Mga Tingog sa mga Santos sa Ulahing mga Adlaw
Palihog ayaw Paghunong sa Pagkanta
Sa usa ka bus nga puno sa mga tawo ug kabanha, nakakita kami og paagi sa pagpamatuod sa Manluluwas.
Litrato pinaagi ni Rob Crandall/Alamy Stock Photo
Kaming upat ka misyonaryo bag-ohay lang mibiya sa panimalay sa usa ka senior nga magtiayon nga misyonaryo sa dihang mipara kami og bus nga modala namo balik ngadto sa among mga dapit.
Misuot kami sa daghang tawo nga nagbarog ug mikupot sa puthaw nga gunitanan ibabaw sa among mga ulo. Nagbarog, sa wala madugay kinahanglan namong isandig ang among mga lawas sa naglingkod nga mga pasahero aron makahimo og luna alang sa ubang misuot nga mga pasahero.
Usa ka hamtong nga babaye ang milingkod ubos kanako, nga nagsabak og patong-patong nga mga shopping bag ug mga kahon. Iyang itom nga mga mata nagsulti kanako nga siya gikapoy, ug ang iyang magul-anon nga nawong nagpakita sa iyang pagkadili komportable nga naglingkod diha sa naghuot nga bus nga nagdagan latas sa makapasingot nga init kaayo nga hangin sa Panama.
Nagpiyong sa akong mga mata, gihunahuna nako nga nakasimhot ako sa Chinese nga pagkaon nga giandam sa akong mama ug mga igsoong babaye alang sa panihapon sa Bisperas sa Pasko. Gihunahuna usab nako nga ako nakadungog sa musika sa Pasko nga kanunay ipatukar ni Mama. Kadtong makapahupay nga mga hunahuna sa wala madugay mihimo kanako nga makalimot sa kainit ug kasingot, ug misugod ako sa paghagonghong [hum] og usa ka daygon sa Pasko. Ang nawong sa babaye nga anaa sa akong ubos makita nga migaan-gaan. Nakabaton ako og kaisog ug misugod sa pagkanta og himno sa Pasko alang sa akong kaugalingon sa Kinatsila. Si Elder Glazier miapil kanako, ug dayon nahilom kami.
“Palihog, ayaw paghunong,” miingon ang babaye, ang iyang mga mata nagluha.
Nagtan-aw sa akong mga kauban, gikuha nako ang akong hymnbook.
“Mga kaigsoonan,” ako mipahayag taliwala sa kabanha sa bus. Samtang gikuha usab sa akong mga kauban ang ilang mga hymnbook, midugang ako, “Gusto namong mokanta og pipila ka awit sa Pasko aron sa pagpaambit kaninyo sa espiritu sa Pasko—usa ka gamay nga mensahe gikan sa mga misyonaryo sa Ang Simbahan ni Jesukristo sa mga Santos sa Ulahing mga Adlaw.”
Gikanta namo ang matag himno sa Pasko diha sa Kinatsila nga hymnbook. Dili kaayo nindot ang among pagkanta, apan ang gahom sa musika ug ang mga pulong mahitungod sa pagkatawo sa Manluluwas nakatandog sa mga kasingkasing. Ang kadasig sa pagserbisyo diha sa natad sa misyon atol sa Pasko mipuno sa upat kanamo nga mga elder og kalinaw, kalipay, ug kahayag.
Nanganta kami hangtod nga miabot kami sa among hunonganan. Ang babaye nga anaa sa ubos kanako nagmaya ug miingon, “Salamat, mga mag-aawit sa Pasko!”
Human minaog sa bus, nanamilit kami sa napuno sa tawo nga sakyanan. Namakpak ang mga pasahero samtang milarga ang bus, ug misaka kami sa usa ka bungtod hangtod sa tropikal nga kagabhion. Kanunay akong maghandom nianang gabhiona uban sa pasalamat alang sa babaye kinsa mihatag kanamo og oportunidad sa pagpamatuod sa Manluluwas pinaagi sa awit.