Mga Young Adult
Pagkat-on sa Pagbati sa Gugma sa Dios alang Kanako
Nasayod ko nga ang Dios nahigugma sa tanan Niyang mga anak, apan tungod sa ubang rason akong gibati nga gawas lang nako.
Mga litrato gikan sa Getty Images, giposingan sa mga modelo
Ang akong unang tuig sa unibersidad, naglingkod ko sa Relief Society sa dihang usa ka tawo mipaambit og kasinatian diin siya mibati og kadasig sa pagsulat kon giunsa niya sa paghunahuna ang gibati sa Dios mahitungod kaniya.
Kini nakapatandog kaayo nako.
Sa dihang miuli ko sa balay, mibati ko og kadasig sa pagbuhat sa samang butang. Apan human sa 10 minutos nga naglingkod didto nga walay nasulat, ako nakahilak. Gibati nako nga mura og mangingilad. Daghan kaayo sa akong pagpamatuod nga gibase diha sa Dios ug sa Iyang hingpit nga gugma alang kanato. Apan dili gani ko makasulat og bisan unsang butang.
Nasayod ko nga ang Dios nahigugma sa tanan Niyang mga anak, apan tungod sa ubang rason akong gibati nga gawas lang nako.
Giunsa kaha kini?
Pag-atubang sa Akong mga Kahuyang
Dihang nagsugod ko sa pagtambong og therapy pagkasunod tuig, nagsugod ko sa pagtrabaho gamit ang akong hunahuna. Ang akong therapist mipasabot nga ako adunay kalagmitan nga mahimong matang sa tawo nga mobuhat sa tanan o dili gayod. Nagtuo ko nga ako kinahanglan nga hingpit sa pagsunod sa mga sugo o dili igo ang akong kalig-on. Ug nakaamgo ko nga midesisyon ko niana tungod kay ako dili makabati sa Dios diha sa akong kinabuhi, Siya wala. Apan ang paghinumdom sa akong kinabuhi, nasayod ko nga kana dili tinuod. Ug akong naamgohan nga ako ang problema, dili ang Dios.
Sukad sa gamay pa ko, ako nang gikulit sa akong hunahuna kini nga ideya nga kon ako dili hingpit, ako dili gayod mahimong igo ka maayo. Dayag lang, tungod kay walay usa nga hingpit, akong nakaplagan nga ako napuno sa kahuyang. Dili ko komportable sa ideya nga ako adunay bili. Tungod niini kanunay ko nga mobati nga dili sarang ug dili angayan sa gugma ni bisan kinsa—lakip sa Dios.
Sa makadiyot, naningkamot ko sa pagbuntog sa akong kamingaw ug pagbati sa kakulang sa pagpaningkamot pinaagi sa pagsulay sa paghimo sa tanang butang. Akong giukopar ang akong kaugalingon sa tanang kalihokan nga akong makit-an aron malayo ang akong hunahuna sa tinuod nga problema sa akong kinabuhi. Ug ako migahin og naghinubra nga gidak-on sa panahon sa paghunahuna sa panginahanglan sa uban isip usa ka paagi nga makalikay sa pagtutok sa akong kaugalingon. Nagtudlo ko, nagdula og tennis, nagluto alang sa tanan nakong mga higala ug mga silingan, ug nahimong usa ka kaabag sa pagtudlo. Ako usab nagtrabaho og part-time, mitambong og daghang klase, ug nahimong presidente sa daghang club ug mga pundok sa eskwelahan.
Sa mga nagtan-aw gikan sa gawas, ako ang batang babaye nga anaa na ang tanan. Ang dili nila makita mao nga sa kahiladman, ako nanglimbasog sa pagpangita sa butang nga makapahimo nakong mobati og igo nga kamaayo. Apan ang kanunayng paghimo og dugang pa nakadugang lang og kalibog sa akong kinabuhi kon si kinsa ako ug kinsa ang akong gusto nga mahisama.
