Family History, Mga Templo, ug Misyonaryo nga Buhat: Gamhanan nga mga Kauban sa Pagpundok sa Israel
Dili kini managlahi apan mga bahin tanan sa samang mahinungdanon nga buhat.
Litrato sa London England Temple ni Mark Henderson; litrato sa sister nga misyonaryo ni James Whitney Young
Duha ka sister nga mga misyonaryo sa Texas Houston Mission mibati nga giaghat sa pagtudlo og leksiyon mahitungod sa katuyoan sa templo. Atol sa leksiyon nahisgotan sa tawo nga ilang gitudloan nga ang iyang igsoon nga lalaki namatay pipila na ka tuig ang milabay. Ingon nga nabati na ang Espiritu mahitungod ni Joseph Smith ug sa Basahon ni Mormon, sa dihang naamgohan niya nga makahatag siya og makaluwas nga mga ordinansa alang sa iyang igsoon nga lalaki, gidawat niya ang pagdapit sa mga misyonaryo nga magpabunyag. Sa wala madugay, isip usa ka bag-ong miyembro, gibunyagan siya alang sa iyang namatay nga igsoong lalaki sa Houston Texas Temple.
Sa Tempe, Arizona, nangutana ang usa ka miyembro sa Simbahan sa iyang silingan kon ganahan ba siya og tabang sa paghimo og family tree aron sa pagpakita sa iyang kagikanan. Midawat ang silingan. Ang miyembro mitabang sa silingan nga idugang ang mga ngalan sa iyang mga ginikanan ug mga apohan sa FamilySearch. Midugtong sila sa impormasyon nga anaa na, ug sa wala madugay ang silingan aduna nay fan chart nga nagpakita sa lima ka henerasyon sa iyang pamilya. Kini nakapainteresado sa lalaki bahin sa ebanghelyo ug sa kataposan misangpot sa bunyag ug sa pagdala sa mga ngalan sa iyang mga katigulangan ngadto sa templo.
Ang mga istorya nga sama niini—ug adunay gatosan niini—naghulagway kon sa unsang paagi ang family history, misyonaryo nga buhat, ug buhat sa templo maghiusa aron sa pagpaduol sa mga tawo ngadto sa ebanghelyo.
Mga Bahin sa Samang Plano
“Ang katawhan adunay kinaiyanhong tinguha nga mahibalo sa mga butang mahitungod sa ilang katigulangan,” miingon si Presidente Russell M. Nelson. “[Kana] mahimo nga usa ka natural nga oportunidad alang sa atong mga misyonaryo.”1 Kining kinaiyanhong tinguha hinatag sa Dios ug usa ka gamhanang paagi sa pagbalik sa mga kasingkasing ngadto sa mga katigulangan nga naghulat sa pagdawat sa mga ordinansa sa templo. Ang pagkonektar ngadto niini nga mga katigulangan makatabang usab sa pag-andam sa mga kasingkasing sa mga buhi sa pagdawat og mahangturong mga kamatuoran—sa ingon naggiya sa mga tawo sa duha ka habig sa tabil ngadto sa templo.
Sa dihang ang anghel Moroni mipakita kang Joseph Smith niadtong Septiyembre 1823, gisultihan niya si Joseph mahitungod sa Basahon ni Mormon—“ang instrumento sa Dios sa pagpahinabo [sa] panagpundok”2—ug dayon mikutlo og pipila ka mga tudling sa kasulatan. Usa niadto nga mga tudling adunay kalabotan sa pagbalik ni propeta Elijah, kinsa mohatag sa mahinungdanong mga yawe sa pagkapari ug mopasiugda sa usa ka panahon nga ang mga kasingkasing sa mga anak mobati ngadto sa ilang mga amahan (tan-awa sa Malaquias 4:6; Joseph Smith—Kasaysayan 1:27–43).
