Tulo ka Leksiyon gikan sa Pagtuon sa Doktrina ug mga Pakigsaad
Makakat-on kita mahitungod sa relasyon sa Ginoo kanato samtang magkat-on kita kon sa unsang paagi Siya nakigtambayayong sa mga Santos sa Ulahing mga Adlaw kaniadto.
Ibabaw ug layo sa tuo: mga paghulagway pinaagi ni Joshua Dennis; tuo: Devastating Weight of 116 Pages [Makapahugno nga Gibug-aton sa 116 ka Pahina], ni Kwani Povi Winder
Ang pagtuon sa Doktrina ug mga Pakigsaad niining tuiga nakahimo kanako sa paghunahuna mahitungod sa daghang paagi nga ako nakaila sa Dios. Usahay mabati nako ang Iyang presensiya dihadiha dayon. Kasagaran matingala ako kon unsa ka duol nga mabati Siya kon ako mogahin og panahon diha sa kinaiyahan. Ug ako makaila sa mga higayon sa dihang ang Ginoo klarong namulong kanako pinaagi sa Espiritu.
Usa ka importante nga bahin sa akong paningkamot nga makaila sa Dios naglakip sa paghandom sa nangagi. Sama pananglit, kanunay akong makakaplag og kahulogan sa akong mga pagsulay human lamang milabay ang pipila ka higayon. Nakabenepisyo usab ako sa pagtuon sa mga kinabuhi sa uban kinsa nagtinguha nga makaila sa Dios. Ang ilang mga kasinatian nakatabang nako nga mahimong mas mapailobon sa akong mga paningkamot ug makaila ug mosalig sa akong kaugalingon nga espirituhanong mga pag-aghat. Sa ato pa, kini nakatabang kanako nga mas makasabot kon sa unsang paagi ang Ginoo makigdait sa Iyang mga anak.
Tingali mao kini ang rason kon ngano nga ang Ginoo misugo sa mga Santos diha sa miting sa pag-organisar sa Simbahan, “Tan-awa, adunay talaan nga gitipigan diha kaninyo” (Doktrina ug mga Pakigsaad 21:1). Ang makasaysayanon nga rekord nga gitipigan sa nag-unang mga miyembro sa Simbahan usa ka abunda nga tinubdan alang sa pagtuon kon sa unsang paagi ang Dios nakigtambayayong kanato. Nakaplagan nako nga mapuslanon kaayo nga magtuon sa mga pagpadayag sa makasaysayanon nga konteksto, gamit ang mga kapanguhaan diha sa Pagpahiuli ug Kasaysayan sa Simbahan nga seksiyon sa Gospel Library.
Ania ang tulo ka konektado nga mga leksiyon nga akong nakat-onan gikan sa pagtuon sa Doktrina ug mga Pakigsaad ug sa sayong bahin nga kasaysayan sa Simbahan niining tuiga.
Mga Pangutana Mag-una sa Pagpadayag
Hapit tanan sa mga pagpadayag sa Doktrina ug mga Pakigsaad gihatag agi og tubag sa mga pangutana. Usa lamang ang maingon nga usa ka wala damha nga balaan nga pagpanginlabot (tan-awa sa Doktrina ug mga Pakigsaad 27). Ang mga pangutana nga misangpot ngadto niini nga mga pagpadayag giaghat pinaagi sa pagtuon sa kasulatan, hilabihan ka grabe nga mga pagsulay, o kultural nga mga ideya niadto nga panahon.1 Kini nagpakita sa hugot nga pagtuo, kakuryuso, mga pagduhaduha, ug mga kahadlok sa nag-unang mga Santos.
Ang Doktrina ug mga Pakigsaad 42 usa ka tubag sa lima ka piho nga mga pangutana mahitungod kon sa unsang paagi ang mga Santos magpundok ug mosuporta sa usag usa.2 Ang mga tubag sa Ginoo importante, dili lamang alang sa sulod niini apan usab sa unsay gisulti niini kanato mahitungod kon sa unsang paagi mahinabo ang pagpadayag. Ang mga Santos naandam sa ilang mga kahimtang ug sa ilang mga pagpamalandong. Nagmugna sila og mga pangutana, miduol sa Dios, ug tinud-anay nga gihatagan og bili ang Iyang mga tubag.