Sa hinapos sa akong unang tuig ako nakaamgo kon unsa ka dako ang akong pagkabalda tungod sa akong pagbati sa pagkadili takos. Akong gitugotan ang akong kaugalingon nga mabug-atan og maayo sa kahuyang nga akong gihikawan ang akong kaugalingon sa tanang talagsaong mga butang nga gitanyag sa kinabuhi ug nahimong dili na mobati sa akong kaugalingong kinabuhi.
Akong gisusi ug naghunahuna kon ngano, bisan pa sa pagbuhat og daghan kaayo, wala gihapon koy gibati. Kini ang nagdala kanako ngadto sa mangitngit nga depresyon. Unsay inyong buhaton kon kamo mobati nga hingpit nga gibiyaan sa Dios?
Matinguhaon sa pagpadayon sa unahan apan mibati og kahaw-ang samtang ako naghunahuna kon unsa gyod kaha ang gibati sa Dios kabahin nako, nakaamgo ko nga adunay butang sa akong kahiladman nga kinahanglan nga mausab. Kini nga pagkaamgo mipasugod kanako diha sa dalan sa pagbati sa gugma sa Dios alang kanako.
Pagtinguha sa Pagbati sa Gugma sa Dios
Sa sinugdanan, wala ko masayod kon unsaon sa pagsugod; sa kana lang nga buluhaton murag makaluya nga pamation. Apan sa misunod nga tuig, ako misalig sa Ginoo ug sa Iyang walay kinutuban nga kaayo aron makalahutay ko matag adlaw. Nakakaplag ko og daghan kaayong kalig-on ug kalinaw sa hunahuna diha sa pagbasa sa mga mensahe sa mga propeta, sa pagpamalandong sa mga pakigsaad sa templo nga akong gihimo, sa pagtakda og bisan 10 ka minuto matag gabii aron sa pagbasa sa mga kasulatan, ug sa pakighinabi sa Langitnong Amahan diha sa pag-ampo sa tibuok adlaw.
Sa akong pagbuhat niining mga butanga, nagsugod ko sa pagkakita sa Iyang impluwensiya sa akong kinabuhi. Wala ko makaila kon si kinsa ako o unsa nga dalan sa kinabuhi ang pilion. Wala ko masayod unsa gayod nga dalan ang makapahimo nakong mobati og igong kamaayo. Apan sa wala madugay akong naamgohan kon unsa gayod ang akong gikinahanglan nga mao ang masayod kon kinsa ako ngadto sa Dios.
Anaa na ko karon sa akong kataposang semester sa unibersidad. Taliwala sa tanang kaugtas sa pagka estudyante, empliyado, anak nga babaye, igsoong babaye, ug higala, nakaamgo ko nga ang pagkasayod sa akong bili ug pagsabot kon unsa ang gibati sa Dios mahitungod kanako mao ang mahinungdanon sa akong kalamposan sa tanan nga akong buhaton.
Aduna pa gihapon daghang wala pa mahibaloi mahitungod sa akong kaugmaon, ug OK ra kana.
Alang nako, ang pagkasayod nga dili ko kinahanglan nga mahimong hingpit karon nakatabang nako nga makalahutay sa matag adlaw. Ako nasayod nga ang Dios nakaila nako. Nasayod usab ako nga bisan kon dili nako mabati ang Iyang gugma, Siya mapailubon gihapon sa pakigtambayayong kanako.
Sulod sa pipila ka tuig niini nga pakigbisog, ang Dios mitabang kanako sa pagdiskobre og mga kalidad ug mga talento sa akong kaugalingon nga wala gayod nako mabatyagi kaniadto. Ang labing importante, sa sakto nga panahon, pinaagi sa personal nga pagpadayag ug sa inadlaw-adlaw nga mga paningkamot sa pagsabot sa kabubut-on sa Dios alang nako, ako nakakat-on kon unsa ang Iyang gibati mahitungod nako. Ako nakahimo sa pagkuha nga madagayaon diha sa gahom sa Manluluwas ug sa mga panalangin sa Iyang Pag-ula diha sa akong kinabuhi. Kini nakatabang kanako nga mobati sa gugma sa Dios ug masayod nga ako Iyang pinalanggang anak nga babaye.