Kanunay natong gigamit ang pulongan nga “ang espiritu ni Elijah” sa paghulagway sa interes ug gugma sa mga tawo alang sa ilang mga katigulangan.3 Si Presidente Nelson miingon nga kini mao ang “ebidensya sa Espiritu Santo nga nagsaksi sa balaanong kinaiya sa pamilya.”4
Kini nagpasabot kon ngano nga daghang tawo ang mobati og grabe nga katagbawan kon sila makadiskobre og impormasyon mahitungod sa ilang mga katigulangan. Sama sa kadaghanan sa mga tawo nga adunay kinaiyanhon nga pagbati nga ang pamilya mao ang labing importante sa kinabuhi, nasayod usab sila nga ang pamilya kinahanglan nga maglakip niadtong kinsa nangamatay na. Samtang magkat-on sila og dugang mahitungod niini nga mga sakop sa pamilya kinsa namatay na, ang ilang mga kasingkasing malipayong mobati aron sa paghangop kanila. Kini dili usa ka emosyonal nga tubag lamang apan kasagaran usa ka espirituhanong tubag nga gigiyahan sa Espiritu Santo.
“Ang pagbati ngadto sa mga amahan makapukaw ug makaandam sa kasingkasing alang sa dako nga kausaban,” miingon si Elder David A. Bednar sa Korum sa Napulog Duha ka Apostoles. “Sa ingon, ang espiritu ni Elijah makatabang sa pagkakabig.”5 Klaro lang, ang family history, misyonaryo nga buhat, ug buhat sa templo gituyo nga gamiton nga magkauban. Uban sa paghatag og gibug-aton sa atong propeta sa pagpundok sa Israel sa duha ka habig sa tabil nga mao ang labing importante nga buhat nga nahitabo sa kalibotan karon, dili lisod hunahunaon ang family history nga usa ka halawom, pinadala sa langit nga gasa sa pagtabang kanato sa pagpakigbahin sa ebanghelyo ngadto sa uban.
Hiusaha Kini
Dayon, unsa man ang mahitabo sa paghiusa niining magkauban nga mga kalihokan? Ania ang pipila ka ideya.
Mga Miyembro
Gamita ang mga istorya sa pamilya sa pagsugod og makahuluganong panag-istoryahanay mahitungod sa gugma nga kamo anaa alang sa inyong pamilya, kaniadto ug karon. Ang inyong kahibalo sa inyong kaugalingong pamilya naghimo kaninyo nga hingpit nga kwalipikado nga makig-istoryahanay sa uban mahitungod sa ilang pamilya. Ang inyong tanyag sa pagtabang kanila nga makakat-on og dugang mahitungod sa ilang pamilya makapalawom sa inyong relasyon ug mahimong mogiya kanila sa kataposan ngadto sa usa ka dalan nga mahangturon ang kamahinungdanon.
Mga Nangandam nga Mahimong Misyonaryo
Paggahin og panahon sa pag-apil sa family history ug buhat sa templo, bisan tuod daghan kamo og gibuhat samtang nangandam kamo alang sa inyong misyon. Paghimo og Account sa Simbahan—gikinahanglan ninyo kini alang sa pipila ka rason isip usa ka misyonaryo, lakip sa pag-access sa inyong family history sa FamilySearch.org.
Pagkat-on og mga istorya mahitungod sa inyong mga katigulangan ug mahimong andam sa pagpakigbahin niini. Pagdala og pipila ka ngalan sa pamilya ngadto sa templo kon kamo adunay templo sa duol. Kon wala, pag-andam og mga ngalan nga dad-on sa uban ngadto sa templo. Pagsugod karon sa pagkat-on mahitungod sa FamilySearch ug ubang mga kapanguhaan.
