahin sa Germany human sa Ikaduhang Gubat sa Kalibotan.

Ako pang mahinumdoman og balik ang kaguol ug kalipay, tingali ang akong mahinumdoman gayod kabahin sa panahon sa Pasko mao ang gugma nga aduna ang akong pamilya sa usag usa, kon giunsa namo sa paghigugma ug pagdawat ang gipahiuli nga Simbahan ni Jesukristo, ug giunsa namo sa paghigugma ang Manluluwas.

Samtang nagsingabot na usab ang Pasko, napahinumduman ako sa mga pulong ni Presidente Russell M. Nelson nga bag-ohayng gipaambit kalabot sa atong pagtutok atol sa panahon sa Pasko: “Wala nay mas importante pa nga atong mahimo karong Pasko kay sa panghingosgan ang pagtutok diha sa Manluluwas ug sa gasa kabahin sa unsa gayod ang kahulugan sa Iyang Kinabuhi ngari kanato.”¹

Napahinumduman usab ako ni Presidente Ezra Taft Benson (1899–1994), kinsa gitahasan sa pagtabang sa mga miyembro sa Simbahan sa Germany human sa Ikaduhang Gubat sa Kalibotan. “Pinaagi sa dinasig sa Dios nga programa sa kahupayan, siya tinod-anayng mipakaon sa gigutom, mihupay sa nagbakho, ug mibayaw nga mas mapaduol ngadto sa langit sa tanan nga Iyang gikahimamat.”²

Paglabay sa katuigan, si Presidente Thomas S. Monson (1927–2018) mipasabot niana nga panghitabo sa usa ka pagpahinungod sa Zwickau. Atol sa miting, usa ka tigulang nga miyembro sa Simbahan miduol kaniya ug miingon: “Palihog sultihi si Presidente Benson nga kami nahigugma kaniya. Siya miluwas sa among kinabuhi: sa akong kinabuhi, sa akong asawa, sa akong mga anak, ug daghan pa, daghan pang uban.’ Sama siya sa usa ka anghel nga gipadala sa Dios aron tinud-anayng ipahiuli ngari kanamo ang paglaom ug kamasaligon diha sa umaabot.”³

Minahal nga mga kaigsoonan, minahal nga mga higala, wala nay mas maayo nga panahon kay sa karon, niining panahon gayud sa Pasko, sa pagsunod sa maong mga ehemplo ug sa pagpahinungod og usab sa atong mga kaugalingon ngadto sa mga baroganan nga gitudlo ni Jesus ang Kristo. Mao kini ang husto nga panahon sa paghigugma sa Ginoo nga atong Dios sa tibuok natong kasingkasing—ug sa atong mga silingan sama sa atong kaugalingon.

Maayo nga hinumdoman nga “siya kinsa naghatag og kwarta nga nakahatag og daghan, siya kinsa naghatag og higayon nakahatag og labaw pa, apan siya kinsa naghatag sa iyang kaugalingon nakahatag sa tanan. Himoa kini nga usa ka paghulagway sa atong mga gasa sa Pasko.”⁴

Tutokan ang Iyang Kinabuhi

Kadaghanan sa kalibotan magsaulog sa Pasko, apan isip mga disipulo ug sumusunod ni Jesukristo, kita mihimo og usa ka pakigsaad nga “kanunay mohinumdom kaniya” (Doktrina ug mga Pakigsaad 20:77, 79). Sa Pasko, ato kining makita nga sayon ra ang pagtutok diha kang Kristo ang bata kinsa nahimong atong Manluluwas ug Hari.

Kita motutok ngadto kang Jesukristo samtang kita maglipay diha saIyang pagkatawo. Kita magsaulog uban sa pamilya ug mga higala sa “maayong balita sa dakong kalipay” (Lucas 2:10). Maminaw kita sa sagradong musika nagbalita sa Iyang pag-anhi sa yuta. Atong mabasa ang natala sa kasulatan kabahin sa Iyang pagkatawo diha sa Mateo, Lucas, ug 3 Nephi. Kita mopamatuod nga si Jesus mao ang gipanagna nga Immanuel, natawo kang Maria, kinsa “giputos sa bakbak ug gipahigda sa pasungan; tungod kay walay luna alang kanila sa balay nga abutanan” (Lucas 2:7; tan-awa usab sa Mateo 1:23; Isaias 7:14).