Sa pagbasa sa mga mensahe sa mga propeta, natandog ako sa dihang gibasa nako kining mga pulong gikan ni Presidente Russell M. Nelson: “Ang pagbati sa bili moab[o]t kon ang usa ka babaye nagsunod sa ehemplo sa Agalon. Ang iyang pagsabot sa walay kataposan nga bili naggikan sa iyang kaugalingon sama kang Kristo nga tinguha sa pagtabang uban sa gugma, sama sa Iyang gihimo.”
Miingon usab siya, “Ang pagsalig sa kaugalingon sa [Usa ka babaye] maangkon pinaagi sa indibidwal nga pagkamatarong ug suod nga relasyon uban sa Dios.”1 Gikan niini, akong nasabtan kon si kinsa ako labaw pa kay sa kombinasyon sa mga butang nga akong gibuhat o gisulti. Ako usa ka mahangturong binuhat nga dunay usa ka talagsaon nga tawag sa pagpangulo uban sa gugma ug kaluoy, sama sa gibuhat sa Manluluwas. Ug kana nga pagsabot molabaw pa sa bisan unsang butang nga mahimong isulay sa pagsulti sa depresyon ngari kanako.
Magpadayon sa Unahan
Bisan karon, makamatngon gihapon ko sa akong kaugalingon nga usahay makalimtan kon unsa ang pamati sa gugma sa Dios ug unsa ka malahutayon nga kalipay ang anaa sa kinagamyan ug kina-ordinaryohan nga mga gutlo sa kinabuhi. Apan ang milagro sa Pag-ula ni Kristo mao nga dili lamang kini alang sa paghinulsol; Ang Iyang grasya makapahimo usab nato nga makasugakod sa matag adlaw ug sa paghigugma sa atong kaugalingon. Makalimtan nako permi kana nga kamatuoran, apan kini tinuod gihapon.
Walay makalingkawas nga kita adunay kalagmitan sa pagsinati sa tawhanong kinaiyahan ug nga kining mga gutlo sa balaang kaklaro ug pagdasig mahimong dili kanunayng mabati nga tinuod kaayo. Busa aron sa pagtabang kanato, makasulat kita ug maghinumdom sa mga panahon sa dihang kita mibati sa gugma sa Dios. Makapadayon kita sa pagpangita og mga paagi nga mabati kana nga gugma. Ang atong inadlaw adlaw nga pagsimba ug padayon nga mga paningkamot sa pagpalawom sa atong personal nga kabalaan dili lang makapalig-on sa atong relasyon sa atong Langitnong Amahan apan makapausbaw usab sa atong personal nga kalipay ug kamasaligon sa kaugalingon. Si Kristo makapalambo niini nga mga paningkamot sa pagtabang kanato sa unsay gusto sa atong Amahan sa Langit nga kita mamahimo.
Ako determinado sa pagpadayon og paningkamot tungod kay ako nakabaton og paglaom diha ni Kristo. Nasayod ko nga ang kinabuhi magpadayon nga mahimong mas maayo ug ako molambo kon ako mosalig Kaniya. Sa higayon nga akong nadiskobrihan ang pagkawalay kinutoban sa gugma sa Dios alang kanako, nakakaplag ko og mas dakong kalig-on sa matag adlaw sa paglagpas sa mga kasakit ug pagbuntog sa akong mga pagbati sa kakulang ug sa akong panginahanglan sa pagkahingpit.
Kon akong makita ang akong kaugalingon nga mahulog og balik sa akong mga kahuyang, akong hinumdoman nga ang Dios naghunahuna nga ako kataw-anan, mabination, ug manggihatagon, ug matahom. Labaw sa tanan, ako makahinumdom nga Siya nagtan-aw kanako nga naningkamot.
Si Presidente Thomas S. Monson (1927–2018) namahayag: “Ang gugma sa Dios anaa alang kaninyo dili igsapayan kon mobati man kamo nga angayan o dili sa gugma. Anaa ra kini kanunay.”2 Mapasalamaton kaayo ako alang niining kamatuoran. Sa atong labing dagkong panlimbasog, atong makita ang himaya sa Dios sa pagtabang kanato nga mopadayon sa unahan. Siya kanunayng mag-abiba kanato.