Mga Misyonaryo nga Kasamtangang Nagserbisyo
Pakigtambag sa inyong presidente sa misyon aron masuta kon ang personal nga pag-apil sa family history ug buhat sa templo angay ba sa inyong misyon. Ania ang pipila ka butang nga madawat sa matag misyon:
-
Paghisgot mahitungod sa mga pamilya—ang kinatibuk-an nga tinguha alang sa pagkahisakop ug pakigkonektar maghimo niini nga usa ka natural nga paagi sa pagsugod og panag-istoryahanay.
-
Tabangi ang mga investigator nga makakat-on kon sa unsang paagi ang ilang mga pamilya mahimong magkauban sa kahangtoran.
-
Pagpamatuod sa mga panalangin sa templo.
-
Awhaga ang bag-ong nabunyagan nga mga miyembro sa pag-apil sa family history ug sa buhat sa templo.
Mga Consultant sa Templo ug Family History
Hibaloi nga kamo usab makahimo og mahinungdanong tahas diha sa proseso sa pagkakabig ug pagpadayon alang sa bag-ong mga miyembro sa Simbahan.
“Kon akoy misyonaryo karong panahona,” miingon si Presidente Nelson, “ang akong duha ka suod nga higala sa ward o branch diin ako nagserbisyo mao ang ward mission leader ug ang consultant sa ward temple ug family history.”6
Kon angay, tabangi ang mga misyonaryo nga ipaila-ila ang mga tawo sa family history ug sa katuyoan sa mga templo. Pagtanyag nga tabangan kini nga mga indibidwal nga makasugod sa ilang kaugalingong family tree. Kon angay, awhaga ang mga misyonaryo sa pagdala og mga tawo ngadto sa family history center.
Samtang ang mga investigator mangandam alang sa ilang kaugalingong bunyag, ang mga misyonaryo mahimong moawhag kanila nga mangandam nga magpabunyag diha sa templo alang sa ilang mga katigulangan. Tabangi ang bag-ong nabunyagan nga mga miyembro nga magpadayon sa pagdiskobre sa ilang family history. Pakig-ambit sa ilang kahinam kabahin sa mga oportunidad nga anaa sila karon aron sa pagpanalangin sa mga henerasyon sa mga sakop sa pamilya. Awhaga sila nga magpabilin nga takos sa mga panalangin sa templo.
Tabang sa Pagpadali
Sa Doktrina ug mga Pakigsaad 88:73 ang Ginoo miingon, “Tan-awa, Ako modali sa akong buluhaton diha sa iyang angay nga panahon.” Pipila sa labing klaro nga mga timailhan niini nga pagpadali mao ang:
-
Nagkadaghan nga mga templo ug ang kaduol niini ngadto sa mga miyembro sa Simbahan.
-
Misyonaryo nga buhat sa tibuok kalibotan.
-
Ang paspas nga pag-usbaw sa pagkaanaa sa impormasyon mahitungod sa atong mga katigulangan.
-
Ang kalamboan sa gamhanan nga teknolohiya sa pagpangita, pag-organisar, ug pagpakigbahin niini nga impormasyon.
-
Usa ka tinuod ug paspas nga nag-usbaw nga tinguha taliwala sa mga anak sa Dios dinhi sa yuta sa pagdiskobre kon kinsa sila ug sa pagkakonektar sa ilang mga pamilya—kaniadto ug karon—ingon man usab sa ilang mga yutang gigikanan.
Sama sa giingon ni Presidente Nelson, “Ang a[t]ong mensahe ngadto sa kalib[o]tan yano ug sinsero: a[t]ong gidapit ang tanang anak sa Dios sa duha ka habig sa tabil sa pagduol ngadto sa ilang Manluluwas, [pagdawat sa] mga panalangin sa balaan nga templo, pagbaton og molahutay nga kalipay, ug mahimong angayan sa kinabuhing dayon.”7
Pagkabulahan nga oportunidad nga aduna kita, isip mga miyembro sa Simbahan nga nagpuyo sa ulahing mga adlaw, nga mahimong mga katabang sa Langitnong Amahan sa pagpundok sa Iyang mga anak!