Motutok kita ni Jesukristo samtang magtuon kita ug mohangop sa Iyang mga pagtulon-an. Maningkamot kita nga mahimong maaghop ug maloloy-on, tigpasiugda sa kalinaw ug putli sa kasingkasing, mapasayloon ug matinud-anon. Kita mahimong hinay sa paghukom ug dali nga mag-ampo ug mopasaylo. Kita motratar sa uban sama sa atong gipangandoy nga pagtratar kanato. Kita nagtinguha sa “maayong bunga” nga moabot gikan sa balaang doktrina. Kita “[m]agbuhat sa kabubut-on” sa atong Amahan sa Langit.⁵

Kita motutok kang Jesukristo samtang kita nagsunod sa Iyang hingpit nga ehemplo. Siya mitudlo nato unsaon sa paghigugma, pagpaambit, ug pagdapit pinaagi sa pagserbisyo, pagtuman, pag-ampo, pagsakripisyo, ug paglahutay.

Sama ni Jesus, kita mangita og mga oportunidad sa pagpanalangin sa mga anak sa Dios samtang kita “naghimog maayong butang” (Mga Buhat 10:38; tan-awa usab sa Mateo 5:16). Atong sundon ang Iyang ehemplo sa pagkamasulundon ngadto sa Amahan samtang kita mopasalig pag-usab sa pagsunod sa pulong sa Dios ug bag-uhon pag-usab ang atong mga paningkamot sa pagtuman sa Iyang mga sugo (tan-awa sa Juan 14:15).⁶

Atong dawaton ang Iyang pagdapit nga “sunod kanako” (Mateo 19:21). Kita modapit sa atong isig katagilungsod sa kalibotan sa pagduol ug pagtan-aw, pagduol ug pagtabang, pagduol ug pagpasakop, bisan kon kita mag-atubang og pagpanglutos, tintasyon, o kalisdanan.

Motutok diha sa Iyang mga Gasa

Ang gasa sa unsay kahulugan sa pagkatawo ug kinabuhi sa Manluluwas ngari kanato makaplagan ang katumanan niini diha sa Pag-ula ug Pagkabanhaw ni Jesukristo. Ang Manluluwas nangurog tungod sa kasakit, miagas ang Iyang dugo sa matag lungag sa panit, Siya nag-antos sa lawas ug espiritu (tan-awa sa Doktrina ug mga Pakigsaad 19:18). Ang Iyang sakripisyo alang sa tanang mga anak sa Dios ug sa Iyang kadaugan batok sa sala ug kamatayon naglangkob og usa ka mahinungdanon nga gasa. Sa pagsabot nianang labing bililhon nga gasa, kita kinahanglan nga mogahin og panahon sa pagpamalandong sa Pag-ula sa Manluluwas ug unsay pasabot niini ngadto sa matag usa kanato.

Tungod sa Pag-ula ni Jesukristo, kita nasayod nga kita makakaplag og pagluwas gikan sa pagmahay. Nasayod kita nga kita mausab, molambo, ug makabuntog. Kita nasayod nga kita makahinulsol sa atong mga sala ug mapasaylo. Ug samtang kita mogamit sa hugot nga pagtuo ngadto sa paghinulsol, kita nasayod nga ang gipangayo sa kaangayan kinahanglan matagbaw (tan-awa sa Alma 34:16).

“Ang paghinulsol usa ka talagsaong gasa,” miingon si Presidente Nelson. “Usa kini ka proseso nga dili angay nga kahadlokan. Usa kini ka gasa nga atong dawaton uban ang kalipay ug ang paggamit—gani hangupon—sa matag adlaw samtang kita magtinguha nga mahimong mas sama sa atong Manluluwas.”⁷

Tungod sa batang Kristo, kita nakadawat og balaan nga gasa sa Pag-ula ni Jesukristo. Tungod niini nga gasa, kita makakaplag og grasya ug giya. Kita makahimo sa pagsabot sa pag-antos. Kita makakaplag og kalinaw, “dili sama sa hinatagan sa kalib[o]tan” apan sama sa hinatagan sa Ginoo ngari kanato (Juan 14:27).

Ang mga kasaypanan mahimong matarong. Mga palas-anon mahimo nga magaan. Tungod sa walay kinutuban nga sakripisyo ni Jesukristo, kita makakaplag og makapagawasnon nga paglaom.

