Mga Tingog sa mga Santos sa Ulahing mga Adlaw
Among Gagmay nga Gasa Nakahimo og Dakong Kalainan
Nakat-onan namo nga ang gagmay nga mga buhat sa pagserbisyo makapanalangin og mga kinabuhi sa gamhanang mga paagi.
Usa ka tuig alang sa Pasko, ang akong asawa, si Julia, mihimo og mga tsokolate nga kendi nga porma og sungkod [candy-cane chocolate sweets] nga giputos namo sa gamay nga giadornohan nga mga kahon. Dayon gibisita namo kadtong anaa sa branch nga Kinatsila ang pinulongan nga among gipangalagaran ug gihatag sa ilaha ang among gasa, uban sa mga panghinaot sa usa ka malipayong Pasko.
Sa dihang miabot kami sa balay ni Brother Sanchez, usa ka mahigalaon, tigulang nga miyembro sa among branch, nanuktok kami ug naghulat. Walay tawo sa panimalay, mao nga gibilin namo ang kendi sa iyang huloganan og sulat [mailbox].
Pipila ka semana ang milabay, atol sa panagtigom sa sakramento, si Brother Sanchez namulong bahin sa iyang pagkakabig ug sa daghang milagro nga iyang nasinati sa tibuok niyang kinabuhi. Mipamatuod siya sa talagsaong gahom sa Basahon ni Mormon sa pagtubag sa importante nga mga pangutana sa kinabuhi. Gipataas niya ang hugpong sa mga kasulatan nga nadawat niya mga dekada ang milabay gikan sa mga misyonaryo kinsa mitudlo kaniya. Ang iyang tingog mikurog uban sa iyang gugma ug pagpamatuod sa Ginoo.
Dayon gibuhat ni Brother Sanchez ang usa ka butang nga wala namo gidahom. Gibutang niya ang among gamay nga giadornohan nga kahon diha sa pulpito. Miingon siya nga sa dihang nakit-an niya ang kahon, wala siya maghunahuna nga siya mokaon sa mga matam-is tungod kay siya diabetic. Hinuon, gibutang niya ang kahon sa lamesa sa kilid sa iyang higdaanan ug nakalimtan na kini.
Pipila ka adlaw ang milabay, samtang naghigda siya, miingon siya nga gibati niya nga ang iyang blood sugar kalit nga miubos. Napuno siya sa kahadlok sa dihang ang iyang lawas misugod sa pagkurog. Nahibalo siya nga nag-atubang siya og emerhensiya, nasayod nga mahimong magkinahanglan siya nga motawag og ambulansiya. Dayon namatikdan niya ang kahon. Gikuha niya kini, giablihan kini, ug gikaon dihadiha dayon ang mga tsokolate. Mibati siya og kahupayan sa dihang ang iyang blood sugar mibalik sa normal.
Gipataas ni Brother Sanchez ang walay sulod nga kahon ug mipamatuod nga ang gagmay nga mga buhat sa pagserbisyo makahimo og dakong kalainan. Mipamatuod siya nga ang ingon nga mga kasinatian dili sulagma ug nga ang Langitnong Amahan nag-impluwensiya sa gagmay nga mga detalye sa atong kinabuhi.
Ang akong asawa ug ako mapaubsanon nga nasayod nga ang among gagmay nga mga buhat sa pagserbisyo nakahimo og dakong epekto kaniya ug tingali gani nakaluwas sa iyang kinabuhi. Samtang maghimo kita og ginagmayng mga buhat sa pagserbisyo alang niadtong naglibot kanato, ang Ginoo moabli sa mga oportunidad nga makapanalangin og mga kinabuhi sa gamhanang mga paagi.