Hunahunaa kon sa unsang paagi kamo moresponde sa impormasyon nga gihatag kaninyo nga wala sa konteksto, sama sa usa ka wala gitinguha nga pahinumdom sa internet alang sa pipila ka sapatos. Tingali kini makapainteres kaninyo, apan mas lagmit nga ibaliwala ninyo kini. Apan, kon kamo nagkinahanglan og mga sapatos ug mangita og paresan nga mohaom sa inyong mga panginahanglan ug sa inyong tiil, mohatag gayod kamo og pagtagad sa unsay inyong makit-an ug mohimo og desisyon sa paglihok. Magamit usab kini sa atong espirituhanon nga pagtinguha.
Ang Ginoo Motahod sa Atong Kabubut-on
Ang atong mga pagpili mahinungdanon, dili lamang sa atong kaugalingong paglambo apan usab sa paagi nga molambo ang buluhaton sa Ginoo dinhi sa yuta. Siya mao ang konduktor, ug kita mao ang mga sakop sa orkestra. Ang atong mga talento, kaagi, ug mga desisyon makatampo sa katahom sa musika. Ang Kirtland, Ohio, nahimong usa ka mahinungdanon nga bahin sa sayong panahon sa Simbahan tungod kay mipili ang nahaunang mga misyonaryo sa paghunong didto ug sa pagbisita sa mga higala sa ilang pagpadulong ngadto sa nataran diin sila gitawag. Ang ilang mga koneksiyon ug ang ilang dinasig nga pagpili sa pagbisita sa Kirtland importante sa pagsugod sa Pagpahiuli.
Ug ang Ginoo motugot kanatong tanan, lakip ni Joseph Smith, nga makahimo og mga sayop. Kita Iyang mga anak, ug sama ni bisan kinsa nga maalamon nga ginikanan, Siya interesado kaayo sa atong paglambo ug gusto nga kita makakat-on pinaagi sa kasinatian.
Ang Ginoo mitugot ni Joseph Smith sa paghatag sa unang 116 ka pahina nga hubad sa Basahon ni Mormon ngadto ni Martin Harris bisan tuod og nasayod ang Ginoo nga kini mawala. Kini nga kasinatian sakit alang ni Joseph, apan nakakat-on siya nga mahimong mas mabinantayon nga tinugyanan. Nakadawat siya og kapasayloan ug “gitawag pag-usab ngadto sa buhat” (Doktrina ug mga Pakigsaad 3:10).
Ang Ginoo interesado kaayo sa atong paglambo ug gusto nga kita makakat-on pinaagi sa kasinatian.
Diyotay Dinhi ug Diyotay Didto
Ang Ginoo wala mihatag ni Joseph Smith og komprehensibo nga tamdanan nga basahon sa mga instruksiyon didto sa Sagradong Kakahoyan. Ang mga pagpadayag nagpakita og padayon nga panag-istorya tali sa Ginoo ug sa Propeta. Usahay kini mibukas og mga panabot sa kahangtoran. Kasagaran, kini igo alang sa mga panginahanglan karon nga adlaw, ug mibalik sa wala madugay si Joseph nga adunay dugang nga mga pangutana.
Ang nahaunang mga pagpadayag misugo sa mga Santos sa pagpundok ug pagtukod sa siyudad sa Zion didto sa Missouri. Sa dihang ang mga Santos gipapahawa gikan sa dapit, ang Ginoo misugo ni Joseph Smith sa pagsulay sa pagkuha og balik sa ilang yuta, una pinaagi sa Kampo sa Zion ug sa wala madugay pinaagi sa pagpangamuyo alang sa tabang sa gobyerno. Sa wala madugay, nakat-onan ni Joseph nga ang Zion mas dako pa gayod kay sa usa ka siyudad. Ang pagpundok makapadayon sa ubang mga dapit samtang ang mga Santos miestablisar og mga stake ug mitukod og mga templo.3
Ang mga kahimtang diin nagpuyo ang mga Santos hilabihang mausab sa paglabay sa panahon. Pagkanindot nga panalangin nga adunay padayon nga pagpadayag nga nakatabang kanato sa pagsagubang sa mga panginahanglan sa atong nag-usab-usab nga kalibotan! Ang labing importante nga mga doktrina sa ebanghelyo molahutay, apan ang nagpadayon nga Pagpahiuli nagpaabot sa hagit sa kausaban.