Ug unsa man ang angay natong laoman?

Si Mormon mitubag: “Tan-awa ako moingon nganha kaninyo nga kamo magbaton og pagla[o]m pinaagi sa pag-ula ni Kristo ug sa gah[o]m sa iyang pagkabanhaw, aron mabanhaw ngadto sa kinabuhi nga dayon, ug kini tungod sa inyong hugot nga pagtuo diha kaniya.” (Moroni 7:41).

Ang Pag-ula ug Pagkabanhaw sa Manluluwas ang nakapahimong posible sa labing mahinungdanon sa tanan nga mga gasa sa Pasko: hangtod sa kahangturan nga kinabuhi (tan-awa sa Doktrina ug mga Pakigsaad 6:13; 14:7).

Dili ikatingala nga kita nagkanta og, “Kalipay sa Kalib[o]tan.”⁸

Ang Atong Gasa ngadto Kaniya

Uban ni Apostol Pablo, kita mamahayag, “Pasalamatan nato ang Dios niining bililhon kaayong gasa” (2 Mga Taga-Corinto 9:15).

Apan unsa ang atong gasa agi og balos?

Ang gasa nga Iyang gipangayo kanato dili mapalit sa kwarta. Dili nato kini makaplagan sa online nga tindahan. Dili kita mahangyo sa usa ka tawo sa pagbuhat niini alang kanato. Dili kita makabilin niini ilawom sa kahoy sa Pasko.

Unsay gipangayo sa Manluluwas kanato mao ang atong kasingkasing.

Unsa ang akong ikahatag Kaniya,
Sa kabos nga sama nako?
Kon ako usa ka magbalantay
Magdala ko og usa ka nati nga karnero,
Kon ako usa ka Maalamon nga Tawo
Akong buhaton ang akong bahin,—
Apan unsay akong ikahatag Kaniya,
Ihatag ang akong kasingkasing.9

Sa paghatag Kaniya sa atong kasingkasing, una kinahanglang modawat kita sa Iyang tabang. Ang paghatag sa Manluluwas sa atong tibuok kasingkasing nagpasabot sa pagduol ngadto Kaniya uban sa masulub-on nga kasingkasing ug mahinulsulon nga espiritu (tan-awa sa 3 Nephi 12:19). Niana lamang nato hingpit nga madawat ang Iyang gasa sa Pag-ula ug mosarang alang sa gasa sa Dios sa kinabuhing dayon. Samtang kita andam nga maghinulsol, atong gipakita ang atong gugma ug pasalamat alang sa gasa sa Dios ug sa sakripisyo sa Manluluwas alang kanato.

Sa dihang gihimo ni Jesukristo nga mamaayo pag-usab ang atong mga kasingkasing, ang atong hingpit nga kalipay nabug-os. Ug kon bug-os ang atong kalipay, gusto kita nga mopaambit niining nagbinugtong nga kasinatian sa gugma, kalinaw, ug paglaom sa tanang anak sa Dios. Gusto kita nga moserbisyo sa Dios ug sa atong isig ka tawo. Ug kita gusto nga motanyag ngadto sa tanan sa labing bililhong gasa nga nahatag sukad, gani “ang pan nga nagahatag sa kinabuhi” (Juan 6:35) ug ang “tubig nga naghatag sa kinabuhi” (Juan 4:10).

Samtang atong gihimo ang Manluluwas ug ang Iyang langitnong gasa ngari kanato nga mao ang sentro sa atong kinabuhi niining panahon sa Pasko ug sa kanunay, atong gipahayag sa kalibotan uban sa hingpit nga kalipay ug kaligdong nga ang kinabuhi ni Kristo “nagsugod dili lamang sa Betlehem ni natapos sa Kalbaryo.”¹⁰

Ang tanan kinsa modawat sa Iyang mahigugmaon nga mga gasa dili gayod gutomon o uhawon. Sila makakaplag og kapahulayan alang sa ilang mga kalag (tan-awa sa Mateo 11:29) ug maglipay uban sa tibuok nilang kasingkasing ug kalag nga “ang Ginoo moabot.”¹¹

Niining panahon sa Pasko ug sa tibuok tuig, hinaot nga kita makadawat ug mohatag sa labing talagsaong mga gasa sa Pasko.